Pa 2 March 2024, Mubali Hideyuki Motoi, wa mukomiti ya Nthambi ku Australasia, wangutuzga buku la Mateyu mu Chineneru Chamanja cha ku Australia, cho chidanika so kuti Auslan. Pulogilamu yapade yakutuzga buku lenili yinguchitikiya mu Nyumba ya Ufumu ku Brisbane, Australia. Abali ndi azichi 159 anguwungana mu Nyumba ya Ufumu yeniyi. Kusazgapu yapa, abali ndi azichi 377 a ku Australia, New Zealand, ndi Samoa anguvwisiya pulogilamu yeniyi kuziya pa vidiyokoniferensi. Buku ili lingwamba kusanirika nyengu yeniyo pa jw.org kuti ŵanthu apangi dawunilodi ndipuso pa app ya JW Library Sign Language.

Ŵanthu pafufupi 20,000 wo aja ku Australia, New Zealand, Samoa, ndipuso Tonga agwiriskiya ntchitu Chineneru Chamanja cha ku Australia pamwenga chakukozganaku ndi chenichi. Akaboni aku Yehova angwamba kufwatuliya mabuku mu Chineneru Chamanja cha ku Australia mu 2001. Ndipu angwamba kufwatuliya kabuku kakuti Asani Munthu yo Mutanja Watayika. Mu April 2023 ofesi yakufwatuliyaku mabuku yingwamba kugwira ntchitu ku Brisbane. Mazuŵa nganu, abali ndi azichi 350 ateŵete mu mpingu wa chineneru chamanja ndipuso mu timagulu 18 ta muchigaŵa cha nthambi yawu.

Buku la Mateyu ndilu lakwamba kulifwatuliya mu Chineneru Chamanja cha ku Australia. Ŵati alonde buku lenili mzichi munyaki wangukamba kuti: “Mazu ngachanju kweniso ngalisungu ngo Yesu walongoronga pa Upharazgi waki wa pa Phiri ngangundikwaska ukongwa. Po ndawoneriyanga vidiyo mu Chineneru Chamanja cha ku Australia, venga nge kuti Yesu wakambiskana nani masu ndi masu!”

Mzichi munyaki wambula kulongoro yo wateŵete mu mpingu wa chineneru chamanja ku Brisbane wangukamba kuti: “Kulonde buku la Mateyu mu Chineneru Chamanja cha ku Australia kundiwovyengi kuti ndiyezgengi umampha mijalidu yaku Yesu kweniso kuti ndipharazgengi mwalusu. Nditimuwonga ukongwa Yehova!”

Te akukondwa ndi kutuzgika kwa buku la Mateyu mu Chineneru Chamanja cha ku Australia. Tigomezga kuti liwovyengi ŵanthu anandi kusaniya msewu umana wo ulongozge ku umoyu.—Mateyu 7:13, 14.