Matenda nga koronavayirasi (COVID-19) ngasintha ukongwa maumoyu nga Akaboni aku Yehova. Yiwu atesesa kulondo fundu zo maboma ngajalikiska kweniso achita vosi vo angafiska kuti alutirizgi kusopa Yehova. Mu vyaru vo vakwaskika ukongwa ndi matenda yanga, abali ndi azichi alutirizga kupharazga munthowa zakupambanapambana.

Mubali munyaki ku Pisa mucharu cha Italy wangukamba kuti: “Vinthu vititiyende umampha ukongwa pa ntchitu yakupharazga! Pakuti ŵanthu anandi sonu asanirika panyumba zawu, ini ndi muwolu wangu tinguwona so manambala nga ŵanthu ngo tikuseva mufoni zidu, ndipu tingunozga kuti tikambiskani ndi ŵanthu anandi mwakugwiriskiya ntchitu videoconference. Te ndi masambiru nganandi nga Bayibolu kweniso maulendu ngakuweriyaku. Anyaki mbasonu penipo anyaki tikukambiskanapu nawu kali fundu za mu Bayibolu. Mwaviyo timaliya maora nganandi mu uteŵeti ndipu anandi tikambiskana nawu umampha ukongwa.”

Ku South Korea, matenda yanga ngachitiska kuti apharazgi agwiriskiyengi ntchitu ukongwa vigaŵa vinyaki va pa jw.org kweniso pa JW Library. Mwakuyeruzgiyapu, mubali munyaki wangulonde meseji kutuwa ku munthu yo wanguleka kusambira nayu Bayibolu vyaka vitatu vo vajumpha. Munthu mwenuyu wangukamba kuti matenda yanga ngamuchitiska kuti waŵanaŵaniyepu vakukwaskana ndi vinthu vo vilongo mazuŵa ngakumaliya. Mubali uyu wangugwiriskiya ntchitu nthowa yakutumiziyana vinthu (“Share Link”) ya pa JW Library kuti wamutumiziyi fundu zakukwaskana ndi mazuŵa ngakumaliya. Mubali uyu wangukonkhoska kuti “vakuchiska ukongwa kuwona kuti chisimikizu chenichi cha mazuŵa ngakumaliya chachitiska kuti ŵanthu anandi aje ndi mtima wakukhumba kuziŵa vinandi vakukwaskana ndi Chiuta ndipuso Bayibolu.”

Malipoti ngo tilonde kutuliya ku maofesi nga nthambi ngakupambanapambana ngalongo kuti abali ndi azichi anandi atanja uteŵeti. Ntchinthu chakukondwesa ukongwa kuwona kuti yiwu agwiriskiya ntchitu “zeru zakovya” kuti alutirizgi kupharazga uthenga wamampha.—Mika 6:9.