Chifukwa chakuti akukota ndiwu ŵe pa ngozi ukongwa asani angakoleka ndi koronavayilasi, vakukondweska kuwona kuti atesesa kulondo vo a zaumoyu akamba ndipu atenda cha, aja ŵaka pa nyumba zawu. Chinanga kuti ve viyo yiwu atijivwa kuti ŵe ŵija cha, ndipu achita vinandi. Yiwu agwiriskiya ntchitu vipangizu vakupambanapambana va mazuŵa nganu kuti achitengi maunganu kweniso kuti apharazgengi.

Ku Rome, mucharu cha Italy, kwe mzichi munyaki wakukota wa vyaka 94 mweniyo wakuleka kali kwenda, matenda nga koronavayilasi ngechendabuki. Chinanga kuti mzichi uyu wawoneriyanga maunganu pa JW Stream, kweni pajumpha nyengu yitali kutuliya po wakuwunganapu ndi mpingu waki. Kweni sonu, ŵara a mpingu waki akunozga ndondomeku yakuti achitengi maunganu mwakugwiriskiya ntchitu videoconference. Venivi vitovya mzichi uyu kuti waŵawonengi abali ndi azichi wosi a mumpingu waki ndi kuchita nawu maunganu.

Ku Spanish Fork, Utah, mucharu cha U.S.A., kuja Mzichi Stephanie Aitken, yo ngwambuwu kweniso waja kumalu ngo asungiyaku ŵanthu akukota. Mazuŵa nganu, kumalu yanga akaniza ŵanthu kuzaku kuziwona ŵanthu. Mura munyaki wa mumpingu wawu limoza ndi muwolu waki anguwovya mzichi uyu kuti waŵiki pulogiramu yakupangiya videoconference. Yiwu anguchita venivi mwakugwiriskiya ntchitu chineneru chamanja ndipu anguma kubwalu kwa chisasa chagilasi cha kumalu ngo kwe mzichi uyu. Mzichi Aitken wati wamaliza kuŵika pulogilamu yeniyi umamphaumampha mutabuleti yaki wanguyivumbatiya. Sonu mzichi uyu wakondwa ukongwa kuti wachitiya vinthu limoza ndi mpingu waki.

Pa nyengu yinu yo nthenda yeniyi yapalaka, abali ndi azichi pacharu chosi agwiriskiya ntchitu vipangizu va mazuŵa nganu kuti achitengi vinthu vauzimu. Venivi vititikumbusa vo Yehova wangukambiya limu kuti ŵanthu ŵaki azamugwiriskiya ntchitu mwazeru “mkaka wa mitundu.” (Yesaya 60:16) Tiziŵa kuti Yehova wajengi chechosi cho wakhumba kuti wawovyi ateŵeti ŵaki pacharu chosi pa nyengu ya suzgu.