Chinanga kuti chuma chasere pasi chifukwa cha mulili, ntchitu yakusamusa ofesi ya nthambi ya Akaboni aku Yehova ku Italy mutawuni ya Bologna yilutiriya. Pa 5 September 2020, lenga zuŵa lakukhumbika ukongwa, chifukwa pa zuŵa ili tingumaliza kumanga nyumba yakwamba. Ndipu ofesi yasonu yeniyi yazamumala kukumaliya kwa chaka cha 2023.

Abali 5 a mu Komiti ya Vakuzengazenga ndiwu awonere ntchitu yakukwaskana ndi kuzenga ofesi ya nthambi yasonu. Tingulembera kampani yinyaki kuti yinozgi mapulani ndipuso kuzenga nyumba yakugonamu. Ndipu kampani iyi yingwamba kuzenga nyumba yeniyi mu September 2018.

Mu 2019, makampani nganandi ngangukumana ndi suzgu yikulu ya chuma. Venivi vinguchitiska kuti kampani iyi yileki kugwira ntchitu. Tiwonga ukongwa kuti ntchitu yakuzenga vimati va nyumba iyi ndipu yamala kali. Venivi vinguchitiska kuti ntchitu yileki kuma kwa nyengu yitali.

Kukwambiriya kwa 2020, mulili wa COVID-19 unguwanda ukongwa kumpotu kwa Italy ndipu tawuni ya Bologna nayu yingukwaskika. Arara a mutawuni iyi angumika dankha ntchitu zinyaki, kusazgapu ntchitu zakuzenga. Kweni pati pajumpha mwezi umoza, arara anguzomereza kuti ŵanthu ayambi so kugwira ntchitu kweni alondongi ulongozgi wakutuliya kwa akuwona va umoyu kweniso ku gulu lidu wa mo angajivikiriya ku COVID-19.

Mubali Paolo Comparato, yo we mu Komiti ya Vakuzengazenga, wangukamba kuti: “Tiwonga ukongwa Yehova chifukwa cha ntchitu yakukondwesa yeniyi. Pakaŵengevi mzimu waki, tatingi tifiskengi cha kulutirizga kugwira ntchitu chifukwa cha masuzgu ngo tingukumana nangu.”

Cristina Dallacasa, yo ndi mura wa kampani yo yizenga ofesi iyi wangukamba kuti: “Tiwonga Akaboni aku Yehova kuti akusankha isi kuti tiŵazenge yimoza mwa nyumba zawu zakuzirwa ukongwa kunu ku Italy. Tigwira nawu ntchitu mwakukoliyana ndipu venivi vatiwovya kuti timalani ndi masuzgu ngo tikumana nangu pakuzenga. Akaboni aku Yehova aŵikiyapu mtima ukongwa pa ntchitu yawu ndipu awonesesa kuti wo agwira ntchitu mbakuvikilirika.” Iyu wangumaliza ndi mazu ngakuti: “Chakukondweska ukongwa ntchakuti sonu ndaziŵa kuti gulu lo lichita vinthu mwauneneska. Ivi vakuchiska ukongwa, pa nyengu iyi po ndalama zasere pasi ukongwa.”

Te ndi chigomezgu kuti Yehova walutirizgengi kutiwovya pa ntchitu iyi yo yitumbika zina laki.—Salimo 127:1.