Chifukwa cha mulili wa COVID 19, mu chaka cha uteŵeti cha 2021, Sukulu za Uteŵeti wa Upayiniya zinguchitika kuziya pa vidiyokonferensi. Yaka kenga kakwamba kuti sukulu izi zichitiki munthowa yeniyi.Chifukwa cha kuwonga gulu laku Yehova, abali ndi azichi wo angusere sukulu izi anguchita vosi vo angafiska kuti asanirikepu. Wonani mo Yehova wanguwovye anyaki mwa apayiniya yaŵa kuti amalani ndi masuzgu ngo angukumana nangu ndi chilatu chakuti asere sukulu izi.

Mzichi Mieko Yoshinari wa ku Japan wateŵete nge mpayiniya wa nyengu zosi kwa vyaka 30. (Wonani chithuzi chakwamba.) Chinanga kuti wasuzgika kugwiriskiya ntchitu vipangizu va mazuŵa nganu kweniso walereska umampha cha, kweni wangusimikiza mtima kuti wasere sukulu ya upayiniya kuziya pa vidiyonkoferensi. Iyu wangukamba kuti: “Ndanozgekiyanga limu ndemanga zo ndikhumba kuchimuka ndipu ndazilembanga pamalu nganyaki mu vilembu vikuluvikulu kuti nkhaleki kusuzgika kuŵerenga. Yehova wangundichiska ndipuso wangundipaska nthazi kuziya mu sukulu ya upayiniya.”

Mzichi Anita Kariuki, yo waja ku Thika, tawuni yo ye kufupi ndi Nairobi, ku Kenya, wagwira ntchitu yakunozga ŵanthu kuti awonekengi umampha uku wachita upayiniya. Kuti wasanirikepu pa sukulu iyi, iyu wakhumbikanga kujala dankha bizinesi yaki kwa sabata yamphumphu. Anita wafipanga mtima, kweni wanguthemba Yehova kuti wamuwovyengi. Iyu wangukamba kuti: “Ndingupempha waka Yehova kuti wandiwovyi ndipu vosi ndinguvisiya mumanja mwaki. Ndingulutirizga kuchita uteŵeti wangu.” Kukumaliya kwa sabata sukulu yechendayambi, wangusaniya ndalama zakukwana kulipiriya vinthu vakukhumbika. Chinanga kuti ndalama yo wangusaniya yapereŵeranga ndi madola 30 nga ku America, kweni wangujala mbwenu bizinesi yaki kuti wasere sukulu. Ŵati amaliza masambiru nga pa zuŵa Lachitatu, munthu munyaki yo wangubwereka ndalama kwaku Anita wangumumbiya foni kuti wakhumba kumupaska ndalama yaki. Ndalama iyi yenga yakukwana pa ndalama yo yapereŵeranga kuti waguliyi vakukhumbika.

Nyumba ya Mzichi Laurenth Madrigales yo waja mutawuni ya Yoro, ku Honduras, yinguzaza ndi ulambwi, maji ngati ngasapaliya chifukwa cha chivuwa kweniso chimphepu cha Hurricane Eta ndi Hurricane Iota. Venivi vinguchitiska kuti Mzichi Laurenth ndi banja laki, asami munyumba yawu ndipu palivi cho angutaskapu. Pa nyengu iyi, ndipu Mzichi uyu wadanika waka kuti wasere sukulu ya upayiniya. Mbuneneska kuti wangukondwa kudanika kuti wasere sukulu, kweni wafipanga mtima kuti wamuja pani asani sukulu yayamba chifukwa banja laki latingi lifiskengi cha kunozga nyumba yawu kweniso kukalatuwa vimaulambwi. Laurenth wangukamba kuti: “Tingwamba ntchitu yakutowesa ndipu tayukanga mlenjilenji mpaka usiku. Tinguchita venivi kwa mazuŵa nganandiku. Ndingufika pakuvuka nayu ntchitu iyi. Ndinguwona kuti ndilivi nthazi kuti ndinozgeke sukulu iyi ndipu ndinguŵakambiya abali kuti ndingafiska cha kusere sukulu.” Iyu wangupemphera kwaku Yehova ndipu wangumukambiya mo wavwiyanga pa nyengu iyi. Kwati kwaja waka mazuŵa ngamanavi kuti sukulu yiyambi, wanguzizwa ukongwa wati wawona abali a mu Komiti Yakovya pa Masoka, ŵaza kuti amuwovyi kutowesa nyumba yaki. Venivi vinguwovya kuti waje ndi nyengu yakunozgeke sukulu kweniso wasere sukulu iyi we panyumba yaki.

Mubali Spencer Stash ndi muwolu waki Alexandra mbapayiniya a nyengu zosi ku Cleveland, Ohio, ku United States. Sukulu yechendayambi, awisi aku Spencer, a Robert wo ŵengavi awolu ŵawu anguŵagoneka kuchipatala. Spencer ndi muwolu waki aziŵanga cha asani angasere sukulu ya upayiniya. Awisi anguŵachiska kuti akasere sukulu iyi. Kweni ntchachitima kuti kwati kwaja waka mazuŵa ngaŵi kuti sukulu yiyambi, awisi aku Spencer angutayika. Chinanga kuti ŵenga ndi chitima pa nyengu iyi, kweni Spencer ndi muwolu waki Alexandra angujomba waka zuŵa limoza la sukulu iyi. Yiwu angupemphera kwaku Yehova ndipu iyu wanguŵapaska nthazi kuti afiski kusere sukulu. Spencer wangukamba kuti ŵenga ndi chimangu cha mumtima pakuziŵa kuti anguvwiya vo awusewu akhumbanga. Iyu wangukamba so kuti: “Tilindizga nyengu yo tazakuŵakambiya ada kuti tingusere sukulu kweniso tazakuŵakonkhoske vo tingusambira pa sukulu iyi. Abali ndi azichi wo tingusere nawu sukulu iyi kweniso alangizi ŵidu angutiwovya ukongwa.”

Mubali Jung Dae-sik wa ku South Korea waja kumalu ngakusungiyaku ŵanthu akukota ndipu waja kumalu yanga kwa vyaka vakujumpha 10. Iyu wagwiriskiya ntchitu njinga ya ŵanthu akupunduka kutuwa waka po wakuchitiya sitiroku. Iyu watingi waserengi kilasi la sukulu zo zajumpha, kweni chifukwa cha matenda ngo wenangu wangutondeka. Wati wadanika kuti wasere sukulu ya chaka chinu, iyu wangukondwa ukondwa. Iyu wangukamba kuti: “Ndingukondwa ukongwa mpaka kutuza masozi ndati ndavwa kuti kuŵengi sukulu kuziya pa vidiyokonferensi. Kukaŵengevi nthowa yeniyi, ndikuti chaka chinu nachu yatingi yindipambengi. Ndingukondwa ukongwa kuti nani ndiserengi sukulu iyi chaka chinu.”

Mubali Eddy El Bayeh ndi muwolu waki Cherise, aja ku New South Wales, ku Australia. Cherise wangukamba kuti: “Ndawonanga kuti ndalutanga panthazi cha mu uteŵeti. Mbuneneska kuti ndenga ndi ndondomeku yakulutiya mu uteŵeti, kweni ndaziŵanga cha vo ndingachita kuti ndisazgiyeku lusu langu.” Kweni sukulu ya upayiniya yingumuwovya ukongwa. Iyu wangukamba kuti: “Ndinguwona kuti pe vinthu vinandi vo ndingachita kuti ndisazgiyeku lusu langu mu uteŵeti, chinanga kuti ndingachita vinandi cha pa nyengu yinu yasonu.”

Eddy wangukonkhoska mo sukulu yingumuwovye. Iyu wangukamba kuti: “Vo tingusambira pa sukulu iyi venga nge kuti Fumu Yikulu yandihaga ndikundikambiya kuti: ‘Lutirizga! Nde nawi, nditikuyanja ukongwa ndipu ndikuphweriyengi!’”

Chaka chinu, pe makilasi nganandi nga sukulu ya upayiniya ngo nganozgeka kuti ngachitiki kuziya pa vidiyokonferensi. Tikondwa ukongwa kuwona kuti Yehova walutirizga kusambiza ŵanthu ŵaki chinanga kuti te mu nyengu yakusuzga. Venivi vititikumbusa mazu ngo Yobu wangukamba ngakuti: “Awonani! Chiuta wakwezeka chifukwa cha nthazi zaki; kumbi ndi msambizi nuyu yo wangayanana nayu?”—Yobu 36:22.

Vithuzi vo ve mumphata vilongo alangizi kweniso abali ndi azichi mu vyaru vinyaki wo nawu angusere sukulu ya upayiniya kuziya pa vidiyokonferensi.