Pa 14 ndi 15 November 2020, Buku la mu Bayibolu la Uthenga Wamampha wo Ukulembeka ndi Mateyu likutuzgika pa intaneti mu Chigitonga ndi Chironga. Vineneru venivi vikambika kumwera kwa Mozambique. Kwa apharazgi 524 wo alongoro Chigitonga ndipuso apharazgi 1,911 wo alongoro Chironga kutuzgika kwa buku la mu Bayibolu lenili ndi mphasu yapanyengu yaki yakutuliya kwaku Yehova.

Mubali Amaro Teixeira wa mu Komiti ya Nthambi ya ku Mozambique, ndiyu wakutuzga buku lenili po wakamba nkhani yakuchita kujambula yo apharazgi anguwonere. Kusazgiyapu yapa, abali ŵidu anguŵazomereza kuwonesa pulogilamu yeniyi kuziya pa TV ndipuso kuvwisiya pa mawayilesi ngakupambanapambana. Buku la Mateyu lakupulinta la mapeji 64 liyambengi kusanirika chifukwa chakuti akuŵerenga anandi alivi vipangizu vasonu.

Mubali Teixeira wangukamba kuti: “Mabayibolu ndipuso mabuku nganandi ngo ngakonkhoska Bayibolu ngasanirika cha muvineneru venivi. Te akukondwa kuti te ndi Buku la Mateyu lo likonkhoska mbiri yaku Yesu ndipuso mo wakuwiya, upharazgi waki wakutchuka wa pa Phiri ndipuso mauchimi ngakukondwesa ngo wangukamba ngakukwaskana ndi mazuŵa ngakumaliya.”

Pakukamba vakukwaskana ndi kabuku kenaka ko kakufwatulika mwauneneska ndipuso kambula kusuzga kuvwisa, wakufwatuliya munyaki wangukamba kuti: “Fundu zo ze mu buku la Mateyu zakuzirwa ukongwa. Ndichita kuwona mumaŵanaŵanu akuŵerenga achituzga masozi chifukwa cha kuwonga kuti aŵerenga Upharazgi wa pa Phiri muchineneru cho chitiŵafika pamtima.”