Mu 1923, Mubali George Young wangufika mu charu cha Brazil kuti wajalikiski ofesi ya nthambi kweniso kwambisa ntchitu yakupharazga. Wachifika mucharu chenichi, Chigongwi cha Mlinda chenga mu chingelezi pe, ndipu pa nyengu yeniyi chadanikanga kuti The Watch Tower and Herald of Christ’s Presence. Mubali Young mwaliŵi wangunozga vakuti Chigongwi cha Mlinda achifwatuliyengi mu Chiphwitikizi ndipu angulembera kampani ya kwenuku kuti isindikizengi magazini yeniyi. Mwaviyo, Chigongwi cha Mlinda chakwamba mu Chiphwitikizi chingwamba kusindikizika mu October 1923. Pati pajumpha vyaka vitatu, ofesi ya nthambi ya ku Brazil yingulonde machini ngakusindikiziya mabuku kutuliya ku Likulu la Akaboni aku Yehova ku Brooklyn, New York, U.S.A. Ndipu abali pa ofesi ya nthambi ku Brazil, angwamba kusindikiza wija magazini ngawu.

Mu 1925, pati pajumpha vyaka viŵi kutuliya po Chigongwi cha Mlinda chakwamba chingusindikizikiya mu Chiphwitikizi ku Brazil, abali a ku Portugal angwamba kufwatuliya Chigongwi cha Mlinda mu Chiphwitikizi cha ku Europe. Kweni mu 1933, Akaboni aku Yehova angwamba kutombozgeka boma la nkhaza lati layamba kulamuliya. Mwaviyo, ntchitu yakufwatuliya ku Portugal yinguma. Kwa vyaka vinandi pavuli paki, abali ndi azichi a ku Portugal agwiriskiyanga ntchitu Chigongwi cha Mlinda cho chasindikizikanga ku Brazil. Mzichi munyaki, zina laki Isabel, yo wajanga ku Portugal pa nyengu yeniyi wangukamba kuti: “Mumalu mwakuŵika mtima pa kupambana kwa Chiphwitikizi cha ku Brazil ndi cha ku Portugal ndaŵikanga ŵaka mtima pa fundu zo ze mu magazini yo. Nditiŵawonga ukongwa abali a ku Brazil chifukwa chakufwatuliya mabuku mu Chiphwitikizi pa nyengu kwenga kwakusuzga kuti isi tiŵi ndi mabuku mu chineneru chidu.”

Mu 1961, mabuku nga Bayibolu la Charu Chifya ngati ngasindikizika kuja buku limoza, gulu lidu linguzomereza kuti Bayibolu lenili lifwatulikiyi muvineneru 6, kusazgapu Chiphwitikizi. Chinanga kuti venga vakusuzga, timu yakufwatuliya Bayibolu ku Brazil, yakhumbanga kugwiriskiya ntchitu mazu ngakuti ŵanthu mu vyaru vosi vo alongoronga Chiphwitikizi angasuzgikanga cha kuvwa. Kwa vyaka vinandi achitanga so viyo asani afwatuliya Chigongwi cha Mlinda mu Chiphwitikizi. Kweni mu 2017, gulu laku Yehova linguzomereza kuti Chigongwi cha Mlinda chifwatulikiyengi mu Chiphwitikizi chaku Brazil ndipuso cha ku Portugal.

Mazuŵa nganu pacharu chosi chapasi pe apharazgi 1.2 miliyoni wo alongoro Chiphwitikizi ndipuso pe ŵanthu anyaki pafufupi 260 miliyoni wo angayanduwa ndi Chigongwi cha Mlinda mu chineneru chenichi. Tipempha kuti ŵanthu ŵenaŵa kweniso anyaki anandi pacharu chapasi alutirizgi kusambira “vinthu vikulu vaku Chiuta.”—Machitidu 2:11.