Pa 1 June, 2023, maofesi nganandi nga Beteli pacharu chosi ngakwamba kuzomereza kuti ŵanthu akawonengi malu. Venivi vachitika pavuli pakuti pajumpha vyaka vitatu kutuliya po kuwona malu kungulekeke dankha chifukwa cha muliri wa COVID-19. Lenga zuŵa lapade ukongwa ku ŵanthu wo ŵe mubanja la Beteli pacharu chosi kweniso ku ŵanthu masawuzandi wo anguza kuziwona malu.

Panyengu yo alendu afikanga, ateŵeti a pa Beteli anguŵatauzga apinga vikwangwani vo angulembapu kuti takulondiyani kweniso ambanga sumu, kuŵasekere ndi kuwahaga. Ellis Bott, yo wakwamba kuteŵete mu nyengu ya muliri ku likulu lidu lapacharu chosi ku Warwick, New York wangukamba kuti: “Chenga chinthu chakukondwesa ukongwa kuwona ateŵeti a pa Beteli ŵe pamalu ngakufikiya alendu, ŵe ndi vikwangwani vo angulembapu kuti takulondiyani! Ndinguwona kuti ŵanthu anandi ŵenga ndi masozi ngalikondwa ndipu venivi vingundikumbusa kuti Beteli ndi malu ngakuzirwa nadi.” Mzichi Alexis Alexander yo watende pa Beteli kwa mazuŵa ngamanavi pa sabata, wenga ndi likondwa likulu chifukwa wenga nawu mugulu lakutauzga ŵanthu kweniso kuŵalondere. Iyu wanguti: “Chenga chinthu chakuzirwa ukongwa kuwona chanju cho abali wenachu paku Yehova ndipuso nyumba Yaki.”

Mi-yeon Jo wangukondwa ukongwa kuti wanguza ndi mwana waki munthurumi Yoon wa vyaka 8, kuti waziwoni ofesi ya nthambi ku South Korea. Yoon wangukondwa ukongwa kuti wamuwona Beteli ndipu zuŵa lakuti mawa tamuwona malu, usiku wangugona cha. Mi-yeon wanguti: “Tati tayuka ŵaka, tingwamba kuvwisiya sumu yakuti Kalebe ndi Sofiya anguluta kuchiwona ku Beteli. Ndipu tichiluta ku nthambi, tavwisiyanga so sumu yeniyi mugalimotu yidu.” Yoon wangukondwa ukongwa kuchiwona malu ndipu wangukamba kuti: “Pa Beteli yeyosi pakhumbika waka nyama zakuti aseŵengi nazu ndipu asani zingaŵapu mbwenu pajengi paradayisu chayiyu.”

Mnyamata munyaki wa ku Alberta ku Canada zina laki Noah Johnsen watama matenda ngakunanga musana ndi minofu. Iyu wakhumbisisanga kuchiwona malu ku Beteli ya ku New York, USA. Chifukwa chakuti nthenda yaki yitimutondekesa kwenda pa ndegi, apapi ŵaki angumupinga pa galimotu yawu kuti wakawoni malu ku nthambi ya ku United States of America yo ye ku Wallkill, ku New York. Yiwu angwenda nayu ulendu wa makilomita pafufupi 4,100. Po waŵanaŵaniyanga za ulendu wenuwu, Noah wangukamba kuti: “Vosi vo ndikuwona, ndingavikonkhoska ŵaka ndi mazu ngamoza ngakuti, chanju. Ndikuwona kuti Yehova ndi abali atindiyanja ukongwa.”

Fyodor Zhitnikov yo we ndi vyaka 76 ndi muwolu waki Yulita, angukondwa ukongwa kuchiwona malu ngakusungiyaku vinthu vakali ku maofesi nga Beteli ku Kazakhstan. Chigaŵa chimoza cha malu ngenanga, akuŵikamu nkhani za abali ndi azichi anandi wo angukumana ndi masuzgu kwa vyaka vinandi kweni angulutirizga kuja akugomezeka. Fyodor watichiyanja ukongwa chigaŵa chenichi chifukwa anandi mwa abali ndi azichi ŵenaŵa, wanguteŵetiyapu nawu limoza. Fyodor wanguwonga ukongwa chifukwa cha ntchitu yikulu yo yikugwirika pakunozga nkhani zenizi. Iyu wangukamba kuti: “Asani abali akufiska kusunga vo tachitanga pakuteŵete Yehova kwa vyaka vosi ivi, kwe wuli Yehova! Ndikuti iyu wakumbuka chechosi cho tikuchita, ndipu wawonga weyosi waku isi pa ntchitu yo tikugwira.”

Ndisi akukondwa ukongwa kwamba so kulonde alendu ku maofesi ngosi nga Beteli pacharu chosi. Tilindizga kuzilonde so ŵanthu masawuzandi nganandi m’mazuŵa ngakunthazi ngo ngatuza!—Salimo 122:1.

Mumphata umu mwe vithuzi va abali ndi azichi wo anguza kuziwona malu ndipuso malu ngakusungiyaku vinthu vakali ku ma Beteli ngakupambanapambana.