Pa 15 ndi 16 August, 2020, Bayibolu la Charu Chifya la Malemba nga Chigiriki Ngachikhristu likutuzgika kuziya pa vipangizu vamazuŵa nganu muchineneru cha Chichangana ndi Chimakuwa kwa apharazgi a ku Mozambique. Apharazgi akujumpha 8,000 alongoro Chichangana ndipu apharazgi akujumpha 1,700 alongoro Chimakuwa.

Mubali David Amorim, wa Mukomiti ya Nthambi ku Mozambique ndiyu wangukamba nkhani yakutuzga Mabayibolu yo yingukambika mwakuchita kujambula ndipu apharazgi anguwonere pulogilamu yeniyi. Kusazgiyapu yapa, abali ŵidu anguzomerezeka kuti awonere pulogilamu yeniyi kuziya pa TV kweniso kuvwisiya pa masitechoni nga wayilesi ngakujumpha 30.

Ŵanthu pafufupi 1.9 miliyoni muvigaŵa viŵi kumwera kwa Mozambique aŵereŵeta Chichangana. Chineneru ichi chiyananaku ndi chineneru cha Chitsonga, cho ŵanthu a ku South Africa alongoro.

Ŵanthu amtundu wa Chimakuwa aja kunkhondi kwa Mozambique. Ŵanthu pafufupi 5.8 miliyoni ndiwu aŵereŵeta chineneru cha Chimakuwa ndipu chineneru chenichi ndichu ŵanthu anandi alongoro ku Mozambique.

Kwa vyaka vinandi, venga vakusuzga kuti apharazgi wo alongoro chineneru chenichi aguli Bayibolu. Mabayibolu ngenga ngakudula ukongwa ndipu nyengu zinyaki akugulisa Mabayibolu akhumbanga cha kuti Akaboni aku Yehova agulengi Mabayibolu ngenanga. Wakufwatuliya munyaki wangukamba kuti: “Ndikuwonapu mipingu yinyaki yichigwiriskiya ntchitu Bayibolu limoza mu Nyumba ya Ufumu. Ndipu lagwiriskikiyanga ntchitu ndi ŵanthu wo ŵenga ndi vakuchitika pa maunganu.”

Tikondwa ukongwa ndi abali kweniso azichi ŵidu wo akulonde Bayibolu la Charu Chifya la Malemba nga Chigiriki Ngachikhristu muchineneru cha Chichangana ndi Chimakuwa. Tiziŵa kuti Mabayibolu ngenanga ngawovyengi ŵanthu anandi kuti “awuziŵi umampha uneneska.”—1 Timote 2:3, 4.