Pa 29 March 2021, Khoti la muchigaŵa cha Gagarinskiy mutawuni ya Sevastopol, ku Crimea, likukamba kuti Mubali Viktor Stashevskiy we ndi mlandu ndipu likumuyeruzga kuti wakaje mujeri kwa vyaka 6 ndi hafu. Khoti lati layeruzga waka venivi, nyengu yeniyo Viktor angumuto ndi kuchimujaliya mujeri. Iyu wapangengi apilu cheruzgu chenichi.

Viktor Stashevskiy

• Chaka cho Wakuwiya: 1966 (ku Kansk, muchigaŵa cha Krasnoyarsk, ku Russia)

• Mo Wakukuliya: Wangusamiya ku Sevastopol, ku Crimea, mu 1983. Wagwiranga ntchitu mu sitima ya m’maji ya asilikali ndipu wakuleka ntchitu iyi mu 1993. Wakutolana ndi muwolu waki Larisa, mu 2002. Ŵe ndi ŵana ŵaŵi anthukazi. Nyengu zosi wakondwa ndi mo nyenyezi kweniso mapulaneti ngakuŵikikiya mwandondomeku ndipu wakhumbanga kuziŵa Mulengi. Kusambira Bayibolu kwamuwovya kuja ndi umoyu wamampha. Wakubatizika nge yumoza wa Akaboni aku Yehova mu 2004

Pa 4 June 2019, gulu la apolisi la Federal Security Service (FSB) linguchifufuza mu nyumba 10 za Akaboni aku Yehova ku Sevastopol. Nyumba zinyaki anguzifufuza kwa maola nganayi. Pa nyengu yosi yeniyi, apolisi yaŵa aŵazomerezanga cha abali kweniso mabanja ngawu kumwa maji pamwenga kuluta kuchimbuzi. Kweniso aŵawofyezanga, aŵakambiyanga kuti aphwanyengi katundu wawu ndipuso aŵikanga munkhwala wakutimbanyizga wongu mu nyumba za abali ŵenaŵa ndi chilatu chakuti aŵambi mulandu.

Ŵati amaliza kufufuza, Mubali Viktor Stashevskiy angumumanga ndipu wanguchigona mujeri. Iyu angumumba mulandu wakuti “ndiyu mulongozgi wa gulu lakofya.” Kweni uneneska ngwakuti mubali uyu atimumba mulandu chifukwa cha vo wagomezga vo viwoneke limu kuti atimuswiya wanangwa waki.

Mubali Viktor wangukamba kuti kuŵerenga Bayibolu nyengu zosi ndi kuŵanaŵaniya vo waŵerenga kwamuwovya kuja ndi chiganga ndipuso kukunthiyapu mwalikondwa. Iyu wachiskika ndi mazu ngo Fumu Davidi wangukamba pa Salimo 62:5-8. Pa mayeseru ngaki ngosi, Viktor wangukamba kuti: “Ubwezi wangu ndi Yehova ukho ukongwa chifukwa nyengu zosi waja nani pafupi kuphara munthu weyosi. Ndikayikiya cha kuti Yehova wawona masuzgu ngangu kweniso waziŵa kuti ndikhumba kulutirizga kuja wakugomezgeka kwaku iyu, ndipu pachifukwa chenichi, pa nyengu yaki yakwenere, wandivikiliyengi chifukwa cha zina laki likulu.”

Tiziŵa kuti Yehova wamuwovyengi kweniso kumutumbika Mubali Viktor, banja laki kweniso abali ndi azichi wosi wo akunthiyapu kutombozgeka. Yehova walutirizgengi kuja malu ngawu ngakuthaŵiyaku ndipuso malu ngawu ngakuvikilirika.—Salimo 91:2.