Apapi anandi wo Mbakaboni agwiriskiya ntchitu Nkhani za pa JW pakovya ŵana ŵawu kuti aje ndi chivwanu.

Mzichi Fumiko Takehara, wa ku Japan, waŵerenga ndi kukambiskana Nkhani za pa JW ndi mwana waki munthulumi wa vyaka 12 zina laki Naoki. Yiwu apulinta vithuzi va abali ndi azichi wo azumbulika mu nkhani yo aŵerenga ndipu ativiŵika pachimati. Fumiko wangukamba kuti: “Titiŵazumbuwa mu mapempheru ngidu weyosi pakuyija. Tichiskika ukongwa kuziŵa kuti Yehova watovya ŵanthu ŵaki kuja ndi likondwa chinanga angaŵa mujeri. Tiwona likondwa lo ŵenalu pa visku vawu. Chakuyeruzgiyapu chawu chamampha chamuwovya ukongwa mwana wangu kuja wakugomezgeka kwaku Yehova ku sukulu.”

Mubali Kilanko Zannou wa ku Côte d’Ivoire we ndi ŵana ŵaŵi, iyu wangukamba kuti: “Nditanja kuŵerenga Nkhani pa JW zuŵa lelosi.” Kanandi Kilanko watanja kugwiriskiya ntchitu nkhani zo waŵerenga, pa kusopa kwa pabanja. Iyu wawona kuti banja laki kusazgapu mwana waki wa vyaka 7 zina laki Matthias, asambira vinandi kutuliya kwa abali ndi azichi wo mwachiganga akunthiyapu chinanga kuti atombozgeka.

Matthias wenga ndi mantha kupharazgiya anyaki ku sukulu. Kilanko wangukamba kuti: “Tati tamaliza kusopa kwa pabanja, Matthias wangukamba kuti: ‘Ndichitengi so mantha cha sonu kupharazga!’”

Mubali Holmes Simatupang, wa ku Indonesia yo nayu we ndi ŵana, waŵerenge limoza ŵana ŵaki nkhani ziŵi zakukwaskana ndi achinyamata wo Mbakaboni ku Indonesia ŵeniwo angudikiskika ku sukulu chifukwa chakukana kugwadiya mbendera.

Mubali Simatupang wangukamba kuti: “Ŵana ŵidu ŵaŵi nawu akumana ndi mayeseru ngenanga kusukulu kwawu. Kanandi yiwu akunthiyapu asani asambizi ŵaŵu kweniso ŵana a sukulu anyawu atiŵachichizga kuti agwadiyi mbendera, ambi sumu ya fuku kweniso kuti achiteku nawu vinthu vinyaki vachisopa. Pa chifukwa chenichi, yiwu achitanga mantha kuluta kusukulu.”

Holmes wangulutirizga kukamba kuti: “Tati takambiskana nkhani ziŵi zo tinguŵerenga pa kusopa kwidu kwa pabanja, ŵana ŵidu achita so mantha cha kukonkhoske anyawu chifukwa cho aleka kugwadiya mbendera. Atopa so cha kuti panyaki aŵadikiskengi kusukulu.”

Mzichi Lady Nery Passos wa ku Brazil wangukamba kuti: “Pa nyengu yo mwana widu munthulumi zina laki Pedro, wenga ndi vyaka va pakati pa 5 ndi 6 pe, ku sukulu kwawu wakhumbikanga kukonkhoske anyaki chifukwa cho waleke kuchitaku nawu chikondwereru cha kukumbukiya zuŵa lakuwiya.” Kuti awovyi mwana wawu, Mzichi uyu wanguŵerenga nkhani za abali ndi azichi anandi pa JW wo angunozgeke limu ŵechendakumani ndi mayeseru. Iyu wangukamba kuti: “Pakusopa kwa pabanja tinguyesere mo wangachichitiya, venivi vingumuwovya ukongwa kuziŵa vo wangachita asani anyaki kusukulu akondwere zuŵa lakuwiya.” Tikayikiya cha kuti kuyesere kwenuku kungumuwovya Pedro kunozgeke limu mo wangakonkhoske vo wagomezga.

Nkhani za pa JW zititikumbusa mo Yehova wachiskiya kweniso kuwovye ateŵeti ŵaki akugomezgeka. Te ndi maukaboni nganandi ngo ngalongo kuti asani tingakumana ndi mayeseru, ‘tilutirizgengi kukondwa ukongwa ndipuso kuzazika ndi mzimu wakupaturika’ kuti tifiski kukunthiyapu.—Machitidu 13:50-52.