Pa 28 February 2021, Bayibolu la Charu Chifya la Malemba nga Chigiriki Ngachikhristu likutuzgika mu Chindau. Kutuzgika kwa Bayibolu lenili kwachitiska kuti Bayibolu la Charu Chifya lisaniriki losi lamphumphu pamwenga kachigaŵa kaki muvineneru 200. Kusazgiyapu yapa, pa 27 February, Kabayibolu kasonu kakuti Uthenga Wamampha wo Ukulembeka ndi Mateyu kakutuzgika mu Chichuabo.

Mabayibolu yanga ngakuŵerenge pa vipangizu va mazuŵa nganu ndipu Mubali Amaro Teixeira, wa mu Komiti ya Nthambi ku Mozambique ndiyu wangutuzga Mabayibolu ngenanga kuziya mu pulogilamu yo yinguchita kujambulika. Pulogilamu yeniyi yinguŵikika so pa TV ndipuso mawayilesi ngakupambanapambana. Kabayibolu kasonu ka Uthenga Wamampha wo Ukulembeka ndi Mateyu ko kakutuzgika muchineneru cha Chichuabo ke ndi mapeji 64, ndipu kasanirikengi so kakuchita kupulinta kuti kawovyi ŵanthu wo alivi vipangizu va mazuŵa nganu.

Ŵanthu pafufupi 1.4 miliyoni muchigaŵa cha Zambezia alongoro Chichuabo. Ndipu mu chigaŵa ichi mwe apharazgi akukwana 492 wo alongoro Chichuabo.

Mubali Nicholas Ahladis, yo wateŵete limoza ndi Dipatimenti Yakovya pa Ntchitu Yakufwatuliya yo ye ku likulu lidu lapacharu chosi wangukamba kuti: “Tafiska ntchitu yakukhumbika ukongwa yakutuzga buku la mu Bayibolu la Mateyu mu Chichuabo. Buku lo lengapu kali lenga lakusuzga kulisaniya kweniso kulivwisa.”

Ŵanthu pafufupi 1.1 miliyoni wo aja muchigaŵa chapakati ku Mozambique kusazgapu apharazgi 1,500 ndiwu alongoro Chindau.

Pa nyengu yo afwatuliyanga Bayibolu la chineneru cha Chindau akufwatuliya angukwaskika ndi masoka ngatatu ngakulungakulu. Mu 2019, Chimphepu cha Idai chingusakaza vinthu ku Mozambique. Mu 2020, nge mo vyaru vinandi pacharu chosi vingukwaskikiya ndi mulili wa COVID-19, charu cha Mozambique nachu chingukumana ndi masuzgu chifukwa cha mulili uwu. Ndipu kukwambiriya kwa chaka cha 2021, Chimphepu cha Eloise chingunanga so vinthu vinandi mucharu ichi. Kweni chinanga kuti angukumana ndi masuzgu ngosi ngenanga, akufwatuliya ankhondi angumaliza kufwatuliya Bayibolu ili mu vyaka viŵi ndi hafu.

Mubali munyaki yo wangugwiraku ntchitu yakufwatuliya wangukamba kuti: “Asani ndiŵanaŵaniya vo tafiska kuchita chinanga kuti takumana ndi masuzgu ngosi ngenanga, ndigomezga mbwenu cha kuti tikumaliza nadi kufwatuliya Bayibolu ili. Kwaku ini, ndiwona nge kuti vamunthondwi. Pakutija tatingi tifiskengi cha kugwira ntchitu yeniyi ndipu ndivu takhazanga cha. Unkhankhu wosi uluti kwaku Yehova.”

Mubali Ahladis wangulutirizga kukamba kuti: “Abali ŵidu wo alongoro Chindau kusazgapu akufwatuliya angukumana ndi masuzgu nganandi vo vinguchitiska kuti ntchitu yakufwatuliya Bayibolu yisweri kumala. Bayibolu ili la Malemba nga Chigiriki Ngachikhristu ndipusu ukongwa ndipu ndi mphasu yapade ukongwa kwa abali ndi azichi ŵidu. Ŵanthu wosi wo alongoro Chindau liŵachiskengi kweniso kuŵapembuzga.”

Mubali Geoffrey Jackson, wa mu Wupu Wakulongozga wangukamba kuti: “Wosi wo agwira ntchitu yakufwatuliya Bayibolu atijipereka ndipuso akunthiyapu masuzgu nganandi. Chinanga kuti wo afwatuliyanga Bayibolu la Malemba nga Chigiriki Ngachikhristu mu chineneru cha Chindau angukumana ndi masuzgu nganandi kusazgiyapu masoka nga chilengedu kweni chineneru ichi ntchanambala 200 kuŵa ndi Bayibolu la Charu Chifya. Tigomezga kuti Bayibolu ili ndi mphasu yapade ukongwa ku ŵanthu wo wosi wo alongoro Chindau ku Mozambique.”

Tikondwa nawu limoza abali ŵidu ŵenaŵa chifukwa chakutuzgika kwa Mabayibolu ngenanga munyengu yinu ya mulili. Kukamba uneneska, palivi cho chingamutondekeska Yehova kufiska khumbu laki.—Yesaya 43:13.