Kuphara kali, chaka cha uteŵeti cha 2020 chenga kwamba kwa ntchitu yikulu ukongwa yakupereka chovyu yo gulu lidu lichita pacharu chosi. Makomiti ngakujumpha 950 Ngakovya pa Masoka (DRCs) ngangupangika pacharu chosi. Kusazgiyapu pa mulili wa COVID-19, mu chaka cha 2020 munguchitika vinthu vinandi kusazgapu masoka ngachilengedu. Makomiti Ngakovya pa Masoka ngasuzgikanga kuti ngakapereki chovyu kwa abali ndi azichi ŵidu chifukwa akhumbikanga kulondo ulongozgi wa mo angajivikiriya ku COVID-19. Abali ndi azichi wo angugwiraku ntchitu yakupereka chovyu, angukamba kuti ntchitu yeniyi yaŵawovya kuja ndi chivwanu chanthazi. Wonani vinyaki mwa vinthu vo vingukwaska abali ndi azichi ŵidu:

Mu chaka cha uteŵeti cha 2020 munguchitika vimphepu vanthazi vakukwana 126 vo vingukwaska abali ndi azichi ŵidu. Chiŵerengeru ichi chenga chikulu ukongwa ndipu chingusazgikiyaku ndi 11.5 peresenti kuyeruzgiya ndi chaka cha uteŵeti cha 2019. Vinandi mwa vimphepu venivi vinguchitiska kuti maji ngasapaliyi pamwenga charu chigumuki.

Mwakuyeruzgiyapu, vimphepu vinandi vo vinguchitika ku Philippines, vinguchitiska kuti apharazgi anandi asami mu nyumba zawu.

Vuwa yanthazi ku Nigeria yikunanga mbewu zinandi za abali ŵidu.

Ku South Korea vinthu vinandi vikunangika chifukwa cha vuwa yambula kukata.

Mu vyaru vinandi munguchitika motu wakofya ukongwa kuphara kali wo ukotcha vinthu vinandi.

Mwakuyeruzgiyapu, anyaki mwa abali ŵidu akukwaskika ndi motu wakofya wo unguwotcha malu mahekitala nganandi ukongwa.

Venivi ndivu vinguchitika ku United States.

Abali ŵidu ku Australia nawu akukwaskika ndi motu.

Masoka yanga ngati ngachitika, gulu lingupereka ulongozgi kuti abali ndi azichi wo agwiraku ntchitu yakupereka chovyu kweniso wo alonde chovyu alutirizgi kuja akuvikilirika.

Mubali Han Chan-hee yo wawovyananga ndi Komiti Yakovya pa Masoka ku South Korea, wangukonkhoska vo abali ndi azichi achitanga kuti avikiliriki. Iyu wangukamba kuti: “Mlenji wewosi, weyosi tamupimanga dankha kufunda kwa liŵavu, nyengu zosi tajanga patalipatali, tenga ndi ŵanthu amanavi wo tagwiranga nawu ntchitu ndipuso takumananga cha kuti tichezengi kwali mphachakurya ndipuso pa nyengu yakupumuwa. Kusazgiyapu yapa, chinthu cho weyosi wagwiriskiya ntchitu wakhumbikanga kuchipuputa ndi munkhwala wechendayambi kuchigwiriskiya ntchitu ndipuso asani wamaliza.”

Anyaki mwa abali ŵidu angusama munyumba zawu pamwenga zingunangiya limu. Mubali Chris Shirah wa ku United States yo wawovyananga ndi Komiti Yakovya pa Masoka ku California, pa nyengu yo kwenga motu wangukamba kuti: “Tawonesesanga kuti munyumba yimoza mungajanga ŵanthu anandi ukongwa cha kuti tilondo ulongozgi wa mo tingajivikiliya ku COVID-19.”

Mu malu nganandi, abali alondonga ulongozgi wa mo angajivikiriya ku mulili ndipu venivi vinguchitiska kuti paje ŵanthu amanavi waka akugwira ntchitu yakupereka chovyu. Mubali  Philips Akinduro yo wawovyananga ndi Komiti Yakovya pa Masoka ku Nigeria wangukamba kuti: “Suzgu yikulu yo tingukumana nayu yenga yakuti boma lingukaniza ŵanthu kwendakwenda. Mwaviyo chenga chipusu cha kuti tisaniyi ŵanthu akujipereka.”

Mubali Kim Joon-hyeong yo wawovyananga ndi Komiti Yakovya pa Masoka ku South Korea, wangukamba kuti ŵanthu wo agwiranga ntchitu yakupereka chovyu ŵenga ndi maŵanaŵanu ngamampha ukongwa. Iyu wanguti: “Tagwiranga ntchitu iyi chifukwa chakwanja Chiuta kweniso abali ndi azichi ŵidu. Mwaviyo, nyengu zosi po tagwiranga ntchitu yidu tawonesesanga kuti weyosi waje wakuvikilirika. Chinanga kuti talondiyanga ulongozgi wakusazgiyapu, kweni talutirizganga kuja akukondwa ndi ntchitu yidu.”

Chifukwa chakuti ntchitu yakupereka chovyu yayendanga umampha, vinguwovya kuti weyosi yo wangugwiraku ntchitu iyi wamuthembengi ukongwa Yehova kweniso kuti waje ndi chivwanu chanthazi.

Mwakuyeruzgiyapu, Mubali Han waziŵanga cha asani pa maora 24 Komiti Yakovya pa Masoka yingafiska kusaniya abali akujipereka kuti agwiri ntchitu yakupereka chovyu. Iyu wangukamba kuti: “Pati pajumpha waka maora ngamanavi, ndinguwamu kuti palivi chifukwa chakufipiya mtima. Tingusaniya kuti abali ndi azichi anandi mucharu chidu chosi ajipereka kugwira ntchitu iyi. Penga abali ndi azichi anandi ukongwa mwakuti anyaki tinguchita kuŵakaniza. Ndinguziŵa kuti Yehova wenasi ndipu venivi venga vakuchiska ukongwa.”

Mwakuyanana waka, Mubali Brad Benner wa ku Honduras nayu wangukonkhoska mo wanguvwiya wati wagwiraku ntchitu yakupereka chovyu. Iyu wanguti: “Chinanga kuti yenga nyengu yakusuzga, kweni abali ndi azichi ŵidu wo ŵengavi pakugona angulonde chakurya, angusaniya malu ngakugona, ndipuso anguchiskika ukongwa mwauzimu. Ndajiwone ndija kuti vimphepu viŵi va hurricane kweniso mulili wa COVID-19 vingatimbanyizga cha chanju cho gulu lidu le nachu.”

Mubali Alquin Dayag yo wawovyananga ndi Komiti Yakovya pa Masoka ku Philippines, wangumaliza ndi fundu yakuti: “Vinthu vosi vo takumana navu, vandichitiska kuti ndigomezgengi ukongwa kuti Yehova watitipaska nthazi yakujumpha yo tituŵa nayu kweniso zeru zo tikhumbika kuti tifiski kugwira ntchitu.”—2 Akorinto 4:7.

Tiwonga ukongwa phamphu lo maofesi nga nthambi, Makomiti Ngakovya pa Masoka ndipuso abali ndi azichi anandi ŵenalu pa ntchitu yakupereka chovyu. Ntchitu zawu za chanju kweniso mzimu wakupaska, vawovya ukongwa pa ntchitu yakupereka chovyu mu chaka cho kwachitika masoka nganandi ngachilengedu kuphara kali.—1 Atesalonika 1:3