Pa 8 August 2021, Mubali José Nieto, wa mu Komiti ya Nthambi ku Central America ndiyu wangutuzga Bayibolu la Charu Chifya la Malemba nga Chigiriki Ngachikhristu mu Chineneru cha Chimikisiteki (Guerrero). Bayibolu la chineneru cha Chimikisiteki lakuŵerenge pa vipangizu va mazuŵa nganu lingutuzgika mu pulogilamu yakuchita kujambula yo ŵanthu 785 anguwonere. Ofesi ya Nthambi yiwona kuti Bayibolu lenili liyambengi kupulintika mu November 2021 ndikutumizgika mu mipingu mu mwezi wa December 2021 pamwenga January 2022.

Mubali Nieto wati waŵerenga lemba la 1 Akorinto 14:9, pa nyengu yo wakambanga nkhani yakutuzga Bayibolu lenili, wangukamba kuti: “Mazu ngaku Chiuta nganthazi ukongwa, kweni asani tikhumba kuti uthenga waki uŵafikengi pa mtima ŵanthu, Bayibolu likhumbika kusanirika mu chineneru cho weyosi wangachivwisa umampha  . . . , chineneru cho ŵanthu aŵereŵeta nyengu zosi.”

Chimikisiteki (Guerrero) ntchineneru cho mazu ngaki ngasintha vo ngang’anamuwa asani ngazumbulika mwakupambanaku. Chineneru ichi chikambika ndi ŵanthu pafufupi 150,000 muchigaŵa cha Guerrero, ku Mexico, kusazgapu vigaŵa vinyaki vambula kuziŵika va ku Mexico ndi ku United States.

Mubali Lázaro González, wa mu Komiti ya Nthambi ku Central America wangukamba kuti: “Ŵanthu wo aŵereŵeta Chimikisiteki (Guerrero) aja muchigaŵa chikavu ukongwa ndipuso cha viwawa. Ndipu sonu mulili wa COVID-19 wachitiska kuti vinthu vifiki paheni ukongwa. Venivi vachitiska ŵanthu anandi kuwona nge kuti Chiuta waŵataya. Kweni, kulonde Bayibolu la Malemba nga Chigiriki muchineneru chawu, mbukaboni wakulongore limu kuti Yehova watiŵaphwere.”

Bayibolu lenili lechendatuzgiki, penga waka Mabayibolu ngaŵi nga Malemba nga Chigiriki Ngachikhristu nga chineneru cha Chimikisiteki (Guerrero). Mabayibolu ngenanga ngakusuzga kungavwisa chifukwa chakuti ngangufwatulika ndi ŵanthu akutuliya muvigaŵa viŵi vakupambana. Akufwatuliya angugwiriskiya ntchitu mazu ngo ŵanthu a muchigaŵa chawu pe akungaziŵiriya ukongwa. Venivi vachitiskanga kuti ŵanthu a muvigaŵa vinyaki asuzgikengi kuvwisa mazu nganyaki asani atingaŵerenga.

Chakuyeruzgiyapu cha mu Bayibolu lifya lenili lo akulifwatuliya mwakuvwika umampha, ndi lemba la Mateyu 5:9, lo likamba kuti: “Mbakukondwa wo atanja chimangu.” Chineneru cha Chimikisiteki (Guerrero), chilivi mazu chayingu ngakuti “chimangu.” Kuti afwatuliyi mwakuvwika umampha mazu ngenanga, vesi ili angulifwatuliya kuti: “Mbakukondwa wo apenja nthowa zakuti akhwechi masuzgu/vakutimbanyiza.” Venivi vikoliyana ndi vo mazu nga Chingelezi ngang’anamuwa.

Yumoza mwa ŵanthu wo angufwatuliyaku wangukamba kuti: “Lemba lo nditanja ukongwa nda 1 Peturo 1:25, lo likamba kuti ‘mazu ngaku Yehova ngaŵengeku mpaka muyaya.’ Ndingakamba cha mo umoyu wangu watingi uŵiyengi kwambula Bayibolu ndipu nditimuwonga ukongwa Yehova pakulivikiliya mpaka sonu. Ndipu sonu, te ndi Bayibolu muchineneru chidu cha Chimikisiteki (Guerrero).”

Wakufwatuliya munyaki so wangukamba kuti: “Ndikayika cha kuti Yehova ndiyu watitiwovya kuziya mwa mzimu waki wakupaturika. Nde wakusimikiza kuti vineneru ndi suzgu cha kwaku Yehova. Iyu watitilongo so kuti Mazu ngaki ‘ngamangika cha.’”—2 Timote 2:9.