Pambula kuswera yapa, Akaboni aku Yehova akwambisa Situdiyo ya JW Stream. Situdiyo yeniyi, ndi webusayiti yasonu yo yiwovyengi apharazgi kuti awoneriyengi unganu wadera wo uchitika nyengu yeniyo ndi wakuwonere dera. Pa 6 ndi pa 7 March 2021, maunganu nga dera ngakukwana 340 pacharu chosi nganguwoneseka kuziya pa webusayiti yeniyi, ndipu ŵanthu akujumpha 500,000 anguwonere.

Pati pajumpha ŵaka kanyengu kamanavi mulili wati wayamba, Komiti Yakuwonere Ntchitu Yakusambiza ya Wupu Wakulongozga, yingukambiya Dipatimenti ya Broadcasting ku likulu lidu kuti yipangi webusayiti. Webusayiti yeniyi yiwovyengi kuti akuwonere madera achitiskengi maunganu ngadera, ngo ŵanthu masawuzandi angawonere kuziya pa intaneti nyengu yeniyo ngachitikiya.

Dipatimenti ya Broadcasting yingutuma kagulu kamanavi ŵaka ka abali ndi azichi kuti agwiri ntchitu iyi. Pa nyengu yo agwiranga ntchitu yeniyi, abali ndi azichi ŵenaŵa angukumana ndi masuzgu nganandi ngo akhumbikanga kumalana nangu.

Mwakuyeruzgiyapu, webusayiti yo akhumbikanga kupanga yakhumbikanga kuŵa yambula kusuzga kugwiriskiya ntchitu chifukwa ndi wosi cha wo aziŵa umampha mo angagwiriskiya ntchitu vipangizu va mazuŵa nganu. Kweniso yakhumbikanga kuti yigwirengi ntchitu chinanga ndi po intaneti yilivi nthazi ukongwa. Dipatimenti ya Broadcasting yingugwira so ntchitu limoza ndi Dipatimenti ya Makompyuta ku likulu lidu kuti yije ndi makompyuta ngakukwana. Makompyuta ngenanga ngawovyengi ŵanthu masawuzandi nganandi kuti aleki kusuzgika kugwiriskiya ntchitu webusayiti iyi chifukwa cha unandi wa ŵanthu wo atiyigwiriskiya ntchitu pa nyengu yimoza.

Alex Hernandez wa mu Dipatimenti ya Broadcasting wangukamba kuti: “Ntchitu yakupanga webusayiti yakuti ŵanthu anandi ayigwiriskiyengi ntchitu pakuwonere unganu wadera, yenga yakukondwesa ukongwa chinanga kuti yenga ndi masuzgu ngaki. Tenga waka ndi ŵanthu amanavi wo akuziŵa kupanga mapulogilamu nga pa kompyuta ndipu anandi kenga kakwamba kupangapu webusayiti yo ŵanthu angawonere vinthu vo vichitika pa nyengu yeniyo.”

Vinthu vakwamba va Situdiyo ya JW Stream, vingumalizika kupangika mu May 2020. Pati pajumpha waka myezi 5, mu October 2020, Dipatimenti ya Broadcasting yingwamba kuyesere mo webusayiti iyi yigwiriyengi ntchitu, ndipu angupempha akuwonere madera a muvyaru 6 kuti agwireku ntchitu iyi. Kuyesere kwenuku kunguwovya kuti Dipatimenti ya Broadcasting yiziŵi masuzgu ngo ngaŵapu kweniso mo angangamalisiya deti lakutuzgiya webusayiti iyi lechendakwani. Abali ndi azichi 17 ndiwu angugwira ntchitu yakumalisa masuzgu ngo angungasaniya panyengu yo angwamba kuwonesa mapulogilamu ngakwambiriya pa webusayiti iyi.

Alex wangulutirizga kukamba kuti: “Nyengu yeyosi yo takumana ndi suzgu, tapempheranga dankha techendayambi kugwiriyapu ntchitu. Asani tasaniya nthowa yakumalisiya suzgu yo, tagomezganga kuti Yehova ndiyu watiwovya.”

Abali ndi azichi anandi akamba kuti awonga ukongwa chifukwa cha webusayiti yeniyi.

Mubali Jairo Espinosa wa ku Colombia wangukamba kuti: “Tiwona kuti pulogilamu ya unganu wadera kuziya pa Situdiyo ya JW Stream, yatichiska ukongwa ndipu yatiwovya kuti tijivwengi kuti te pafupi ukongwa ndi Akhristu anyidu. Kweniso kuziŵa kuti tawoneriyanga pulogilamu yo yichitika nadi pa nyengu yeniyo, kungutiwovya kuti tiŵiki maŵanaŵanu ngidu pa nkhani zo zakambikanga. Takhumbanga cha kuti fundu yinyaki yitijumphi. Tingukondwa ukongwa ndi pulogilamu iyi!”

Mzichi Magaly Reymundo wa ku United States wangukamba kuti: “Ndiziŵa kuti fundu ziyanana waka chinanga kuti pulogilamu yo yingachita kujambulika. Kweni ndingukondwa ukongwa kuwona visku va abali wo nditiŵaziŵa achikamba nkhani nyengu yeniyo pulogilamu iyi yichiwoneseka.”

Kutuliya waka po Situdiyo ya JW Stream yikwambiya, maunganu nga dera ngakujumpha 800 ngawoneseka pa webusayiti iyi. Titimuwonga ukongwa Yehova chifukwa chakutipaska chinthu chinyaki kuti chitiwovyi kulutirizga kuja akukho mwauzimu kweniso kukoliyana ndi abali ndi azichi ŵidu.—Salimo 133:1.