Pa 27 June 2021, Bayibolu la Charu Chifya la Malemba Ngakupaturika likutuzgika mu chineneru cha Chitamilu mu vilembu va Chiroma. Abali ndi azichi wo alongoro Chitamilu anguwonere pulogilamu yo yinguchita kujambulika ndipu yinguwoneseka mu vyaru 16 vo mwe abali ndi azichi wo alongoro chineneru chenichi.

• Chitamilu chikambika ndi ŵanthu pafufupi 85 million pacharu chosi

• Apharazgi akujumpha 20,500 ateŵete mu mipingu 334 yo yilongoro Chitamilu ndipuso magulu 32

• Akufwatuliya ankhondi ndiwu angufwatuliya Bayibolu lenili kwa miyezi 6

Bayibolu la Charu Chifya la chineneru cha Chitamilu lingutuzgika mu September 2016. Bayibolu lenili ndi mphasu yikulu ukongwa ku ŵanthu wo alongoro Chitamilu pacharu chosi. Kweni ŵanthu anyaki wo alongoro Chitamilu asuzgika ukongwa kuŵerenga vilembu va Chitamilu ndipu aŵerenga umampha vilembu va Chiroma.

Pakukamba va kuŵerenga Bayibolu pakuyija, wakufwatuliya munyaki wangukamba kuti: “Ndasuzgikanga kuŵerenga Bayibolu la vilembu va Chitamilu ndipu ndakhumbikanga kuwona mu Bayibolu la Chingelezi kuti ndivwisengi vo ndiŵerenga. Kweni kutuzgika kwa Bayibolu lasonu lenili kundiwovyengi ukongwa.”

Tigomezga kuti Bayibolu lasonu lenili liwovyengi abali ndi azichi ŵidu anandi kuti aŵerengengi Mazu ngaku Chiuta “ndi kulunguruka” kweniso kuti akondwengi pa umoyu wawu ndipuso pakovya ŵanthu anyaki mu uteŵeti.—Yoswa 1:8.