Unganu wachigaŵa wakwamba wa pamasu ndi pamasu muchineneru cha Chijamaica Creole ndipuso mu Chijeremani cha ku Pennsylvania unguchitika mu July 2023. Ŵanthu pafufupi 2,000 anguwungana kuti avwisiyi unganu wachigaŵa wa mutu wakuti “Zikirani”! wo anguwulindiza kwa nyengu yitali kuti uchitiki mu vineneru vawu.

Ku Jamaica, chineneru cho ŵanthu anandi alongoro ntchingelezi. Kweni anandi mwa ŵanthu wo aja mu virwa va ku Jamaica, alongoro so Chijamaica Creole. Pa unganu uwu penga ŵanthu akukwana 1,700 ndipu anyaki mwa ŵanthu ŵenaŵa angutuwa ku United Kingdom kweniso ku United States. Unganu uwu unguchitikiya ku malu ngo ngadanika kuti Marlie Technology Park ngo nge ku Old Harbour, ku Jamaica, kwambiya pa 14 mpaka pa 16 July, 2023. Ŵanthu 12 angubatizika pa unganu wenuwu.

Abali ndi azichi ŵidu wo alongoro Chijamaica Creole angukondwa ukongwa kuchita unganu wachigaŵa muchineneru chawu kakwamba. Mzichi Tenesha Gordon wangukamba kuti: “Pulogilamu yati yayamba waka, ndingudira masozi, mubali papulatifomu wati watawuzga ŵanthu muchineneru chidu cha Chijamaica Creole. Ndinguvwana cha kuti ndituvwa Mazu ngaku Chiuta muchineneru chidu. Ndipu ndakhumbanga cha kuti unganu uwu umali.”

Ku Canada ndipuso ku United States kwe ŵanthu pafufupi 400,000 wo alongoro Chijeremani cha ku Pennsylvania. Ŵanthu a mtundu wa Amishi kweniso Amenoni wo aja ku vigaŵa va kumizi ku German ndiwu alongoro ukongwa chineneru chenichi. Pa unganu uwu panguza abali ndi azichi a mu mipingu yinkhondi ya chineneru cha Chijeremani cha ku Pennsylvania kweniso kagulu kamoza ka chineneru ichi kutuliya mu matawuni nganyaki. Ŵanthu akujumpha 200 anguwungana kuti avwisiyi pulogilamu iyi pa Malu nga Unganu nga Coraopolis ku Pittsburgh, Pennsylvania, U.S.A., kwambiya pa 7 mpaka pa 9 July, 2023.

Mubali David Miller njumoza mwa ŵanthu wo alongoro chineneru chenichi kutuliya po wakuwiya. Iyu wangwamba kusambira Bayibolu ndi Akaboni aku Yehova mu Chingelezi vyaka 25 vo vajumpha. Panyengu yeniyo, waŵanaŵaniyangaku cha kuti kungaja mipingu ya Chijeremani cha ku Pennsylvania kweniso kuti angazichita unganu wa chigaŵa mu chineneru chaki. Iyu wangukamba kuti: “Venga vakukondwesa ukongwa! Unganu wosi ndinguwuvwisiya umampha ukongwa. Ndipu chifukwa chakuti unganu uwu unguchitika mu chineneru changu, vosi vo vakambikanga pa unganu uwu vingundifika pa mtima ukongwa.”

Tikondwe nawu limoza abali ndi azichi wo angusanirika pa maunganu ngachigaŵa ngenanga. Titimuwonga ukongwa Yehova mweniyo wachitisa kuti tosi tikoliyanengi kweniso yo wachitisa kuti chineneru chituŵa chisanirikengi ku munthu weyosi.—Zefaniya 3:9.