Pambula kuswera yapa, Akaboni aku Yehova ku Malta (JW-Malta), alembesa kuja gulu lakuzomerezeka mwadangu mucharu chenichi. Pa 28 December 2021, Akaboni aku Yehova ku Malta (JW-Malta) angulonde Satifiketi Yakulembese ya Munthu Wakuzomerezeka Mwadangu. a

Akaboni aku Yehova ku Malta akujalikisika kwamba cha mu ma 1970. Kweni kwa vyaka vinandi, mipingu yaziŵikanga ukongwa cha pamwenga yaziŵika cha mwadangu. Venivi vinguchitiska kuti viŵi vakusuzga kuti mipingu yije ndi vinthu vawu pamwenga kuti ajuli maakaunti nga ku banki. Mu 1994, wupu wa International Bible Students Association (IBSA) unguja gulu lambula kulembesa ku Malta. Venivi vinguwovyaku kuti a IBSA aje ndi wanangwa umanavi, kweni wanangwa wenuwu wenga wakulutiriya cha. Chifukwa chakuti sonu Akaboni aku Yehova ku Malta (JW-Malta) akulembesa mwadangu, viŵengi vambula kusuzga kuti ofesi ndipuso mipingu yigwirengi umampha ntchitu.

Pakuŵanaŵaniya mo angulutiya kuchilembesa pambula kuswera yapa, Mubali Joe Magri, wa mu Komiti ya Charu cha Malta wangukamba kuti: “Vakuchiska ukongwa kuwona mo Yehova wangutiwovye kuti tije gulu lakuzomerezeka mwadangu. Iyu wangutitumbika kuziya muchovyu chakutuliya kwa abali a mu Dipatimenti ya Marangu ku Britain ndipuso ku likulu la pacharu chosi kuti tifiski kulembesa. Te akukondwa kuti tifiska kuchita vinthu vakukwaskana ndi Ufumu ndipuso kuthamika ukongwa Yehova mwakuja ndi zina laki pa satifiketi yifya.”

Pasonu panu, ku Malta kwe Akaboni aku Yehova akujumpha 800, wo ateŵete mu mipingu 11. Te akukondwa kuti ntchitu “yakupharazga Ufumu waku Chiuta,” yo wakutumika Paulo wanguyiyambisa vyaka pafufupi 2,000 vo vajumpha ku Malta yilutirizga kuluta panthazi “kwambula chakutondekesa chechosi.”—Machitidu 28:1, 30, 31.