Pa 5 March 2023, Mubali David Splane wa mu Wupu Wakulongozga, wakutuzga Bayibolu la Charu Chifya la Malemba nga Chigiriki Ngachikhristu mu chineneru cha manja cha ku South Africa (chineneru ichi chiziŵika kuti SASL ku South Africa) ndipuso buku la Mateyu mu chineneru cha Chindonga. Mubali Splane wangutuzga ma Bayibolu ngenanga pa pulogilamu yapade yo yinguchitikiya ku ofesi ya nthambi ku South Africa. Mipingu yinandi yinguchita ŵaka kulumikiza ku pulogilamu yeniyi. Ŵanthu wosi wo anguvwisiya pulogilamu iyi ŵenga akujumpha 130,000. Ndipu abali ndi azichi angwamba kupanga dawunilodi ma Bayibolu ngenanga ngati ngatuzgika ŵaka.

Kufwatuliya mabuku mu chineneru cha manja cha ku South Africa kungwamba mu 2007 ku ofesi ya nthambi yo ye kufupi ndi tawuni ya Johannesburg, ku South Africa. Mu 2022, timu yakufwatuliya mabuku yingusamiya ku ofesi yakufwatuliyaku mabuku yo ye mutawuni ya Durban. Pakukamba vakukwaskana ndi kutuzgika kwa Bayibolu lenili mu chineneru cha manja cha ku South Africa, Mubali Ayanda Mdabe, mura mumpingu kweniso wambula kuwona wangukamba kuti: “Kutuzgika kwa Bayibolu lenili, kuŵawovyengi ukongwa ŵanthu ambula kuwona kuti awuvwisengi umampha uneneska wa mu Bayibolu kweniso kuti aziŵengi kuti le ndi nthazi. Kuŵerenga Bayibolu mu chineneru chenichi kutindiwovya kumuziŵa umampha ukongwa Yesu ndipuso kuziziŵa umampha fundu za mu Bayibolu. Kusazgiyapu yapa, venivi vitindiwovya kusintha mo ndiŵanaŵaniya.”

Chineneru cha Chindonga chikambika ukongwa ku Namibia, ndipuso ku ofesi yakufwatuliyaku mabuku mu Chindonga yo ye ku Ondangwa. a Yumoza mwa abali wo angufwatuliyaku Bayibolu ili wangukamba kuti: “Kutuzgika kwa Bayibolu ili kutindikumbusa fundu yakuti Yehova watanja ŵanthu ndipu wakhumba kuti amuziŵi umampha.”

Tikondwa nawu limoza abali ndi azichi wo ayanduwengi ukongwa ndi Bayibolu lenili. Mabayibolu ngenanga ngakufwatulikiya umampha ukongwa ndipu ngaŵawovyengi kuti alutirizgi kungayanja ukongwa marangu ngaku Yehova.—Nthanthi 2:1.