Akaboni aku Yehova azamuluwa cha upharazgi wapade wo unguchitika mu November 2020. Mulili wakofya unguchitisa kuti tanandi tijengi waka panyumba. Tinguleka dankha kupharazga mwakugwiriskiya ntchitu nthowa zinyaki zo titiziyanja ukongwa. Chinanga kuti ve viyo, Akaboni aku Yehova angufiska kuchita upharazgi wapade pacharu chosi kuti akambiyeku ŵanthu anyaki vakukwaskana ndi Ufumu waku Chiuta. Apharazgi anandi pacharu chosi anguŵikiyapu mtima ukongwa kuti agaŵiyi magazini nga Chigongwi cha Alinda Na. 2 2020 ku ŵanthu wo achita bizinesi, arara a boma, asambizi, mabwezi, achibali ndipuso ŵanthu anyaki wosi. Upharazgi wapade wenuwu unguwovya wosi wo ŵenga ndi mtima wakukhumbisiska kuvwisiya. Ŵanthu wosi wo angugwiraku ntchitu yeniyi anguchiskika so ukongwa.

Mumphata umu mwe vo vinguchitikiya abali ndi azichi ŵidu pacharu chosi kweniso ndemanga zawu:

Lucinda Furkin wa ku Australia yo we ndi vyaka 18 ndipu wabatizika pambula kuswera yapa wangulemba kuti: “Chinanga kuti liŵavu langu lenga umampha cha pa nyengu yo upharazgi wapade wenga mkati kweni ndawonanga kuti Yehova watindichiska, watindiko pajanja ndi kundipaska nthazi kuti ndilutirizgi kukunthiyapu.”

Da munyaki wa ku New Zealand wangukonkhoska mo upharazgi wapade uwu unguwovye banja laki, iyu wangukamba kuti: Te ndi ŵana anayi asungwana amanaamana avyaka 7, 9, 11 ndi 13. Tinguwona kuti upharazgi uwu yenga mphasu yakutuwa kwa Ada ŵidu achanju Yehova. Venivi vingwovya banja lidu kuti lilutirizgi kupharazga zuŵa lelosi, munyengu ya upharazgi wapade yeniyi.”

Kagiso ndi Lydia Marumo wo mbakuwonere dera, angutumiziya abali ŵawu wo mbakaboni cha magazini pa intaneti. Yiwu angulonde kwamuka kwakuchiska ukongwa kutuliya kwa abali ŵawu. Yumoza mwa abali aku Kagiso yo ndi dokotala wangukamba kuti magazini yeniyi yinguza pa nyengu yaki. Iyu wangukonkhoska kuti akutama anyaki ŵenga ndi mafumbu ngakukwaskana ndi Chiuta kweniso Bayibolu ndipu chinanga mbana ŵaki nawu achitangaku vinthu vakukwaskana ndi mizimu. Kagiso ndi Lydia angumumbiya foni mubali wawu mwenuyu ndipu angwamba kusambira Bayibolu mazulu nga zuŵa lenilo. Pasonu panu asambira kaŵi pasabata.”

Soroya Thompson, yo wachita upayiniya ndipu waja ku Ontario, wangulemba kuti: “Upharazgi wapade uwu wandiwovya kuti ndiŵikengi mtima pa vinthu vakukhumbika ukongwa ndipuso kuziŵa kuti peche ŵanthu anandi wo akhumbika kuti avwi uthenga waku Chiuta. Upharazgi uwu ungundikumbusa so kuti Yehova ngwachanju kweniso wenga ukaboni wakuti iyu wakhumbisiska kuti weyosi wazitaskiki. Asani ndakumbuka fundu yeniyi vandichitiskanga kuti ndiŵikiyengepu mtima pa upharazgi ukongwa munyengu ya upharazgi wade iyi.”

Mzichi munyaki wa ku British Columbia wangukamba kuti: “Pa nyengu yakusuzga ukongwa iyi, ndingusankha kuti ndichiteku upayiniya kwa kanyengu kuti ndileki kusuzgika ukongwa maŵanaŵanu. Venivi vingundiwovya kuti ndivwengi umampha ndipu vinguwovya so banja lidu.”

Ofesi ya nthambi ku Canada yingupereka lipoti lakuti upharazgi wapade uwu ungovya mabanja kuti ngaje ngakukoliyana. Ndipu vinguwovya so ŵana nawu kuti ajivwengi kuti mbakukhumbika ukongwa pa ntchitu yakupharazga chifukwa alembanga ŵija makalata ngapusu kweniso kovya pakulemba mazina pa nevulupu, kumata masitampu ndi ndikupenja ma adiresi.

Mubali ndi mzichi Tuomisto yo ngwakuwonere dera wangukamba kuti: “Mwezi wa November wenga wakusuzga ukongwa kunu kunkhondi. Mwaviyo, abali ndi azichi ukongwa apayiniya angukondwa ukongwa ndi upharazgi uwu. Unguŵawovya kuti aleki kusuzgika ukongwa maŵanaŵanu.”

Banja linyaki lati latumiza magazini ku munthu munyaki yo aziŵananga nayu, angulonde kalata yakuŵawonga. Mazu nganyaki ngo ngenga mukalata iyi ngenga ngakuti: “Musanawale, [ndaŵerenga buku la mu Bayibolu] la Yakobe. Buku ili likamba kuti chivwanu chambula ntchitu ntchakufwa. Nyengu zosi Akaboni aku Yehova aluta nyumba ndi nyumba kusambiza ŵanthu uthenga wa mu Bayibolu. Yiwu achita vinthu vo vitovya kuja ndi chivwanu chakukho.”

Ofesi ya nthambi ku Greece yingukamba kuti: “Mulili uwu wachitiska kuti ŵanthu akaniziki kuchita vinthu vinyaki kweniso kuti ajengi waka panyumba. Venivi vachitiska kuti ŵanthu anandi ajivwengi kuti mbakuvuka ukongwa. Mwaviyo, upharazgi wapade uwu wawovya ukongwa ŵanthu kuti achiskiki. Anandi akamba kuti upharazgi uwu waŵawovya ukongwa munyengu yakusuzga nge iyi.”

Mzichi Suzie Kontargiri wangusankha kuchitaku upayiniya wakanyengu chinanga kuti liŵavu laki leumampha viŵi cha kweniso mulumu waki ndi Kaboni cha. Iyu wangukamba kuti: “Upharazgi wapade uwu ungundiwovya kuti ndileki kusuzgika ukongwa maŵanaŵanu. Mulenji wewosi ndayukanga wakukondwa, kugwira ntchitu zangu, kubika, kumunoze chechosi mulumu wangu pakumaliya ndipu ndayambanga upharazgi. Kanandi mulumu wangu wandifumbanga kuti: ‘Kumbi userengi muuteŵeti musanawale?’ Wafumbanga viyo chifukwa wakuziŵiliya kundiwona ndichipharazga mwakukondwa ndi azichi anyaki.”

Mzichi Tamaki Hirota wangulembe arara a boma makalata, iyu ngulemba kuti: “Yehova ndiyu wenga wakwamba kugwiriskiya ntchitu makalata pakupharazga. Iyu wangulembe ŵanthu makalata 66 ndipu ŵanthu atingaŵerenga mwakuwerezawereza kwa vyaka vinandi kuti aje nayu pa ubwezi. Ndipu Yehova waziŵa kuti nthowa yeniyi njakovya ukongwa. Upharazgi wapade uwu wenga wambula kuluwika.”

Mzichi Meharaja Vijaya ndi Imayanathan Amutha mwangozi angulemba kalata ku adiresi yimoza. Mweneku wa nyumba wangutaya kalata yakwamba kwambula kujula kuti wawoni vo venga mukati. Mwamabuchibuchi wangusaniya kuti kwaza kalata yinyaki so yachiŵi. Munthu uyu wanguwona kuti mu makalata yanga mutenere kuti mwe uthenga wakukhumbika ukongwa chifukwa ngangutumizika kwa maulendu ngaŵi. Pavuli paki, wanguŵerenga magazini ngo ngenga mukati ndipu wangumbiya foni mzichi yo wangutumiza kalata yachiŵi ndipu wanguzomera kwamaba kusambira Bayibolu.

Mura wa boma munyaki wamumuzi wati walonde magazini wangumbiya foni ku ofesi ya nthambi ya ku Sri Lanka. Iyu wangukamba kuti wechendakumanepu ndi Akaboni aku Yehova chinanga kuti nayu ndi Mkhristu. Wati wakamba vinthu vinandi vamampha vakukwaskana ndi magazini yanga kweniso webusayiti yidu wangufumba kuti: “Kumbi ndingachita wuli kuti nani ndije Kaboni waku Yehova?” Mwambula kutaya nyengu abali angunozga ndondomeku yakuti munthu wakambiskani so nayu.

Mupharazgi munyaki wa vyaka 13 yo wasambira kusukulu yo atanja kukambiskana va ndali wangukonkhoska mo upharazgi wapade wenuwu wo unguchitika mu November ungumuwovye. Iyu wanguti: “Ungundiwovya kuti ndileki kuja ndi mantha asani ndikambiskana ndi asambizi chifukwa cho ndileke kusereliyamu mu vacharu. Ivi vinguwovya ukongwa chivwanu changu kuti chije chakukho.”

Mzichi Margit Haring nayu wajivwanga mwakuyanana waka. Iyu wangulemba kuti: “Upharazgi uwu ungundiwovya kuti ndije ndi chiganga kweniso phamphu. Ndati ndavwa waka pakwamba kuti tipharazgiyengi wo achita bizinesi ndi arara a boma, mantha ngangundiko ukongwa. Pakuti ndasambiriya limu kukonkhoska vo ndigomezga sonu, ndikayika cha kuti venivi vazakundiwovya kunthazi.”

Mura munyaki wangukamba kuti: “Ndingukwaskika ukongwa kuwona unandi wa ŵanthu wo anguchitaku upayiniya chinanga kuti maliŵavu ngawu ngakusinasina. Yiwu ŵenga ndi chifukwa chakuvwika chakuleke kuchitaku upharazgi uwu. Kweni yiwu angusankha kuchitaku upharazgi wapade wenuwu. Likondwa lo ŵenga nalu chifukwa chakuteŵete Yehova kweniso abali ŵawu vinguchitiska kuti weyosi wadili masozi.”

Pe vinthu vinandi ukongwa vo abali ndi azichi akamba pacharu chosi ndipu tingwakwanisa cha kukonkhoska vosi. Tingukondwa ukongwa kukambiyaku ŵanthu mamiliyoni nganandi uthenga wa Ufumu.—Yohane 15:11.