Nkhani za pa JW zakukwaskana ndi abali ndi azichi ŵidu wo atombozgeka zititichiska kuti tikunthiyengepu. Kuwona vithuzi vawu kutitiwovya kuti tiŵaziŵi, ndipu vo vitiŵachitikiya kweniso fundu zo akamba, vititiwovya kuja akukho ndipuso akukoliyana. Venivi vilongo kuti akunthiyapu mwalikondwa. Vo muŵerengengi mumphata umu vilongo mo abali ndi azichi pacharu chosi ayanduliya ndi nkhani zenizi.

Mubali Miguel Silva ndi muwolu waki Mónica, (alongoreka pachanya) achita upayiniya wapade ku Portugal. Nge mo viliri ndi anandi aku isi, ndondomeku yawu yakuchitiya vinthu vauzimu nawu yingutimbanyizgika chifukwa cha mulili. Venivi vingachitisa kuti nyengu zinyaki tifipengi mtima. Kweni Mubali Miguel ndi muwolu waki anguchiskika ukongwa ndi nkhani ya pa JW yakukwaskana ndi Mubali Konstantin Bazhenov. Mubali Konstantin wakhumbisiskanga kuŵerenga Bayibolu kweni mujeri mo wenga mwengavi Bayibolu. Mumalu mwa kufwa waka mphwayi, wangwamba kulemba mavesi ngosi ngo wangakumbukanga ndi kupanga Bayibolu laki. Mubali Miguel ndi muwolu waki Mónica angusambirapu kanthu pa vo Konstantin wanguchita. Miguel wangukamba kuti: “Mumalu mwakuŵanaŵaniya vo tingatondeka kuchita pa nyengu yinu ya mulili, tiŵanaŵaniya vo tingachita po te panyumba ndipu titesesa kuwonga pa vo tachita.”

Kusazgiyapu yapa, Miguel ndi Mónica akusankha kuti asazgiyeku nyengu yo aŵerenge Bayibolu kweniso kuŵanaŵaniya. Mónica wangukamba kuti: “Pasonu panu, tigomezga kuti Yehova wazakutiwovya kukumbuka vosi vo tisambira.” Miguel wangusazgiyapu kukamba kuti: “Vo Mubali Bazhenov wanguchita vingutichiska kuwona kuti nyengu yo te panyumba pa nyengu yinu ya mulili, ndi nyengu yamampha yakuchiskiya anyidu, kumba sumu ndipuso kupemphera.”

Mzichi Christine Mouhima Etonde, ndi mpayiniya wanyengu zosi ku Cameroon. Iyu wangukamba kuti kwa vyaka vinandi, nkhani zakukwaskana ndi kutombozgeka zamuchitiskanga mantha. Kweni pavuli paki wangukonkhoska vo vingumuwovya kuti wasinthi, iyu wanguti: “Kuŵerenga nkhani za pa JW zakukwaskana ndi abali ndi azichi wo akunthiyapu po atombozgeka kwandiwovya ukongwa kuti ndisinthi mo ndaŵanaŵaniyanga. Kuŵerenga nkhani za mo abali achitiya, mapempheru ngawu, likondwa lo ŵenalu kweniso vo achitanga ŵechendakumani ndi mayeseru, kwali mbarara pamwenga anamana, kwandiwovya kuti ndimuziŵi umampha Yehova. Ndayamba kumuyanja ukongwa Yehova ndipu nyengu zinyaki nditijiyeruzgiya kuti nditombozgeka, kweni ndilivi mantha. Nditijiwona kuti ndikondwa, ndipemphera ndipuso ndilunguruka vakukwaskana ndi Yehova.”

Mubali Iulian Nistor ndi muwolu waki Oana, wo aja ku Romania, angukwaskika ukongwa ndi mo Mubali Anatoliy Tokarev wanguchitiya pakuvikiliya chivwanu chaki mukhoti. Wanguchita vinthu mwakufwasa kweniso mwaulemu ndipu wangusimikiza mtima kulutirizga kuja wakugomezgeka. Vo Mubali uyu wanguchita vinguwovya Iulian ndi Oana kuti aŵanaŵaniyi mo nawu angachitiya pakuvikiliya chivwanu chawu mukhoti. Oana wangukamba kuti: “Pakusopa kwidu kwa pabanja, tingujiyeruzgiya kuti te mukhoti ndipu tikonkhoska fundu zakuvikiliya chivwanu chidu. Chenga chipusu cha kukonkhoska vo tigomezga mwaulemu nge mubali Anatoliy Tokarev wanguchitiya. Pakumaliya pa sambiru lidu la banja, tingujivwa kuti tepafupi ukongwa ndi abali ndi azichi ŵidu. Tinguwona so kukhumbika kwa kunozgeke limu mo tingavikiliya chivwanu chidu ndipuso kukumbuka chifukwa cho timalikiya kuja Akaboni aku Yehova.”

Mzichi Anna Ravoajarison yo waja ku Madagascar wanguwona kuti vingaja umampha kuti wasandi umamphaumampha fundu zo wakamba asani wapemphera. Wati waŵerenga nkhani ya Mubali Jovidon Bobojonov, Anna wangukamba kuti: “Nyengu zinyaki asani ndatangwanika ukongwa ndi ntchitu, ndiwerezawereza waka fundu asani ndipemphera. Venivi vichitika asani ndaleka kuŵanaŵaniya limu vo ndikhumba kumukambiya Yehova.” Wati waŵanaŵaniyapu ukongwa pa vo vinguchitikiya Jovidon, wanguyeruzgiya mo Mubali uyu watenere kuti wavwiyanga pa nyengu yo. Iyu wangujifumba kuti: ‘Asani nani ndingakumana ndi mayeseru, kumbi ndingafiska kukamba fundu nge izi? “Vo Mubali uyu wanguchita vandisambiza kuti ndikhumbika kusaniya nyengu yamampha yakunozgeke vo ndingamukambiya Yehova ndechendayambi kupemphera. Malipoti yanga ngandiwovya ukongwa.”

Mubali Ruben Catarino ndi muwolu waki Andreia, achita upayiniya wanyengu zosi ku Portugal. Pasonu panu, yiwu atanjana ukongwa ndi abali ndi azichi. Ruben wangukamba kuti: “Kali, taziŵanga kuti abali ŵidu atombozgeka mu vyaru vinyaki, kweni taŵaziŵanga cha. Taŵaziŵanga cha kuti yiwu mbayani, umoyu wawu kweniso masuzgu ngo akumana nangu. Kweni sonu titiŵaziŵa umampha chifukwa cha nkhani za pa JW zo tiŵerenga. Tingaŵapemphere kuti akunthiyengepu masuzgu ngo akumana nangu. Venivi vititiwovya kujivwa kuti te nawu pafupi ukongwa abali ndi azichi ŵidu ndipu tiziŵa kuti mapempheru ngidu ngaŵawovyengi ukongwa.”

Tikayika cha kuti anandi aku isi tiwona kuti kusambira pakutija nkhwakukhumbika ukongwa. Mzichi Cecilia Cardoso yo wateŵete nge mpayiniya wanyengu zosi ku Portugal, wangumaliza ndi fundu yakuti: “Chifukwa cha vo abali ndi azichi ŵidu akumana navu, pasonu panu ndiwona kuti kusambira pakundija nkhwakukhumbika ukongwa. Ndipu chifukwa chakuti pasonu panu ndisambira ukongwa Bayibolu pakundija, ndimuyanjengi kweniso kumuthemba ukongwa Yehova. Iyu wandiwovyengi kuti ndiŵevi mantha. Ndipu ndasambira kuti wamunthu uja ndi mantha asani waleka kuthemba Yehova.”

Ndi mwaŵi ukulu ukongwa kuŵerenga nkhani za abali ndi azichi a mazuŵa nganu wo alongo chiganga kweniso chivwanu, zo zisanirika pa jw.org. Nkhani zenizi zititiwovya kuti tiŵi ndi “chiganga ndi kukamba kuti: “Yehova ndiyu watindiwovya; ndiwopengi cha.’”—Aheberi 13:6.