Pambula kuswera yapa, kuvuma kwa Africa kunguputa chimphepu cha Freddy. Chimphepu chenichi chinguto nyengu yitali kweniso chenga chechendachitikepu kwenuku. Chati chayamba kukwambiriya kwa mwezi wa February 2023, chimphepu ichi chingunanga vinthu mumalu nganandi. Pa 21 February, 2023, chingunanga vinthu ku Madagascar ndipu pavuli paki chingujumpha pakati pa Madagascar ndi Mozambique ndipu pati pajumpha mazuŵa chingufika ku Mozambique ndi Malawi. Chimphepu ichi chingulutirizga kukuwa ndipu chinguwereza so ku Mozambique pa 11 March, 2023. Vigaŵa vinandi ku Madagascar, Malawi ndi Mozambique vikukwaskika ndi chimphepu ichi. Mumalu ngenanga, maji ngangusapaliya chifukwa cha mphepu yanthazi kweniso vuwa yikulu ndipu nyumba zinandi zikunangika. Chifukwa cha venivi ŵanthu akujumpha 500 akufwa, kusazgapu abali ndi azichi ŵidu anandi. Ndipu ŵanthu masawuzandi nganandi akusama munyumba zawu.

Kufika pa 27 March, 2023, talonde chiŵerengeru cho che mumphata umu. Chenichi ntchiŵerengeru chakusimikizika cho abali akwenuku atitumiziya. Kweni chiŵerengeru chenichi chingakwera ukongwa chifukwa abali ŵeche kufufuza unandi wa vinthu vo vanangika kweniso ŵanthu wo akwaskika mumalu ngakusuzga kufikaku.

Madagascar

• Apharazgi 256 ndi ŵanthu anyaki a mubanja lawu akusama munyumba zawu

• Nyumba 8 zikunangikiya limu

• Nyumba 29 zikunangika

• Nyumba za Ufumu zitatu zikunangika

Malawi

• Vachitima kuti apharazgi 8 akufwa ndipu anyaki 6 awoneka cha

• Apharazgi atatu akupwetekeka

• Apharazgi pafufupi 4,300 ndi ŵanthu anyaki a mubanja lawu akusama munyumba zawu

• Nyumba 821 zikunangikiya limu

• Nyumba 174 zikunangika

• Nyumba za Ufumu 20 zikunangika

Mozambique

• Vachitima kuti mupharazgi yumoza wakufwa ndipu munyaki wawoneka cha

• Apharazgi 880 ndi ŵanthu anyaki a mubanja lawu akusama mu nyumba zawu

• Nyumba 248 zikunangikiya limu

• Nyumba 185 zikunangika

• Nyumba za Ufumu 7 zikunangika

• Malu nganandi ngo ngakukwaskika abali ŵechendafikeku

• Makomiti Ngakovya pa Masoka ngapereka pakuja, chakurya, maji kweniso vinthu vinyaki vakukhumbika ku ŵanthu wo akwaskika

• Ku Mozambique, muchigaŵa cha Gaza angupanga msasa kuti apharazgi 167 ndi ŵanthu a mubanja lawu wo anguthaŵiya ku Malu nga Unganu ajengemu. Ndipu apharazgi anyaki anandi aja mu Nyumba za Ufumu kweniso nyumba zinyaki muchigaŵa chenichi

• Nyumba pafufupi 16 zanozgekapu kali

• Abali a mu Komiti ya Nthambi, akuwonere madera kweniso ŵara a muvigaŵa venivi aluta ku mabanja ngenanga kuti aziŵi vinthu vo akhumbika kweniso atiŵachiska

Chinanga kuti akumana ndi masuzgu ngenanga, kweni abali ndi azichi ŵenaŵa achita maunganu asani mphakwenere kweniso achiskana. Tigomezga kuti Yehova waŵapaskengi “nthazi yakujumpha yo tituŵa nayu” kuti akunthiyepu.—2 Akorinto 4:7.