Chaka chinu chiŵengi chachitatu kuŵa ndi mavidiyo ngo nge ndi mazu ngakukonkhoska vo vichitika muvidiyo pa unganu widu wachigaŵa wapachaka. Mavidiyo ngo nge ndi mazu ngakukonkhoska vo vichitika mu vidiyo kusazgapu kukonkhoska vithuzi ngagwiriskikiya ntchitu ukongwa ndi ŵanthu ambula kuwona ndipuso wo asuzgika kuwona. Akaboni aku Yehova alutirizga kutuzga mavidiyo ngo nge ndi mazu ngakukonkhoska vo vichitika mu vidiyo kuti uthenga wa mu Bayibolu ufiki ku ŵanthu ambula kuwona pafufupi 43 miliyoni ndipuso wo asuzgika kuwona pafufupi 295 miliyoni.

Dr. Joel Snyder, mura wa pulogilamu ya Audio Description Associates, LLC ndipuso kaswiri wakuziŵika ukongwa pankhani ya kukonkhoska vo vichitika muvidiyo, wangukamba kuti: “Ndikhorwa ukongwa ndi mo Akaboni aku Yehova achitiya kuti ŵanthu ambula kuwona kweniso wo asuzgika kuwona, avwi uthenga. Ŵanthu anandi akupanga mavidiyo, aŵanaŵanaku cha kuti asazgiyengemu mazu ngakukonkhoska vo vichitika mu vidiyo kuti ŵanthu ambula kuvwa nawu avwisiyengi mavidiyo ngawu. So nditiŵawonga ukongwa Akaboni aku Yehova pakuchita venivi.”

Pa nyengu yo Wupu Wakulongozga ungunozga kuti unganu wapachaka wachigaŵa wa 2020 ujambuliki chifukwa cha mulili, ungunozga so kuti mavidiyo ngajengi ndi mazu ngakukonkhoska vo vichitika mu vidiyo. Mu 2020, Dipatimenti Yakovya pa Ntchitu Yakufwatuliya yo ye ku Likulu la Pacharu Chosi la Akaboni aku Yehova ku Warwick, ku New York, U.S.A., yingutuzga mavidiyo ngo nge ndi mazu ngakukonkhoska vo vichitika mu vidiyo. Mu 2021, ntchitu yeniyi anguyisamusiya ku Dipatimenti ya Yakuwona mo Mabuku Ngawoneke yo ye ku Likulu la Masambiru nga Akaboni aku Yehova ku Patterson, ku New York. Abali ndi azichi angulonde masambiru kuziya pa intaneti nga mo angakonkhoske mazu nga vo vichitika muvidiyo.

Dr. Snyder wangukamba kuti “mungasambiza ŵanthu kuti akonkhoskengi munthowa yamampha ukongwa. Iyu wangukamba kuti venivi visazgapu “kugwiriskiya ntchitu mazu ngafupi, ngakuvwika umampha ndipuso ngakuyeruzgiya.”

Chakwamba, timu ya Akaboni aku Yehova yivwisiya dankha mazu ngakujambula nga pa chigaŵa cha unganu. Yiwu awonere cha vidiyo ndichilatu chakuti avwisi mo munthu wambula kuwona pamwenga yo wasuzgka kuwona wangavwiya chigaŵa cha unganu. Wakufwatuliya weyosi pa timu walemba vo wasaniya. Pavuli paki wosi awonere so vidiyo, ndipu awona mipata yo ye mu nkhani yosi, chifukwa chakuti mu mipatayo ndimu asazgiyamu mazu ngakukonkhoska vo vichitika muvidiyo.

Kuyanisa mazu ngo ngakonkhoska vo vichitika muvidiyo ndi mazu nga muvidiyo kungaŵa kwakusuzga ukongwa. Michael Millen, yo wagwira ntchitu ndi Akaboni aku Yehova yakukonkhoska vo vichitika muvidiyo, wangukamba kuti: “Chifukwa chakuti malu ngamana, tisankha vo vingaja vakuvwika umampha mu vidiyo. Titesesa kuwona nyengu, malu, ŵanthu ndipuso vo achita.”

Abali ndi azichi wo afwatuliya vo vichitika muvidiyo atenere kukhwecha kupereka maŵanaŵanu ngawu pa vo awona muvidiyo. Mubuku laki lakuti: The Visual Made Verbal, Dr. Snyder wangupereka ulongozgi kwa ŵanthu wo akonkhoska vo vichitika muvidiyo, iyu wangukamba kuti: “Azomerezeni akuvwisiya kuti ayeruzgiyengi vo vichitika muvidiyo mwakukoliyana ndi mazu ngo ngakonkhoskeka umampha muvidiyo. Venivi ving’anamuwa kuti mukhumbika cha kukamba kuti: ‘Wakwiya’ pamwenga ‘Waguŵa.’ Mumalu mwaki, mukambengi kuti: ‘Walunga fayiti,’ pamwenga ‘Waliya.’”

Asani amaliza kulemba pa pepala, wakujambula mazu wakonkhoska vo vichitika muvidiyo. Wakujambula mazu wakhumbika kuŵerenga mazu ngo mwakufwasa ndipuso nge mo valembeke. Michael Millen wangukamba kuti: “Wakujambula mazu wakhumbika cha kuchita maphara ndi munthu wa muvidiyo. Asani munthu wa muvidiyo wakokomeza ukongwa pakulongoro pamwenga we ndi chitima, vingachitiska wakuvwisiya kuŵanaŵana kuti munthu yo wakonkhoska vo vichitika muvidiyo ndi munthu munyaki wa muvidiyo.”

Pakumaliya ŵanthu wo agwira ntchitu yeniyi amalizisa vosi, ndipu vo vajambulika vitumizika ku maofesi ngosi nga nthambi kuti vikafwutuliki ndipuso kujambulika mu vineneru va kwawu. Michael wangukamba kuti maunganu ngaŵi ngachigaŵa ngo ngajumpha, abali wo agwiranga ntchitu yakuyikamu mazu ngo ngakonkhoska vo vichitika muvidiyo atonga maora ngatatu kuti amalizi 1 miniti ya vidiyo yeyosi.

Pasonu panu, Akaboni aku Yehova afwatuliya magazini ndipuso mabuku ngakukonkhoska nkhani za mu Bayibolu muvineneru vakujumpha 1,000. Chinanga kuti mazu ngakukonkhoska vo vichitika muvidiyo nge pa mndandanda wa vineneru venivi cha, kweni anyaki aŵanaŵana kuti ntchineneru pakuchija. Michael wangukamba kuti: “Mavidiyo ngakukonkhoska vo vichitika muvidiyo ngapangikiya ŵanthu ambula kuwona. Vinthu vo viwoneka muvidiyo achita kuvikonkhoska.”

Titimuwonga ukongwa Yehova chifukwa wakhumbisiska kuti munthu weyosi wayanduwengi ndi chakurya chaki chinandi chauzimu kwambula kutole mo vinthu viliri pa umoyu waki!—Yesaya 65:13.