Pa 8 August 2021, Mubali Mark Hutchinson, wa mu Komiti ya Nthambi ku Malawi wangutuzga Buku la mu Bayibolu la Uthenga Wamampha wo Ukulembeka ndi Mateyu mu chineneru cha Manja cha ku Malawi. Buku la Mateyu ndakwamba kutuzgika mu Chineneru cha Manja cha ku Malawi.

Buku la mu Bayibolu lenili lingutuzgika pa pulogilamu yo yinguchita kujambulika ndipu yinguwoneseka muchigaŵa chosi cha nthambi yeniyi. Pulogilamu yeniyi yinguwoneseka so kuziya pa TV ndi pa wayilesi.

Mpingu wakwamba wa chineneru cha manja ungujalikiskika ku Lilongwe mu 2005. Mu 2009, mabuku ngangwamba kufwatulika mu Chineneru cha Manja cha ku Malawi. Kutuwa pa nyengu yo, mabuku ngakukwana 34 ngafwatulika mu chineneru chenichi. Pasonu panu pe matimu ngankhondi ngo nge ndi akufwatuliya 21.

Yumoza mwa akufwatuliya chineneru cha manja wangukamba kuti: “Tiyanduwa asani tiŵerenga malemba ngo nge mu mabuku ngidu ngo akungafwatuliya mu chineneru cha manja. Sonu te ndi mwaŵi wakuyanduwa so ndi mavesi nga mu Bayibolu asani tisambira pakutija kweniso wakungagwiriskiya ntchitu muuteŵeti.”

Chakuyeruzgiyapu ndi mo lemba Mateyu 22:44 akulifwatuliya umampha. Wakufwatuliya munyaki wangukamba kuti: “Mu Mabayibolu nganyaki lemba ili akulifwatuliya kuti: ‘Ambuya angukambiya Ambuya.’ Venivi vichitiska ŵanthu anyaki kuŵanaŵana kuti Yehova ndi Yesu ndi munthu yumoza. Bayibolu ili latuwa sonu, likamba umampha kuti Yehova ndiyu walongoronga ndi Ambuya Yesu.”

Tipemphere kuti mphasu yeniyi yo abali ndi azichi ŵidu alonde ku Malawi yiŵawovyi kuja paubwezi wakukho ndi yo wapereka “mphasu yakufikapu” Yehova.—Yakobe 1:17.