Mipingu yinandi pa charu chosi, yithemba vipangizu vasonu kweniso intaneti kuti yichitengi maunganu pa nyengu yinu ya mulili. Kweni anyaki mwa abali ŵidu aja mu vigaŵa va ku mizi ko intaneti njakusuzga. Yiwu atesesa kuchita vo angafiska kuti alutirizgi kuchita vinthu vauzimu pa nyengu iyi, uku alondo ulongozgi wa mo angajivikiliya ku mulili wa COVID-19. Wonani vakuyeruzgiyapu vimanavi waka va ku Africa.

Abali ndi azichi anandi alivi mwaŵi wakuti angagwiriskiya ntchitu intaneti, mwaviyo angafiska cha kugwiriskiya ntchitu Zoom. Sabata yeyosi, Ofesi ya Nthambi ku Malawi, yitumiza mavidiyo nga maunganu ku ŵara mu mipingu kuziya pa foni. Asani ŵara alonde maunganu yanga atingatumiza kwa abali ndi azichi mumpingu wawu.

Kweni nthowa yeniyi njakusuzga ku mpingu wa Tcharo wo we ndi apharazgi 28. Mpingu uwu we kunkhondi kwa charu cha Malawi, ndipu we ku chigaŵa cha mapiri kufupi ndi Nyanja ya Malawi. Chifukwa chakuti mapiri ngachitiska kuti netiweki yileki kufika ku chigaŵa ichi, mura mu mpingu wakhumbikanga kwenda mtunda utali kuti wakafiki pa malu po pe netiweki yanthazi. Asani wamaliza kupanga dawunilodi maunganu, wakhumbikanga so kwenda mtunda weniwuwa wangwenda wachiluta. Ndipu asani wafika kunyumba, wakhumbikanga so kwenda, kujumpha mu mapiri kuti wakafiki pa nyumba ya Kaboni weyosi kuti wakamupaski maunganu kuziya pa Bluetooth.

Kweni pambula kuswera yapa, ŵara angukondwa ukongwa ŵati aziŵa kuti angasaniya netiweki yanthazi pa Nyanja ya Malawi, yo yepafupi ndi ko kwe mpingu uwu. Pasonu panu, avuŵa waka watu kuluta pa nyanja kuti akapangi dawunilodi maunganu. Venivi vitovya kuti ŵara aleki kwenda mtunda utali.

Kuti “acheze” mipingu yo ye ku vigaŵa va kumizi, akuwonere madera wo ŵe kunkhondi chakumazulu kwa charu cha Mozambique, akamba nkhani zawu kuziya pa mafoni. Chifukwa chakuti mu chigaŵa ichi mulivi mwaŵi wakuti angambiya ŵanthu anandi pa foni yimoza, akuwonere madera akamba nkhani zawu uku aŵika mafoni nganandi pa thebulu. Mafoni ngenanga ambiya mabanja nga apharazgi akupambanapambana mu mpingu wo acheze.

Apharazgi anyaki aja ku vigaŵa va kumizi ukongwa ko kulivi netiweki. Asani ndi nyengu ya maunganu, abali ndi azichi atenda mtunda utali kweniso mudondu kuti akafiki po pe netiweki. Asani ayisaniya aja pasi ndi kuvwisiya maunganu.

Mubali Yohane Vinho, wakuwonere dera kuchigaŵa ichi, wangukamba kuti “abali ndi azichi anandi atesesa kuchita vo angafiska kuti ayanduwengi ndi maunganu,” ndipu venivi vitiŵawovya kuti alutirizgi kuja akukho mwauzimu chinanga kuti ŵe kutali ndi anyawu. Wakuwonere dera munyaki so zina laki Carlos Cortazão, wangukamba kuti: “Titijivwa nge kuti te ndi abali ndi azichi mu Nyumba ya Ufumu, timbiya limoza sumu kweniso kumukapu pa maunganu. Tiwona kuti Yehova walutirizga kuwovya ŵanthu ŵaki kulonde chakurya chauzimu pa nyengu iyi ya mulili.”—Yohane 21:17.