Pa Chinkhondi, pa 18 August 2023, Mubali José Luis Peña, wa mu Komiti ya Nthambi ya ku Central America, wangutuzga Bayibolu la Charu Chifya la Malemba Ngachigiriki Ngachikhristu mu chineneru cha Chikekichi. Bayibolu ili lingutuzgika pa zuŵa lakwamba la Unganu Wachigaŵa wa mutu wakuti “Zikirani”! wo unguchitikiya ku San Juan Chamelco, Alta Verapaz, ku Guatemala. Ŵanthu 590 wo anguwungana pa unganu uwu angulonde Bayibolu lenili. Kweniso ŵenga ndi mwaŵi wakuti angapanga dawunilodi pa vipangizu va mazuŵa nganu ndipuso lakuchita kuvwisiya. Chikekichi chikambika ndi ŵanthu akujumpha 1,300,000 ku Belize ndi ku Guatemala. Pasonu panu, abali ndi azichi anyaki akukwana 520 wo alongoro Chikekichi mu vyaru viŵi venivi ateŵete mu mipingu yakukwana 17 kweniso magulu 4.

Abali ndi azichi anyaki angukambapu mo Bayibolu lenili liwovyiyengi ŵanthu wo alongoro Chikekichi mu chigaŵa ichi, kuvwisa umampha ukongwa Mazu ngaku Yehova. Mzichi munyaki wangukamba chakuyeruzgiyapu chimoza. Iyu wangukamba kuti: “Pa lemba la 1 Timote 1:11, Bayibolu la Charu Chifya likamba kuti Yehova ndi ‘Chiuta walikondwa.’ Kweni mu ma Bayibolu nganyaki nga Chikekichi akumukonkhoska mu nthowa yeniyi cha Yehova. Sonu ndigwiriskiyengi ntchitu vesi lenili kuti ndikumbusi ŵanthu kuti kuziŵa Yehova kungatiwovya kuti tikondwengi chinanga mphanyengu yakusuzga.”

Tigomezga kuti Bayibolu lenili liwovyengi ŵanthu anandi a mtima wamampha wo alongoro Chikekichi kuti amuziŵi Yehova, kumuyanja kweniso kwanja Mazu ngaki.—Nthanthi 7:1, 2.