Pa 28 November 2020, Bayibolu la Charu Chifya la Malemba Ngakupaturika lakuchita kupulinta kweniso la pa intaneti lingutuzgika muvineneru vinayi va ku Indonesia. Vineneru venivi ndi Chibataki Karo, Chibataki Toba, Chijavanizi ndi Chiniyasi. Mubali Geoffrey Jackson, wa mu Wupu Wakulongozga ndiyu wangutuzga Bayibolu lenili kuziya pankhani yapade yo yingujambulika kali ndipu pulogilamu yeniyi yinguwoneseka ku mipingu yosi ku virwa va ku Indonesia. Ŵanthu pafufupi 41,265 anguwonere pulogilamu yeniyi. Pulogilamu yeniyi ye mukati, Mubali Jackson wangupharazga kuti pambula kuswera yapa Bayibolu la Charu Chifya la Malemba nga Chigiriki Ngachikhristu la pa intaneti lituzgikengi muchineneru cha Chisunda.

Kutuzgika kwa Mabayibolu ngenanga kulongo phamphu lo akufwatuliya ŵenga nalu pakugwira ntchitu yeniyi kwa vyaka vakujumpha vitatu ndi hafu. Ŵanthu akujumpha 100 miliyoni alongoro chimoza mwa vineneru vinayi vo Mabayibolu ngenanga ngakutuzgika. Kusazgapu yapa, apharazgi akujumpha 2,600 agwiriskiya ntchitu vineneru venivi mu uteŵeti kweniso ku mawunganu nga mpingu.

Mazuŵa nganu ŵanthu agwiriskiya ntchitu cha mazu ngakusuzga kungavwisa kweniso masipeling’i ngakusuzga ngo ngasanirika mu ma Bayibolu ngakali. Wakufwatuliya munyaki wangukamba kuti: “Kuja ndi Bayibolu la Charu Chifya lasonu lenili kutindisimikiziya kuti Yehova Chiuta wakhumba kuti weyosi wavwi uthenga wa mu Mazu Ngaki muchineneru chambula kusuzga kuvwisa ndipuso cho chingamufika pamtima.”

Daniel Purnomo, yo we mu Komiti ya Nthambi ku Indonesia wangukamba kuti: “Tija munyengu zakusuzga, ukongwa chifukwa cha mulili wa COVID-19. Abali ndi azichi ŵidu akwanjiwa wo alongoro vineneru venivi awonga ukongwa chifukwa cha mphasu ya pa nyengu yaki.”

Titimuwonga ukongwa Yehova chifukwa wachitiska kuti Mazu ngaki, yo ndi mphasu yakuzirwa ukongwa ngasaniriki ku ŵanthu anandi. Te ndi chigomezgu kuti ŵanthu anandi wo alongoro vineneru venivi ayanduwengi ukongwa ndi vo Bayibolu lisambiza.—Yakobe 1:17.