Pa 25 August 2023, Mubali Robert Batko, wa mu Komiti ya Nthambi ya ku Central America, wakutuzga mabuku nganayi ngakwambiriya mu Bayibolu la Charu Chifya la Malemba nga Chigiriki Ngachikhristu muchineneru cha Chijeremani Chinyaki. Mabuku ngenanga ngangutuzgika pa zuŵa lakwamba la Unganu Wachigaŵa wa mutu wakuti “Zikirani”! wo unguchitikiya ku Cuauhtémoc, Chihuahua, ku Mexico. Unganu uwu unguchitika muchineneru cha Chijeremani Chinyaki ndipu kwenga ŵanthu akukwana 355. Pa zuŵa lenili, mabuku ngosi nganayi ngenanga nga Uthenga Wamampha,, ngangwamba kusanirika ngakuŵerenge pa vipangizu va mazuŵa nganu kweniso ngakuchita kuvwisiya. Kusazgiyapu yapa, ŵanthu wosi wo angusanirika pa unganu uwu, angulonde Bayibolu lakuchita kusindikiza la buku la Uthenga Wamampha wo Ukulembeka ndi Mateyu. Mabuku nganyaki ngatatu nga uthenga Wamampha ngakusindikiza, ngayambengi kusanirika asani Bayibolu losi la Charu Chifya la Malemba nga Chigiriki Ngachikhristu muchineneru cha Chijeremani Chinyaki, lamala kufwatulika. Chineneru cha Chijeremani Chinyaki chikambika ukongwa ku America ndipuso chikambika ndi ŵanthu anandi ku Mexico.

Buku lenili layamba kali kuwovya ŵanthu kuti alivwisengi umampha Bayibolu. Mubali munyaki wangukamba kuti: “Bayibolu lo tagwiriskiyanga ntchitu lilivi vizindikiru vakulongo kuti mazu ngo ngangukakambika ndi munthu munyaki, mwaviyo mphakusuzga kuziŵa kuti ndiyani yo walongoro kweniso kuti wakamba ndiyani. Bayibolu lasonu lenili ndambula kusuzga kulivwisa.”

Tikondwa nawu limoza abali ndi azichi ŵidu wo alongoro Chijeremani Chinyaki ndipu tigomezga kuti mabuku ngenanga ngawovyengi ŵanthu anandi asonu kuti “awuziŵi umampha uneneska.”—1 Timote 2:3, 4.