Mu mwezi wa July ndi August 2020, abali ndi azichi ŵidu mamiliyoni kweniso ŵanthu anyaki amtima wamampha anguwonere pulogilamu ya unganu wachigaŵa wa 2020.

Unganu wachigaŵa wa mutu wakuti “Mukondwengi Nyengu Zosi”! watingi uchitikiyengi ku malu ngakuchitiyaku unganu ndipuso malu ngakupambanapambana mu vyaru 240. Kuti avikiliyi umoyu wa ŵanthu wo atingi azengi pa unganu, Wupu Wakulongozga ungunozga kuti unganu wachigaŵa ujambuliki ndipu uwoneseki pacharu chosi. Kwambiya mu 1897, yaka nkhakwamba kuti tileki kuchitiya pamoza unganu wachigaŵa.

Mubali Kenneth Cook, Jr., wa mu Wupu Wakulongozga, wangukamba kuti: “Unganu wachigaŵa wati watondeka, chilatu chidu chenga chakuti tije ndi unganu umoza wakuti weyosi wazipangi pa nyengu yimoza pacharu chosi. Tinguziŵa kuti pulogilamu yeniyi yazamukhumbika kuti yifwatuliki mu vineneru vinandi mu myezi yambula kukwana yinayi. Ntchitu yeniyi yatingi yitongi chaka pamwenga kujumpha kuti yimali. Tingukondwa ukongwa kuti pakufika pa 6 July 2020, pulogilamu yeniyi yingwamba kusanirika muvineneru 400. Tilindizga kuti unganu wenuwu usanirikengi mu vineneru 511!”

Pakukamba za mo wanguyanduliya ndi pulogilamu yakuchita kujambula yeniyi, mzichi munyaki yo walera yija ŵana atatu wangukamba kuti: “Chinanga kuti taŵasoŵa mabwezi ngidu kweni venga vakukondwesa ku ŵana. Kuwonere pulogilamu yeniyi kwa nyengu yimanavi kunguwovya ŵana kuti aŵikengi maŵanaŵanu ngawu pa unganu. Asani akhumba kupumuwa tamikanga dankha. Palivi cho chingutipamba. Chigaŵa cha pa Chinkhondi chingudidimiza kuti ŵana ŵenge mivi ndipu atenere kuteŵete Yehova mwalikondwa. Maunganu ngakuchita kujambula ngandiwovya kuti nani ndichitengi venivi.”—Salimo 127:4.

Unganu wachigaŵa wakuchita kujambula unguchitiska kuti atolankhani pacharu chosi alembi vakukwaskana ndi unganu wenuwu. Mwakuyeruzgiyapu, Robert Hendriks, yo wawonere Dipatimenti Yakuwona Vakupharazga Nkhani ku United States, wangukamba kuti: “Atolankhani anandi angulemba nkhani zakukwaskana ndi unganu wachigaŵa wakuchita kujambula. Nkhani zenizi zingukonkhoska mo gulu lingugwiriskiya ntchitu nthowa zasonu kuti ŵanthu awonere pulogilamu ya unganu kweniso mo weyosi wangajivikiliya.”

Unganu Wachigaŵa wa 2020 wa mutu wakuti “Mukondwengi Nyengu Zosi”! watilongo nthowa yasonu kweniso yakukondwesa yakuti Yehova ndi Msambizi widu Mura.—Yesaya 30:20.