Kwambiya waka mu January kufika mu July 2022, ku Mexico kwayamba maofesi ngankhondi ngakufwatuliyaku mabuku (RTO). Venivi vichitiska kuti ma RTO ngosi pamoza muchigaŵa cha nthambi ya Central America ngakwani 25. Ma RTO ngasonu ngenanga ngawovyengi kuti abali ndi azichi wo afwatuliya mabuku mu chineneru cha Chitarasikani, Chitizozilu, Chizapoteki (Isthmus), Chiotomi (Mezquital Valley), ndipuso Chicho ajengi ko ŵanthu anandi wo alongoro vineneru venivi aja. Mu myezi yo yituza, ma RTO nganyaki 8 ngajulikengi muchigaŵa cha nthambi ya Central America, ndipu abali akhumba so kuzenga ma RTO nganyaki 34.

Patuŵa phindu likulu asani akufwatuliya aja ndi kugwiriya ntchitu muchigaŵa cho ŵanthu alongoro chineneru cho afwatuliya. Mzichi Marcela Hernández, yo wafwatuliya Chitizozilu, yo wagwiriya pa ofesi ya nthambi ntchitu yakufwatuliya kwa vyaka vinandi wangukamba kuti: “Pa nyengu yo tagwiriyanga ku ofesi ya nthambi, ndingwamba kuwona kuti mazu ngo ndagwiriskiyanga ntchitu ngavwikanga umampha cha. Kweni sonu nditiŵavwa abali asani amuka pa maunganu kweniso asani apharazga. Venivi vitindiwovya kuti vo ndifwatuliya vivwikengi umampha ukongwa.”

Ma RTO ngasonu ngenanga ngachitiska kuti ŵanthu azukumi chifukwa chakuti ngakutowa kweniso atingaphwere umampha. Kanandi ŵanthu atuma kuti awoni nyumba zenizi, ndipu anyaki ajambulisiyapu vithuzi. Munthukazi munyaki yo we ndi sitolu mumphepeti mwa msewu wakuluta ku RTO wanguzukuma ukongwa ndi ntchitu yo yagwirikanga mumaofesi ngenanga, mwakuti wangwamba kupeya pabwalu pa sitolu yaki kweniso kuyitowesa. Iyu wanguti, “Nde mumphepeti mwa msewu wakuluta ku nyumba yo yikuperekeka kwaku Chiuta.”

Yehova watumbika ukongwa phamphu la abali ndi azichi wo ateŵete mu ma RTO ngenanga. Titimuwonga ukongwa chifukwa chakuti watitiwovya kuti ntchitu yakufwatuliya yiyendengi umampha.—Salimo 127:1.