Komiti ya Nthambi ku Malawi yikunozga kuti ŵanthu avwisiyengi maunganu nga mpingu kuziya pa TV ndipuso mawayilesi nga mucharu cho. Nthowa yeniyi yawovya kuti maunganu ngidu ngafikiyi ŵanthu anandi ukongwa. Ku Malawi kwe Akaboni aku Yehova akujumpha 100,000. Kweni akupharazga nkhani pa wayilesi akamba kuti sabata yeyosi ŵanthu 2 miliyoni awonere maunganu ngidu pa TV ndipuso ŵanthu akukwana 8 miliyoni avwisiya pa wayilesi.

Chifukwa cha mulili wa Corona, abali ku Malawi awungana so cha mu Nyumba za Ufumu nge mo achitiya abali muvyaru vinyaki. Mumipingu yinandi apharazgi ŵe ndi mwaŵi wakuwonere ndipuso kuvwisiya maunganu pa TV pamwenga pa wayilesi. Venivi vawovya abali wo angafiska cha kuchita maunganu pa videoconference.

Maunganu ngenanga ngachitika mu Chichewa chifukwa ndichu chineneru cho ŵanthu anandi atuvwa umampha. Pa TV pawoneseka so Chineneru cha Manja cha ku Malawi. Kusazgiyapu yapa pawoneseka so mavidiyo pamwenga seweru la Bayibolu lakuvwisiya. Pakumaliya pa maunganu ngenanga akuvwisiya achiskika kuti ajulengi webusayiti yidu ya jw.org kuti aziŵi vinandi mu chineneru chawu.

Nthowa yeniyi yachitiska kuti maboza ngo ŵanthu akamba ngakukwaskana ndi Akaboni aku Yehova ngamali. Munthu munyaki wangukamba kuti: “Ndavwisiyapu maunganu nginu kwa masabata ngamanavi ngo ngajumpha. Mawunganu ngenanga ngandiwovwa kuti ndiziŵi uneneska wakukwaskana ndi Akaboni. Maunganu nginu ngapambana ukongwa ndi nga visopa vinyaki chifukwa ngatitifika pa mtima!” Munthu mwenuyu ndipuso banja laki akwamba sambiru la Bayibolu ndi Akaboni aku Yehova.

Augustine Semo, yo wawonere ntchitu za Dipatimenti Yakupharazga Nkhani ku Malawi, wangukamba kuti: “Nthowa yeniyi yaŵawovya ukongwa abali kuti alutirizgi kusopa Chiuta. Yawovya so ŵanthu wo mbakaboni cha kuti ayambi kuziŵa fundu za mu Bayibolu. Tigomezga kuti asani taziyamba kuungana so pamoza mu Nyumba za Ufumu, tazamuwona ŵanthu anandi asonu achiza kuziwungana nasi.”

Te akukondwa kuziŵa kuti Akaboni anyidu kweniso ŵanthu anyaki ku Malawi, asopa Yehova mu nyengu yakusuzga iyi. Tiwonga ukongwa vo ‘kapolu wakugomezgeka ndi wazeru,’ wachita pakuwonesesa kuti weyosi walonde chakurya chauzimu.—Mateyu 24:45.