Pa 13 July 2021, Khoti Lakuwona va Wanangwa wa Ŵanthu ku Europe likuyeruzga mwakumiya Mubali Rostom Aslanian pa mulandu wakukwaskana ndi charu cha Moldova ndi Russia. Mubali Aslanian wangukamba kuti khoti la Transnistria (Pridnestrovskaia Moldavskaia Republic) lingumunangiya pakumujaliya mujeri chifukwa chakukana kusere usilikali chifukwa cha vo wagomezga. Cheruzgu chenichi chiwovyengi ukongwa pakujalikisa wanangwa wakusopa ku Transnistria.

Charu chapasi chiziŵa kuti Transnistria ntchigaŵa cha charu cha Moldova, kweni charu cha Russia ndichu chiwonere ndondomeku yakuvikiriya chigaŵa chenichi. Vyaru vosi venivi ve mu wupu wa European Convention on Human Rights ndipu vitenere kutumbika wanangwa wa njuŵi.

Mu 2010, Mubali Aslanian angumukambiya kuti wasere usilikali kweni wangupempha kuti amupaski ntchitu yinyaki chifukwa cha fundu za mu Bayibolu zo wagomezga. Pa 29 March 2011, angukana vo wangupempha ndipu angumusaniya kuti ngwakunanga kweniso angumuyeruzga kuti wakaje mujeri kwa chaka chimoza. Mubali Aslanian wakumaliza vyaka vo angumulangiya kweni mulandu waki anguwulutisa ku Khoti Lakuwona va Wanangwa wa Ŵanthu ku Europe.

Po khoti la ECHR layeruzganga, lingukambapu vakukwaskana ndi milandu yakuvuli ndipu lingukamba kuti pengavi chifukwa chakuti amangi Mubali Aslanian chifukwa chakukana kusere usilikalli chifukwa cha njuŵi yaki. Khoti likusaniya kuti charu cha Russia ndichu che ndi nthazi ku Transnistria pankhani za usilikali, za chuma ndipuso ndali. Mwaviyo, charu cha Russia ndichu che ndi mulandu wakumanga Mubali Aslanian, charu cha Moldova cha. Khoti la ECHR lingumaliza ndikuti arara a boma amuphwanyiyanga wanangwa wakusopa Mubali Aslanian pakumuyeruzga kuti waje mujeri kwa chaka chifukwa chakukana kusere usilikali ndipu angukamba kuti boma la Russia lipereki ndalama zachipepesu kwa mubali uyu chifukwa chakumujaliya mujeri kwa chaka.

Te akukondwa chifukwa cha vo khoti layeruzga kwa abali ŵidu ku Transnistria. Te akusimikiza kuti Yehova walutirizengi kulongo chanju chambula kumala ku ŵanthu ŵaki ndipuso kuti waŵawovyengi asani atombozgeka.—Salimo 18:25.