Pa 15 December, 2023, boma la Germany lingupereka mphotu kwa Mzichi Simone Arnold-Liebster. Mphotu yeniyi apaska ŵanthu wo achita vinthu vamampha vakovya ŵanthu anandi. Thomas Pröpstl ndiyu wangupereka mphotu yeniyi kwaku Simone pa nkhumanu yinyaki yo yinguchitikiya ku Chambéry, ku France. Mzichi Simone sonu we ndi vyaka 93. Iyu wanguwongeka chifukwa cha kukumbusa ŵanthu nkhaza zo chipani cha Nazi chachitiyanga ŵanthu wo akana kuja kuchigaŵa chaki.

Mzichi Simone wakambiskanapu ndi ŵanthu a mu vyaru 25. Ŵanthu 65,000 akuvwisiyapu vo wakambanga pankhumanu zenizi, kusazgapu ŵana a sukulu anandi ndi asambizi. Chinanga kuti ngwakukota, kweni waleka cha kulongoropu pa pankhumanu ndipu wagwiriskiya ntchitu vidiyokoniferensi. Iyu wamuka mafumbu ngo achinyamata atimufumba kweniso wakamba vo wangusambirapu pa nyengu yo wenga wachinyamata nge yiwu. Munthu munyaki wati wajapu pa unganu unyaki, wangulemba kuti: “Ndati ndavwisiya nkhani yaku Simone, ndasambira kuti tingaja akukho asani titivivwisa umampha vo tigomezga.”

Pakupereka mphotu kwaku Simone, Thomas Pröpstl wangukamba kuti: “Vakukondwesa kuwona mo mwachiskikiya chifukwa cha kukambiyaku anyinu mo mwatombozgekiyanga. Nyengu zosi mukonkhoska mwalisungu kweniso mwauneneska ndipu mwe ndi chilindizga kuti kunthazi kwe chimangu. Chifukwa cha venivi, nditikupaskani ulemu ukulu.”

Mu ulamuliru wa chipani cha Nazi, Simone ndi banja laki kweniso Akaboni masawuzandi nganandi angutombozgeka ukongwa. Simone wati wafika vyaka 12, boma la chipani cha Nazi lingumutumiza ku jeri la Von Wessenberg Reformatory lo asambiziyaku ŵanthu kuti azomerezi vo boma likhumba. Kweni lingutondeka kumusintha vo wagomezga. Wati wakana kusintha, angumulengesa, amunolanga chakurya, amugwiriskanga ntchitu ya ukapolu kweniso angumukaniza kuti wangalongoronga cha pafufupi vyaka viŵi. Asani wakumbuka vo vinguchitika panyengu yo, Simone wangukamba kuti: “Yehova wangundiwovya kuti ndilutirizgi kuja wakugomezgeka.”

Titimuwonga ukongwa Mzichi Simone kuti walutirizga kupereka unkhankhu kwa Awusefwi a Yehova Chiuta chifukwa chakulutirizga kuja wakugomezgeka.—Mateyu 5 5:16.