Chikumbusu cha nyifwa yaku Khristu cha 2020 chenga chapade ukongwa mu mbiri yidu. Mwakuyeruzgiyapu, pulogilamu yosi ya Chikumbusu yinguŵoneka pa ma TV kweniso kuvwika pa mawayilesi mu vineneru vinandi mu vyaru vakupambanapambana ku Africa.

Venivi vinguwovya kuti apharazgi akujumpha 407,000 achiteku Chikumbusu, kweniso penga ŵanthu anyaki anandi ukongwa wo chiŵerengeru chawu chiziŵika cha wo anguwoneriyaku pamwenga kuvwisiyaku. Chinanga kuti chiŵerengeru chosi pamoza cha ŵanthu wo anguwoneriyaku pamwenga kuvwisiyaku Chikumbusu chiziŵika cha, kweni pulogilamu iyi yenga pa ma TV kweniso mawayilesi ngo ngavwika muchigaŵa cho muja ŵanthu akujumpha 150 miliyoni.

Chifukwa cha mtenda nga COVID-19, ŵanthu anandi pacharu chapasi anguchita Chikumbusu mwakugwiriskiya ntchitu nthowa ya videoconference. Kweni ku Africa apharazgi anandi aja kumalu ngo netiweki njakusuzga kweniso anandi angafiska cha kugwiriskiya ntchitu nthowa ya videoconference chifukwa njakudula. Mwaviyo, Wupu Wakulongozga unguzomereza kuti maofesi nganyaki nga nthambi ngakambiskani ndi makampani nga ma TV kweniso nga mawayilesi kuti asaniyi ngo ngangazomera kuziwonesa Chikumbusu mwakutchipa.

Zuŵa la Chikumbusu lechendafiki maofesi nga nthambi 11, ofesi yaku Angola, Benin, Cameroon, Côte d’Ivoire, Democratic Republic of the Congo, Ghana, Malawi, Mozambique, Senegal, Zambia ndi Zimbabwe angukambiskana ndi makampani ngenanga. Venivi vinguwovya kuti nkhani ya Chikumbusu yiŵikiki pa TV ndi pa wayilesi muvigaŵa vakujumpha 36, muvyaru 16.

Angola

Mawayilesi ngakukwana 6 nganguzomera kuti ngazamuŵikapu nkhani ya Chikumbusu mu vineneru 6: Chiibinda, Chikikongo, Chikimbundu, Chinyaneka, Chiphwitikizi ndi Chiumbundu. Mawayilesi ngenanga ngavwika mumadera mo muja ŵanthu anandi ku Angola.

Democratic Republic of the Congo

Munthu munyaki yo wasambira Bayibolu wangusankha kuti wawoneriyengi yija pulogilamu ya Chikumbusu pakuti ŵanthu a mu banja laki atinkhana ndi Akaboni aku Yehova. Kweni iyu wachinozgeke kuti wawonere pulogilamu iyi, awisi angudaniriza ŵe pabalaza kuti: “Yayamba!” Iyu wanguluta kubalaza ndipu wanguzizwa kuwona kuti ŵanthu wosi a mu banja laki aja pasi kuti awonere pulogilamu iyi. Ŵanthu 10 a mu banja laki anguwonere pulogilamu ya Chikumbusu.

Munthu munyaki yo ndi Kaboni cha ndipu waja mumuzi unyaki kufupi ndi Luena, wanguti: “Palivi cho aliska ŵidu achitapu. Kweni yimwi mulutirizga kusopa Chiuta winu chinanga kuti kwe matenda nga COVID-19. Nasi tiwoneriyangi namwi limoza!”

Ghana

TV ya boma yinguzomera kuwonesa pulogilamu ya Chikumbusu mu chineneru cho chiziŵika kuti Chitwi. Pa TV iyi angwamba so kudaniya ŵanthu kuti aziwonere pulogiramu iyi. Kusazgiyapu pakuwonesa Chikumbusu, TV iyi yinguwonesa so vidiyo yakuti Ntchifukwa Wuli Yesu Wangufwa? kweniso yakuti Ntchifukwa Wuli Chiuta Wazomereza Kuti Tisuzgikengi?, ndipuso anguwonesa so sumu ya mutu wakuti Mucharu Chifya kweniso yakuti Charu Chifya Chepafupi.

Senegal

Mzichi munyaki wangukamba kuti: “Ŵanthu angusambira vakukwaskana ndi Yehova pa TV kweniso pa wayilesi. Vinthu venga umampha ukongwa! Tatumbikika ndipuso tikondwa ukongwa. Timalika kuti Chiuta widu ndi Yehova!”

Mzichi munyaki so wanguti: “Ndati ndavwa kuti nkhani ya Chikumbusu yiŵikikengi pa TV ndingukamba kuti, ‘Tingutondeka kudaniya ŵanthu ku Chikumbusu chifukwa cha COVID-19. Kweni sonu chifukwa cha nthowa yeniyi, ŵanthu anandi awoneriyengi.’ Mwaliŵiliŵi ndingumbiya foni masambiru ngangu, maulendu ngakuweriyaku kweniso ŵanthu wosi wo ndaŵaziŵanga kuti ndiŵaziŵisi za mwaŵi wenuwu. Ŵanthu 9 wo ndisambira nawu Bayibolu limoza ndi mabanja ngawu, anguwonere nkhani yeniyi. Musiŵani wangu munyaki yo wanguwonere nkhani iyi pa TV ku Ziguinchor wenga ndi mafumbu ndipu wangundipempha kuti tikambiskani. Ndinguzomera kukambiskana nayu.”

Nthowa yeniyi yakuŵika nkhani ya Chikumbusu pa TV ndi pa wayilesi yipereka ukaboni unyaki wakuti “palivi cho [Yehova] Chiuta watondeka kuchita.”—Mateyu 19:26.