Pa 13 mpaka 17 July 2021, ku Belgium, Germany, Luxembourg, ndi ku Netherlands kunguwa chivuwa chanthazi. Venivi vinguchitiska kuti misinji yisapaliyi ndipu ŵanthu anyaki akufwa. Pasonu panu tiziŵa cha unandi wa vinthu vo vanangika ndi maji ngakusapaliya. Kwambiya vyaka 100 vo vajumpha, vyaru ivi vaja vichikumana ndi suzgu yakusapaliya kwa maji.

• Palivi mubali pamwenga mzichi yo wakupwetekeka ukongwa pamwenga kufwa

• Apharazgi pafufupi 304 angutuwamu dankha munyumba zawu

• Nyumba pafufupi 100 zikunangika ukongwa

• Nyumba pafufupi 242 zikunangika kamanavi

• Nyumba za Ufumu 11 zikunangika

• Makomiti Ngakovya pa Masoka(DRCs) nganayi ngakupangika, yimoza ku Belgium, ngaŵi ku Germany ndi ku Luxembourg ndipuso yimoza ku Netherlands

• Pasonu panu, makomiti yanga ngagwira ntchitu yakutowesa ndipuso kunozga nyumba, vo visazgapu kutuzgamu maji ndi vimaulambwi munyumba kweniso kunozga malu ngo ngakhumbika kunozgeka mwaliŵi

• Abali a mu makomiti ngenanga ndipuso ŵara amumpingu a muchigaŵa cho, akunozga malu ngakuti abali ndi azichi ajengemu kweniso awonesesa kuti abali ndi azichi ŵenaŵa ŵe ndi maji ngamampha ngakuti amwengi

• Akuwonere madera a muchigaŵa chenichi achiska kweniso kupembuzga abali ndi azichi ŵidu mwakugwiriskiya ntchitu fundu za mu Bayibolu

• Abali ndi azichi apanga mbwenu maunganu ŵe kunyumba kwawu. Abali a Mukomiti ya Nthambi achiska ndipuso kupembuzga apharazgi wo akwaskika

• Abali ndi azichi wosi wo agwira ntchitu yakovya pa masoka alondo ulongozgi wa mo angajivikiliya ku mulili wa COVID-19

Ŵara a mumpingu unyaki ku Netherlands angovya mzichi munyaki wakukota kuti wasami. Pavuli paki, abali angumbiya mwana waki yo ndi Kaboni waku Yehova cha, kuti amuziwisi kuti anyina ŵe umampha. Ndipu mwana yo wangukambiya anyina kuti: “Mwe muchisopa chamampha ukongwa. Akuphweriyani umampha ukongwa!”

Munthu munyaki yo wagwira ntchitu yakuzimwisa motu ku Belgium wanguwona abali wo agwiranga ntchitu zinyaki zakovya pamasoka. Munthu mwenuyu wanguwonga abali chifukwa chakuti wosi agwiriskiyanga ntchitu vidya vakwenere vakujivikiliya ndipuso kuti achitanga vinthu mwakukoliyana. Gulu lakuzimwisa motu ku Germany nalu so lingukhorwa ndi mo abali achitiyanga vinthu chifukwa chakuti ŵenga ndi mtima wakukhumbisiska kuchita vinthu mwakukoliyana ndi ulongozgi wakukwskana ndi kuzimwisa motu. Yumoza mwa ŵanthu ŵenaŵa wangukamba kuti: “Vatingi viŵengi umampha asani kwekosi ŵanthu achitanga venivi.”

Abali ndi azichi atiliwonga ukongwa gulu chifukwa cha chovyu cho angupaskika. Yiwu awonga so ukongwa Wupu Wakulongozga chifukwa chakuchiska ŵanthu aku Yehova kuti anozekiyengi masoka ngachilengedu. Pakumaliya, awonga ukongwa Yehova yo wachitiska kuti ŵanthu ŵaki ‘ajengi mwakuvikilirika ndipu angatimbanyizgikanga cha chifukwa chakopa soka.’—Nthanthi 1:33.