Pa 7 June  mpaka pa 9, 2024 Unganu Wapade wakwamba wa 2024 wa mutu wakuti “Pharazgani Uthenga Wamampha!” wamuchitikiya ku Vélodrome Amédée Détraux ku Baie-Mahault, muchigaŵa cha Guadeloupe. Tingakamba waka kuti maunganu ngapade ngakukwana 15 ngachitikengi kwambiya mu June mpaka October 2024. a Yaka nkhakwamba kuti unganu uwu uchitiki kutuliya po mulili wa COVID-19 ungutondekese unganu wapade wenuwu mu 2020.

Abali ndi azichi akutuliya muvyaru vakupambanapambana mbakulondeleka ku maunganu ngapade ngenanga. Pa maunganu ngenanga, pa malu ngamoza unganu wamuchitikanga mu vineneru vakupambanapambana. Ku Guadeloupe, unganu uwu ukambikengi muvineneru ivi Chingelezi, Chifurenchi, Chigwadeloupiyani Creole, ndi Chispanishi.

Pe ntchitu yinandi yo yikhumbika kuchitika unganu wapade uwu wechendachitiki. Mwakuyeruzgiyapu, ku Guadeloupe kwe abali ndi azichi pafufupi 8,546. Ndipu pafufupi hafu ya abali ndi azichi wo ateŵete kwenuku ajipereka kuti awovyeku ntchitu yakulonde abali ndi azichi 1,500 wo atuliyengi muvyaru 11. Mzichi munyaki yo wakujipereka limoza ndi mulumu waki wangukamba kuti: “Ichi ndi chaka chakukondwesa ukongwa kwaku ini! Ndazakuchikumbuka kwa umoyu wangu wosi. Ndakondwa ukongwa kuja ndi nyengu yakugwiriya ntchitu limoza ndi abali kweniso azichi ŵangu ndipu venivi vandiwovya kuvwisa mo umoyu wazamuŵiya mucharu chifya. Ndikondwa so ukongwa chifukwa chakuja yumoza wa gulu laku Yehova!”

Tosi limoza ndi abali ŵidu pacharu chosi, tigomezga kuti Unganu Wapade wa 2024 wa mutu wakuti “Pharazgani Uthenga Wamampha!” uwovyengi ŵanthu aku Chiuta kuti akoliyanengi ukongwa kweniso uperekengi unkhankhu ndi ulemu kwaku Yehova Awusefwi akuchanya.—Afilipi 1:27.