Pa 7 March 2022, ku Israel akujula malu ngasonu ngakuwonesiyaku ŵanthu mo Akaboni aku Yehova angulongore chiganga pa nyengu yo atombozgekanga ndi chipani cha Nazi. Malu ngenanga nge ku Center for Humanistic Education ku nyumba yakusungiyamu vinthu vakali ya Ghetto Fighters yo ye kuzambwi kwa Galileya ndipu mbiri yeniyi yikulembeka mu Chiarabu, Chingelezi ndipuso Chiheberi. Malu yanga ngajengi ngakujula mpaka mu March 2023. Kuti anozgeke chiwoneseru chenichi, ŵanthu wo agwira ntchitu kumalu ngakusungiyaku vinthu vakali angugwira ntchitu limoza ndi abali ndi azichi akujumpha 50 pacharu chosi. Abali ndi azichi ŵenaŵa anguwovyaku kufufuza mbiri, kujambula vithuzi vakuyeruzgiya ndipuso kufwatuliya mu vineneru vinyaki.

Chiwoneseru ichi che ndi mutu wakuti “Wedontdothat.” Mazu yanga ngang’anamuwa kuti “Tichitaku cha vo.” Mazu yanga ngenga zina la myati lo msilikali wa ku German wangupaska Mubali Joachim Alfermann, yumoza mwa Akaboni aku Yehova wo angumangika ndi chipani cha Nazi. a Chinanga kuti chipani cha Nazi chamuwofyezanga Joachim, kumupuma ndipuso kumuŵika ku msasa wakutombozgiyaku ŵanthu, kweni iyu wangukana kusere usilikali ndipu wakambanga kuti: “Tichitaku cha vo.” Mrs. Yaara Galor, wakuwonere malu ngakusungiyaku vinthu vakali, wangukamba kuti: “Tiziŵa kuti Ayuda angubayika pa vifukwa vakupambanapambana. Kweni ŵanthu anyaki mamiliyoni nganandi nawu so angubayika. . . . Gulu lelosi la ŵanthu ŵenaŵa le ndi mbiri yaki yapade.”

Pakujuliya chiwoneseru chenichi, Dr. Gideon Greif, kaswiri wakufufuza va kubayika kwa ŵanthu anandi ndipuso wakulemba mbiri ya ku msasa wakutombozgiyaku ŵanthu ku Auschwitz, wangukamba vakukwaskana ndi mo Akaboni aku Yehova akaniyanga kusayina chikalata cho chakambanga kuti aleki vo agomezga. Iyu wangukamba kuti: “Chatingi chiŵengi chipusu ukongwa kuti [Akaboni aku Yehova] afwatuliki, chifukwa kusayina chikalata ichi kwatonga waka miniti yimoza. Ivi vilongo kuti chinanga ndi mu nyengu yakusuzga ukongwa mu mbiri yosi ya ŵanthu, patuŵa ŵanthu anyaki wo aja ndi mijalidu yamampha ukongwa, kwali ndi mu vakulongoro pamwenga vakuchita. Mwaviyo mphaki kukamba vakukwaskana ndi Akaboni aku Yehova, kuŵakumbuka, kuŵasambira kweniso kusambiza ŵanthu anyaki vakukwaskana ndi yiwu.”

Mzichi munyaki yo wateŵete pa Beteli ku Israel kweniso yo wengapu pakujuliya malu ngakuwonesiyaku ŵanthu mo Akaboni angutombozgeke wangukamba kuti: “Masozi ngangulenga mumasu mwangu pakuŵanaŵaniya kuti te ndi malu nge yanga kunu ku Israel ngakuwonesiyaku ŵanthu mo isi Akaboni tatombozgekiyanga . . . Kuvwa ŵanthu wo agwira ntchitu kumalu ngakusungiyaku vinthu vakali, achizumbuwa zina la ‘Akaboni aku Yehova” mu Chiheberi, venga vambula kuluwika. Pa mwambu uwu, zina laku Yehova lingutumbikika ukongwa.’

Te ndi chigomezgu kuti ŵanthu wo aluta kuchiwona malu ngenanga achiskikengi ukongwa ndi chiganga kweniso chivwanu cho abali ndi azichi ŵidu angulongo mu nyengu ya chipani cha Nazi ku Germany. Chivwanu chawu chingawovya so ateŵeti aku Yehova a mazuŵa nganu kuti alutirizgi ‘kutchimbiya mwakukunthiyapu maphara.’—Aheberi 12:1.