Khoti Likulu Ukongwa ku Italy likuyeruzga mwakumiya Kaboni waku Yehova munyaki mucharu ichi kuti munthu weyosi we ndi wanangwa wakusankha pa nkhani ya munkhwala. Pa 23 December 2020, Khoti Likulu lenili likuzomereza kuti munthu weyosi yo watama we ndi wanangwa wakusankha chovyu chakwenere cha munkhwala, kusazgiyapu munkhwala wo uleka kususkana ndi vo wagomezga.

Mulandu wa nkhani iyi ungwamba chifukwa cha vo vinguchitika mu 2005, po madokotala nganguphwanya wanangwa wa mzichi munyaki. Ŵechendamuchiti opalechoni, mzichi uyu wanguŵakambiya limu madokotala kuti wakana kuŵikika ndopa ndipu wanguŵalongo khadi lo lilongo kuti wakana kuŵikika ndopa. Kweni madokotala ngangukana kuvwiya vo mzichi uyu wangupempha ndipu angumuŵika ndopa.

Khoti lingukamba kuti kukana kuŵikika ndopa “ndi nkhani waka yakuti munthu we ndi wanangwa wakusankha pa nkhani ya munkhwala cha, kweni munthu wangasankha venivi chifukwa cha vo wagomezga.” Khoti ili lingukamba so kuti wanangwa wenuwu “ngwakupaturika ndipu Dangu litiwuvikiriya ukongwa.”

Yaka nkha nambala 10 sonu kuti Khoti Likulu Ukongwa ku Italy liyeruzgi mwakumiya Akaboni aku Yehova. Pa mlandu weyosi, Khoti ili laja lichiŵikiya kuvuli wanangwa widu pa nkhani yakusopa. Milandu yaki yenga yakukwaskana ndi vinthu ivi:

• Kukana kuŵikika ndopa: Akaboni aku Yehova akhumba kuti alondiyengi chovyu chakwenere cho chilipu ndipu azomerera kulonde munkhwala wo ngwakwenere. Makhoti ngasimikiziya kuti Akaboni wo atama ŵe ndi wanangwa wakusankha munkhwala wo ukoliyana ndi njuŵi yawu yakusambizika Bayibolu. Madokotala ngatenere kutumbika vo munthu yo watama wasankha pankhani yakukana kuŵikika ndopa. Munthu yo watama we ndi wanangwa wakusankha chovyu cha munkhwala mwakukoliyana ndi vo wagomezga.

• Kulera mwana: Apapi wo Mbakaboni aku Yehova ŵe ndi wanangwa wakusambiza ŵana ŵawu vo agomezga mwakuyanana waka ndi apapi wo Mbakaboni aku Yehova cha.

• Kusezgeka mu mpingu: Akaboni aku Yehova atimuchitiya vinthu mwambula urunji cha munthu yo wasezgeka mumpingu. Mumalu mwaki, Akaboni aku Yehova ŵe ndi wanangwa wakuleka kucheza ndi munthu yo wasezgeka mumpingu ndipu weyosi wakhumbika kutumbika wanangwa wenuwu.

• Kupereka Msonkhu: Akaboni aku Yehova apereka msonkhu ndipu nawu ŵe ndi wanangwa nge mo visopa vinyaki vosi ku Italy venawu.

Tichiskika ukongwa asani arara a boma avikiliya wanangwa wakusopa wa ŵanthu aku Yehova.—Nthanthi 21:1.