Kutuliya po mlili wa Corona ukwambiya Akaboni aku Yehova alutiriga kutuzga Mabayibolu mu vineneru vinyaki. Pa June 28, 2020, Bayibolu la Charu Chifya la Malemba Ngakupaturika likutuzgika muvineneru 4 vakupambanapambana: Swati, Tsonga, Zulu, ndi Chitonga. Bayibolu la Charu Chifya la Malemba nga Chigiriki nga Chikhristu likutuzgika so muchineneru cha Belize Kriol ndi Totonac. Chinanga kuti abali ndi azichi ŵidu anguwungana pamoza cha chifukwa cha mlili wa COVID-19 kweni angukondwa ukongwa kulonde Mabayibolu ngenanga ngo nganguŵikika pa Library ya pa intaneti kuti ŵanthu achitengi dawunilodi. Mabayibolu ngenanga ngangutuzgika pa nyengu yo nkhani yakuchita kujambulika yakambikanga ndipu apharazgi anguwonere pulogilamu yeniyi kuziya pa videoconference kweniso video streaming.

Mubali Geoffrey Jackson, wa mu Wupu Wakulongozga ndiyu wangutuzga Bayibolu la Charu Chifya la Malemba Ngakupaturika muchineneru cha Swati. Iyu wangutuzga so Bayibolu la Charu Chifya la Malemba Ngakupaturika lo likunozgeka so muchineneru cha Tsonga ndi Zulu ndipu likuŵikika pa Library ya pa intaneti kuti ŵanthu achitengi dawunilodi (wonani chithuzi). Apharazgi aku South Africa ndi Eswatini angulumikizika kuti awonere unganu wapade wenuwu.

Muchigaŵa cha nthambi ku South Africa, kwe ŵanthu pafufupi 18.5 miliyoni wo alongoro Chiswati, Tsonga, ndi Zulu, kusazgapu apharazgi akujumpha 38,000.

Mubali Augustine Semo, wa mu komiti ya Nthambi ku Malawi ndiyu wangutuzga Bayibolu la Charu Chifya la Malemba Ngakupaturika muchineneru cha Chitonga (Malawi).

Akufwatuliya angugwira ntchitu yakufwatuliya Bayibolu la Chitonga kwa vyaka vakujumpha viŵi. Wakufwatuliya munyaki wangukamba kuti: “Chineneru cha Chitonga chiŵereŵeteka mtundu patatu. Ŵanthu akutuliya kuchigaŵa chinyaki agwiriskiya ntchitu mazu ngo ŵanthu achigaŵa chinyaki akungaziŵiriya cha. Tinguyesesa kugwiriskiya ntchitu mazu ngo ŵanthu anandi atingavwisa umampha. Kusazgiyapu yapa, tingugwiriskiya ntchitu mazu ngamumphata kuti tikonkhoski mazu ngo ngangaŵa ngakusuzga kuvwisa asani atingaŵerenga.”

Wakufwatuliya munyaki so wangukamba kuti: “Apharazgi asuzgikengi cha kugwiriskiya ntchitu Bayibolu ili muuteŵeti ndipuso ku maunganu chifukwa le ndi mazu ngapusu, ndakuvwika umampha ndipuso ndambula kusuzga kuŵerenga.”

Mubali Joshua Killgore wa Mukomiti ya Nthambi ku Central America ndiyu wangutuzga Bayibolu la Charu Chifya la Malemba nga Chigiriki nga Chikhristu muchineneru cha Belize Kriol. Ŵanthu akujumpha 1,300 anguwonere pulogilamu yeniyi.

Akufwatuliya akukwana 6 angumaliza kufwatuliya Bayibolu lenili kwa chaka ndi myezi yinayi Pakukamba za mo ayanduliyengi ndi Bayibolu lasonu lenili, mzichi munyaki wangukamba kuti: “Sonu abali ndi azichi ŵidu ŵe ndi Bayibolu lo likufwatulika mwa uneneska kweniso lakuthembeka. Ilu le nge nyali yo yingaŵawovya kuti avwisengi.”

Wakufwatuliya munyaki wangukamba kuti: “Chinanga kuti kwe mulili wa COVID-19, abali ndi azichi ŵidu wo alongoro chineneru cha Belize Kriol asuzgikengi cha kuŵerenga Malemba muchineneru chawu. Malemba ngenanga ngaŵapembuzgengi kweniso kuŵawovya kuti azikunthiyepu masuzgu ngo angazikumana nangu kunthazi.”

Ku Belize, kwe apharazgi 867 mumipingu 19 ya chineneru cha Belize Kriol. Kusazgiyapu yapa ku United States kwe apharazgi 58 wo ateŵete muchigaŵa cho ŵanthu alongoro chineneru cha Belize Kriol.

Mubali Jesse Pérez, wa mu Komiti ya Nthambi ku Central America ndiyu wangutuzga Bayibolu la Charu Chifya la Malemba nga Chigiriki nga Chikhristu muchineneru cha Totonac. Ŵanthu amuchigaŵa cha nthambi yeniyi akujumpha 2,200 akutuliya mumipingu 50 ya chineneru cha Totonac, anguwonere pulogilamu yeniyi.

Wo afwatuliyangaangumaliza kugwira ntchitu yakufwatuliya Bayibolu kwa vyaka vitatu. Bayibolu lenili ntchidya cho chitiwovyengi kupharazgiya ŵanthu akujumpha 250,000 wo alongoro chineneru cha Totonac ku Mexico.

Wakufwatuliya munyaki wangukamba kuti: “Mwakupambana ndi ma Bayibolu nganyaki ngachineneru cha Totonac, Bayibolu la Charu Chifya la Malemba nga Chigiriki nga Chikhristu ‘le ndi mazu ngapusu ngo ŵanthu alongoro mazuŵa nganu. Sonu viŵengi vambula kusuzga kukonkhoska nkhani zakupambanapambana za mu Bayibolu ku ŵanthu amuchigaŵa chidu.’”

Wakufwatuliya munyaki so wangukamba kuti: “Abali ndi azichi ŵidu aja achipenja Bayibolu lenili. Pambula kuswera yapa, apharazgi anyaki afwatuliyanga mavesi mu chineneru cha Totonac kutuliya mu Bayibolu la Chisipanishi asani akamba nkhani pa maunganu nga mkati mwa sabata. Kweni sonu ivi vichitikengi so cha asani akonkhoska Malemba Ngachigiriki.”

Chakukondwesa ukongwa ndi Bayibolu lenili ntchakuti, musanirika mazu ngamumphata ngo ngakonkhoska mazu ngakupambanapambana ngo nge mu Bayibolu. Mazu ngenanga, ngayanana waka ndi ngo ŵanthu wo alongoro mwakupambanaku chineneru cha Totonac atingagwiriskiya ntchitu. Venivi vichitiska kuti Bayibolu lenili liŵafiki pa mtima ŵanthu wosi.

Tikondwa ukongwa ndi abali kweniso azichi ŵidu wo akulonde Bayibolu muchineneru chawu. Tiziŵa kuti chivwanu chawu chikhongi penipo agwiriskiya ntchitu ‘lipanga la mzimu’ muuteŵeti ndipuso pakupanga sambiru lapakuŵija.—Aheberi 4:12.