Pa 4 April 2021, Chimphepu cha Seroja chikunanga vinthu ukongwa ku Indonesia. Abali ndi azichi wo agwira ntchitu yakupereka chovyu angunozga nyumba za abali zo zingunangika. Ntchitu yeniyi yinguwovya so kuti abali ndi azichi ayanjanengi ukongwa kweniso yinguwovya kuti ŵanthu anyaki athamiki Yehova.

Mzichi Ela Ludjipau, yo walera yija ŵana, nyumba yaki yingunangika ndi chimphepu. Komiti Yakovya pa Masoka (DRC) yati yanozga nyumba yaki, iyu wangukamba kuti: “Chinanga kuti ndija ndi ŵana wangu pe, kweni nditijiwona kuti nde ndija cha chifukwa chakuti abali ndi azichi atindiwovya nyengu zosi.” Mzichi munyaki zina laki Yuliana Baunsele, wangukamba kuti: “Ndati ndawona kuti abali ndi azichi atuza kuzindiwovya chimphepu chati chachitika waka, ndingusimikiza kuti Yehova watindiphwere nadi.”

Mubalir Dicky Thome, wa mu Komiti Yakovya pa Masoka (DRC), wangukamba kuti: “Vakukondweska ukongwa kuwona kuti Yehova watovya abali ndi azichi wo akhumbika chovyu. Tinguchiskika ukongwa tati tawona mo abali ndi azichi awongiyanga chifukwa cha chovyu cho angupaskika. Chivwanu chidu chingukho ukongwa tati tawona kuti abali ndi azichi atimuthemba ukongwa Yehova kuti ndiyu wangaŵavikiliya ndipuso kuŵawovya.”

Mbabali ndi azichi pe cha wo anguwona chanju cho Akaboni aku Yehova ŵenachu. Mubali Marsel Banunaek ndi banja laki aja muchigaŵa cho ŵanthu akoliyana cha chifukwa cha kupambana mtundu. Aneba ŵaki aŵatinkhanga Akaboni aku Yehova. Kweni, Mubali Banunaek wangukamba kuti, aneba ŵaki ati awona kuti kunyumba ya kwaki kwaza abali ndi azichi amtundu yakupambanapambana kuziwovya banja laki, anyaki angumukambiya kuti: “Vo tawona mwa Akaboni aku Yehova vipambana ukongwa ndi vo tikuvwa.” Mubali Banunaek wangukamba kuti: “Aneba ŵidu anguzizwa ukongwa ŵati awona kuti titanjana kweniso kukoliyana. Kweniso abali ŵidu nawu angujiwone ŵija lisungu lo abali ndi azichi ŵenalu. Ndipu pasonu panu, yiwu atitifumba mafumbu ngakukwaskana ndi vo tigomezga. Titiŵawonga ukongwa abali ndi azichi chifukwa cha chanju chawu!”

Mura munyaki wa boma, Mrs. Yosi Duli Ottu, wangukamba kuti abali wo agwiranga ntchitu Yakovya pa Masoka (DRC) angulongo “chakuwoniyapu chamampha ukongwa” pa nkhani yakuchita vinthu mwandondomeku kweniso kulondo ulongozgi wa mo angajivikiliya ku mulili wa COVID-19. Wachikambiskana ndi abali a mu Komiti Yakovya pa Masoka (DRC), iyu wangukamba kuti: “Ndakhorwa ukongwa ndi vo muchita pakovya anyinu. Munguchitapu kanthu mwaliŵiliŵi kuti muwovyi anyinu wo angukwaskika ndi chimphepu. Muchita vinthu mwandondomeku ukongwa pakugwira ntchitu yakovya pa masoka ndipu mutuŵa ndi vosi vakukhumbikiya pa kugwira ntchitu yinu.”

Masoka nga chilengedu ngangananga vinthu kweni ngangatimbanyizga cha chanju ndipuso kukoliyana ko kulipu pakati pa Akhristu auneneska. Vititikondweska ukongwa kuwona mo ‘ntchitu zamampha’ zititiwovye kuti tiyanjanengi ndipuso mo zitovye kuti ŵanthu anyaki “akankhuski” Yehova!—Mateyu 5:16.