Pa 4 August 2021, ndipu pakwaniyengi chaka cha nambala 75 kutuliya po unganu wakwamba wa vyaru wa Akaboni aku Yehova wa mutu wakuti “Mitundu ya Kukondwa” unguchitikiya. Unganu uwu unguchitika pa 4 mpaka pa 11 August, mu 1946, ku Cleveland, Ohio, U.S.A mu sitediyamu ndi muholu yo yenga chakufupi.

Nkhondu Yachiŵi ya Pacharu Chosi yo yinguchitiska kuti ŵanthu pacharu chosi asuzgiki yati yamala waka, abali ŵidu angunozga kuti unganu wenuwu uchitiki. Unganu wenuwu wenga wakupambana ndi vo vinguchitika pa nkhondu. Pa unganu uwu penga abali ndi azichi masauzandi nganandi wo angutuliya mu vyaru vakupamabanapambana ndipu anguwungana mwachimangu. Ŵanthu akutuliya mu mitundu yosi ŵenga akukondwa kujaliya limoza ndi ŵanthu afipa wo pa nyengu iyi ajaliyanga limoza cha ndi azungu ku United States.

Akaboni 80,000 anguwungana pamalu ngamoza kakwamba kuti avwisiyi unganu wakuti “Mitundu ya Kukondwa.” Abali ŵidu angukondwa kuwungana pamoza ŵati akanizika kuchita vinthu ndi limoza ndi azungu chifukwa cha nkhondu. Pa unganu uwu penga alendu 302 akutuliya mu vyaru 32. Mubali Nathan H. Knorr ndiyu wangukamba nkhani yakuti: “Fumu ya Chimangu” pa zuŵa la Sabata lo lenga lakumaliya.

Chinanga kuti unganu uwu ungwenda umampha kweni penga so masuzgu nganyaki. Pa zuŵa lakwamba la unganu uwu, abali wo anozganga unganu wenuwu angukumana ndi suzgu yikulu ukongwa. Ŵanthu anguzaza muholu ndipu anandi azanga mbwenu. Abali akhumbikanga kugwiriskiya ntchitu sitediyamu yinyaki ndi chilatu chakuti ŵanthu wosi asaniyi malu ngakuja kuti avwisiyi chigaŵa cha mazulu cho chingwamba nyengu ya 7:45 mazulu. Kweni musitediyamu yo mwapenjekanga kutchayika masaza ngaŵi nga Baseball ndipu ngangunozgeka kuti ngamalengi pa 6:30 mazulu.

Pa nyengu yo atchayanga baseball kachiŵi, limphezi linguchitiska kuti ŵanthu wo awoneriyanga bola aluti kwawu bola lo lechendamali. Pavuli paki, nyengu yinguja umampha ndipu venivi vinguchitiska kuti Akaboni 50,000 asaniriki paunganu pa nyengu yaki.

Pa unganu wenuwu pangutuzgika magazini nga Jani Masu, pamoza ndi buku lakuti “Let God Be True.” Mubali Knorr wangupharazga so kuti akhumba kusazgiyaku nyumba yakupulintiya mabuku ku Brooklyn, New York, U.S.A ndipuso maofesi nga nthambi muvyaru vinyaki 6.

Chakukondwesa ukongwa chenga kubatizika kwa ŵanthu 2,602 ndipu pa ŵanthu wo angubatizika penga abali 903 ndi azichi 1,699, yiwu angubatizika mu Nyanja ya Erie. Penga so vakuchitika vinyaki vakukondwesa nge vakuyeruzgiyapu va mo angapangiya sambiru la Chigongwi cha Alinda kweniso Sukulu ya Uteŵeti ndi sumu yo yingumbika ndi ŵanthu 160.

Unganu wenuwu ungwamba kuja chakuwoniyapu cha mo maunganu ngakhumbika kuchitikiya munthazi. Mwakuyeruzgiyapu, madipatimenti ngakupambanapambana ngangujalikiskika nge Dipatimenti ya Chiŵerengeru cha Ŵanthu wo Awungana, Ofesi yaku Cheyamani, Dipatimenti ya va Chipatala, Dipatimenti Yakunozga ndi Kulumikiza Vinthu ndipuso Dipatimenti ya Vinthu vo Vasoŵa ndipuso vo Vasanirika.

Mubali Ron Little, yo sonu ndi mura mumpingu wa McKeesport ku Pennsylvania, U.S.A., wenga ndi vyaka 11 panyengu yo wanguwungana paunganu wenuwu ndi awisi ndipuso mku waki. Pa mazuŵa ngosi 8 nga unganu, wosi atatu agonanga mugalimotu.

Mubali Little wakumbuka umampha po angutuzgiya magazini ya Jani Masu. Iyu wangukamba kuti: “Pa nyengu yo atuzganga magazini ya Jani Masu!, tosi tingutchimbiya uku te ndi magazini mumanja. Weyosi wapaskangaku munyaki magazini asani walivi.”

Mubali Little, yo pasonu panu we ndi vyaka 86, wakumbuka so wati wawona mo Akaboni angukondwe ŵati awungana pamoza. Iyu wangukamba kuti “Ndikumbuka kuti ndakhumbanga cha kuti unganu uwu umali. Wenga wakukondwesa ukongwa.”

Titimuwonga ukongwa Yehova chifukwa watitumbika ndi “maunganu ngakupaturika.”—Levitiko 23:2.