Pa 29 October , 2023, Buku la Mateyu likutuzgika mu Chineneru cha Chichopi pa unganu wapade wo unguchitikiya ku Quissico, mucharu cha Mozambique. Mubali  Marcelo Santos, wa mu Komiti ya Nthambi ya Mozambique, wangutuzga buku la Mateyu lenili mu Chichopi pa unganu wo penga ŵanthu akukwana 460. Munthu weyosi yo wenga pa unganu wenuwu wangulonde Bayibolu laki lakusindikiza. Bayibolu la pa vipangizu va mazuŵa nganu kweniso la kuvwisiya nalu so lingwamba kusanirika kuti ŵanthu achiti dawunilodi.

Ŵanthu akukwana pafupifupi 1.1 miliyoni ndiwu alongoro chineneru cha Chichopi ndipu aja kuvigaŵa va kumwera va charu cha Mozambique. Abali ndi azichi akujumpha 332 ateŵete mumipingu 7 ya Chineneru cha Chichopi kweniso mu timagulu takukwana tinkhondi. Chinanga kuti Mabayibolu nganyaki nga Chineneru cha Chichopi ngalipu, kweni mu ma Bayibolu ngenanga mulivi zina laku Yehova. Kusazgiyapu yapa, ngakudula ukongwa kweniso Mabayibolu ngo, akungafwatuliya mwagwiriskiya ntchitu mazu ngakali, ngakusuzga kungavwa mazuŵa nganu.

Te akukondwa limoza ndi abali kweniso azichi ŵidu akwanjiwa wo alongoro Chichopi chifukwa cha kutuzgika kwa chinthu chakukondwesa chenichi. Ndipu tipemphera kuti liwovyi ŵanthu anandi wo akhumba kusisipulika ndi maji ngawuneneska ngo ngasanirika mu Mazu ngaku Chiuta.—Yesaya 55:1.