Pa 18 July 2021, Mubali Arturo Manzanares, wa mu Komiti ya Nthambi ku Central America, ndiyu wakutuzga Bayibolu la Charu Chifya la Malemba nga Chigiriki Ngachikhristu mu chineneru cha Chitojolabo.

Chitojolabo chikambika ukongwa ndi ŵanthu akujumpha 66,000 wo aja muchigaŵa cha Chiapas, cho che kumwera chakuvuma kwa charu cha Mexico kufupi ndi Guatemala. Bayibolu lo likutuzgika ndakuŵerenge pa vipangizu va mazuŵa nganu ndipu pulogilamu yakutuzga Bayibolu lenili yinguchita kujambulika. Ŵanthu pafufupi 2,800 anguwonere pulogilamu yeniyi.

Wakukamba nkhani wangufumba kuti: “Ntchifukwa wuli takhumbikanga Bayibolu la chineneru cha Chitojolabo?” Iyu wangukamba kuti: “Ntchifukwa chakuti kuja ndi Bayibolu lo lipereka unkhankhu kwaku Yehova, yo ndi Mlembi wa Bayibolu, nkhwakukhumbika ukongwa.”

Mzichi munyaki yo wakugwiraku ntchitu yakufwatuliya Bayibolu lenili wangukamba kuti: “Ndinguchiskika ukongwa ndati ndaŵerenga lemba la Yohane 5:28, 29. Ndajiyeruzgiyanga kuti ndiwona ama ŵangu achiyuskika kutuliya kumasanu. Ndaja ndichiŵerenga mavesi ngenanga maulendu ngananandi waka mu Bayibolu la Chisipanishi, kweni sonu chifukwa chakuti nditingaŵerenga muchineneru changu ndipu nditingavwisa umampha. Ndiwonga ukongwa!”

Pa nyengu yo afwatuliyanga Bayibolu lenili, akufwatuliya angusama ku Nthambi ya ku Central America yo ye kufupi ndi Tawuni ya ku Mexico, kuluta ku ofesi yawu yasonu yakufwatuliya mabuku ku Margaritas, muchigaŵa cha Chiapas. Ofesi yeniyi ye muchigaŵa cho ŵanthu alongoro chineneru cha Chitojolabo, mtunda wamakilomita 990 kutuwa ko kwe ofesi ya nthambi. Pasonu panu, pa ofesi yeniyi pe akufwatuliya 9 wo ateŵete limoza ndi abali ankhondi wo ateŵete mu madipatimenti nganyaki. Chinanga kuti ŵanthu wo alongoro chineneru cha Chitojolabo wo atuliya muvigaŵa vakupambanapambana avwanana, kweni pe mphambanu yimanavi waka ya mo mazu nganyaki atingazumbuliya. Mwaviyo, akufwatuliya angufwatuliya Bayibolu la Malemba nga Chigiriki Ngachikhristu mwakuphwere ukongwa ndi chilatu chakuti lije launeneska kweniso lakuvwika umampha ku ŵanthu wosi.

Mwakuyeruzgiyapu, mu Bayibolu la chineneru chenichi lo lilipu kali, mazu ngakuti “Ufumu waku Chiuta” akungafwatuliya kuti “malu ngo Chiuta wapereke marangu” pamwenga “Tawuni ya ku Chiuta.” Kweni ŵanthu wo atingagwiriskiya ntchitu cha mazu yanga, palivi cho avwapu. Bayibolu la Charu Chifya la chineneru cha Chitojolabo le ndi mazu ngakuti “Ufumu waku Chiuta,” ngo ngavwika umampha ukongwa.

Mzichi munyaki yo wengapu pa pulogilamu yakutuzga Bayibolu ili wangukamba kuti: “Chakukondwesa ntchakuti Yehova wangulongozga weyosi yo wangugwiraku ntchitu yakufwatuliya Bayibolu ili kuti lifwatuliki umampha, mwauneneska kweniso lije lambula kusuzga kuliŵerenga. Ndigomezga kuti mphasu yeniyi yiwovyengi ŵanthu anandi wo aleka kumuziŵa Chiuta.”—Machitidu 17:27.