Pambula kuswera yapa, khoti la Apilu mutawuni ya Milan ku Italy, lapereka cheruzgu cho chakondwesa banja linyaki la Akaboni aku Yehova pa nkhani yakusankha chovyu cha munkhwala cha mwana wawu. Cheruzgu chenichi chawovya makhoti kuti ngaleki kukamba kuti apapi mbakwenere cha kusankhiya ŵana ŵawu chovyu cha munkhwala. Ve viyo chifukwa chakuti asankha kuti ŵana ŵawu aleki kuŵikika ndopa mwakukoliyana ndi vo agomezga.

Mu September 2019, banja linyaki la Akaboni linguluta ndi mwana wawu wa myezi 10 kuchipatala yo wanguwa ndipu wangupwetekeka ukongwa. Madokotala nganguwona kuti mwana yo wakhumbikanga kuchitika opaleshoni ya mu mutu. Madokotala ngenanga ngangufiska kumuchita opaleshoni kwambula kumuŵika ndopa.

Chinanga kuti mwana yo wachiranga kwambula suzgu yeyosi kweni dokotala wangupempha apapi kuti mwana yo waŵikiki ndopa nge “munkhwala wo ungamuwovya.” Apapi angupempha kuti mwana wawu amupasi chovyu cha munkhwala chambula kugwiriskiya ntchitu ndopa.

Mumalu mwakuvwiya vo apapi angupempha, dokotala wangukambiya apolisi ndipuso ku ofesi ya boma. Ofesi ya boma yinguchito chikalata ku khoti la mabanja. Khoti lingulonda apapi mazaza ngakusankhiya mwana wawu chovyu cha munkhwala ndikupereka kwa mura wa va chipatala. Kweni mwana yo wanguŵikika ndopa cha chifukwa madokotala nganguwona kuti mphakwenere cha.

Atolankhani anandi ku Italy angukamba vakukwaskana ndi nkhani iyi. Yiwu angukamba vinthu vaboza kuti mwana yo wanguchira chifukwa chakuti khoti linguzomereza kuti waŵikiki ndopa.

Pa 10 September 2020, Khoti la Apilu lingususka vo khoti la mabanja linguchita pakupereka chikalata chakulonda mazaza apapi. Khoti la Apilu lingukamba kuti khoti la mabanja lakhumbikanga cha kupereka chikalata ichi ndipuso lilivi mazaza ngakupereka cheruzgu pa mulandu wenuwu.

Pakupereka cheruzgu chenichi, Khoti la Apilu ku Milan lingukamba kuti: “Apapi angukana kuti mwana wawu waŵikiki ndopa chifukwa cha vo agomezga. Uwu mbukaboni wakukwana cha wakulongo kuti apapi yaŵa mbaheni ndipu akhumbika cha kuŵalonda mazaza ngakusankhiya mwana wawu vakuchita.” Chaka chamala pe, Makhoti nga Apilu ngatatu ku Italy nganguzomereza apapi wo Mbakaboni kuti ŵana ŵawu alondiyengi chovyu cha munkhwala kwambula kuŵikika ndopa.

Akuwona marangu kweniso arara achipatala akukhumbika kuvwisa fundu yakuti Akaboni aku Yehova achira mwakuziziswa cha ndipuso akana munkhwala cha. Mumalu mwaki, yiwu apenja vipatala vo viziŵa umampha ntchitu yawu ndipuso vo ve ndi vipangizu vamampha kuti alonde chovyu mwakukoliyana ndi vo agomezga. Yiwu apempha madokotala kuti aŵapaski chovyu cha munkhwala kwambula kuŵikika ndopa. Madokotala muvipatala vikuluvikulu pacharu chosi ngapereka chovyu chakwenere kwambula kugwiriskiya ntchitu ndopa.

Te akukondwa kuti vo khoti ili likuyeruzga viwovyengi abali ndi azichi ŵidu po atesesa kusankhiya ŵana ŵawu chovyu chakwenere chakuchipatala.—Machitidu 15:29.