Ku Moldova, Russia, ndipuso ku Ukraine kunguchitika unganu wo unguchitika kuziya pa intaneti ndipu wenga wakukumbukiya kuti pajumpha vyaka 70 kutuliya po Operation North yingumaliya. Operation North yinguchitika mu chaka cha 1951 po boma la Soviet lingutumiza Akaboni aku Yehova akukwana 9,793 ku ukapolu ku Siberia.

Pa unganu unyaki, ŵanthu wo ŵengapu angukambirika kuti ajuli pa webusayiti ya 1951deport.org, po pakonkhoska vinandi va Operation North. Webusayiti yo yikunozgeka ndi Akaboni aku Yehova pasonu panu yisanirika mu Chingelezi, mu chineneru cha ku Russia, ndipuso mu chineneru cha ku Ukraine. Pa webusayiti yeniyi, pe mbiri yakukwaskana ndi kutumizika kwa Akaboni aku Yehova ku ukapolu ku Siberia.

Dr. Lidia Padureac wa ku Yunivesite yinyaki (Alecu Russo State University of Balti), wangukamba kuti: “Vo boma la USSR linguchita mu 1951 pakutumiza Akaboni aku Yehova, chenga chilangu ndipu linguchita venivi kuti vo Akaboni agomezga vileki kuwanda.”

Kweni, Dr. Nicolae Fustei, yo ndi kaswiri wakufufuza mbiri pa wupu unyaki (Institute of History) wangukamba kuti: “Pulogilamu yo boma lingwambisa ya Operation North yingupinduwa cha. . . . Akaboni aku Yehova angumala cha ndipu angulekapu cha kupharazga vo agomezga. Mumalu mwaki, pa nyengu yeniyi ndipu angwamba kupharazga mwachiganga ukongwa.”

Dr. Virgiliu Birladeanu, yo nayu ndi kaswiri wakufufuza mbiri pa wupu unyaki (Institute of History) kweniso yo wenga cheyamani pa unganu uwu, wangukambapu vakukwaskana ndi chiganga cho Akaboni wo ŵenga ku ukapolu ŵenga nachu. Wati wafumba Akaboni malinga ndi ntchitu yaki yakufufuza, iyu wangukamba kuti: “Ndinguzizwa ukongwa kuwona kuti awoneka akukondwa. Ŵengavi chiŵembu chechosi pa vo boma la Soviet linguŵachitiya.”

Mubali Victor Dornicenco, yo wateŵete pa ofesi ya nthambi ku Moldova, wangukamba kuti Akaboni aku Yehova ku Russia pasonu panu atombozgeka nge mo angutombozgeke ndi boma la Soviet. Iyu wangukamba kuti: “Ntchachitima kuti ŵanthu asambirapu kanthu cha. Mu 2017, kwambula vifukwa vakuvwika, boma la Russia, likukaniza ntchitu za Akaboni aku Yehova pafufupi 175,000 ku Russia. Sankhu kweniso mauthenga ngaboza ngakukwaskana ndi vo Akaboni aku Yehova achita, vikuchitiska kuti Akaboni yaŵa aŵevi wanangwa. Mwakuyeruzgiyapu, alivi wanangwa wakusopa kweniso wakukana kuchita vinthu vinyaki chifukwa cha vo agomezga.”

Nge mo nkhani yajumpha yingukambiya, akaswiri ankhondi ndipuso ŵanthu wo awona va wanangwa wa ŵanthu, pamoza ndi Mubali Yaroslav Sivulskiy, yo wamiya Wupu wa Akaboni aku Yehova ku Europe, angukambiya atolankhani vakukwaskana ndi Operation North ndipuso kutombozgeka kwa Akaboni aku Yehova pasonu panu ku Russia. Pulogilamu yosi ya unganu uwu yinguwoneseka pa intaneti mu Chingelezi ndipuso muchineneru cha ku Russia.

Nge mo nkhani yajumpha yingukambiya, unganu uwu unguwoneseka pa intaneti mu chineneru cha ku Russia pe.

Akaswiri 14 akutuliya mu vyaru 6 pamoza ndi Mubali Ivan Riher wa ku ofesi ya nthambi ku Ukraine, angukamba nkhani pa unganu uwu mwakudumuwa. Malinga ndi vo angufufuza, akaswiri anyaki angufumbapu anyaki mwa ŵanthu wo angutumizika ku Siberia. Ŵanthu wo ŵengapu pa unganu uwu anguwonere tivigaŵa ta mavidiyo ngo angujambula pa nyengu yo afumbanga ŵanthu yaŵa.

Dr. Tomasz Bugaj, yo walemba mbiri kweniso wafufuza vinthu pa wupu unyaki (Institute of Culture Sciences) wo we pa yunivesite yinyaki ku Poland (University of Silesia), wangukamba kuti: “Chinanga kuti Akaboni aku Yehova ajanga mu malu ngaheni kweniso ngakofya, ndipu akhumbikanga kugwira ntchitu yakufyo, kweni angulutirizga kuja ndi mijalidu yamampha ndipuso kuchita vinthu vo agomezga. Yiwu akuŵanaŵapu cha kuti achiti vinthu mwakupambana ndi vo agomezga, ndi chilatu chakuti agwirengi ntchitu zamampha, kuja umoyu wamampha pamwenga kuti asaniyi chakurya.” Dr. Bugaj wangukamba kuti Akaboni aku Yehova mbanthu apade ukongwa, chifukwa angusintha cha vo agomezga ndipu angulutirizga mbwenu kuvigwiriskiya ntchitu mu ulamuliru wa Chikomyunizimu.

Pulofesa munyaki zina laki Liudmyla Fylypovych, wachiŵi kwaku pulezidenti wa wupu unyaki (Association of Religious Studies) ku Ukraine, wangukamba kuti pasonu panu Akaboni aku Yehova ku Ukraine agaŵiya mabuku ngo ngakonkhoska Bayibolu mu vineneru 36. Kweniso wangukamba mo ntchitu yawu yitovye ŵanthu anyaki kusazgiyapu pa Akaboni. Iyu wanguti: “Akaboni atovya ukongwa kumalisa masuzgu nganandi ngo ngachitika ku Ukraine.” Mwakuyeruzgiyapu, wangukonkhoska kuti Akaboni asambiza Bayibolu ŵanthu ambula kuwona kweniso ambuwu ndipu venivi vitovya kuti ŵanthu yaŵa ajivwengi kuti nawu mbakukhumbika.

Unganu uwu unguwoneseka pa intaneti mu Chingelezi, muchineneru cha ku Russia ndipuso muchineneru cha ku Ukraine.

Pulofesa Fylypovych wangukambiya ŵanthu wo ŵengapu pa unganu uwu kuti: “Akaboni aku Yehova angulongo kuti angafiska kuja mwakukoliyana ndi mo vinthu viliri pa umoyu wawu. Kweniso, vo angukumana navu vinguŵapaska mwaŵi wakuti alutirizgi kupharazga vo agomezga chinanga nkhumalu ko atingi afikengeku cha. . . . Mu nyengu ya ulamuliru wa Soviet, ŵanthu aŵatumbikanga Akaboni aku Yehova chifukwa cha kugomezgeka kwawu ku fundu zo atende.”

Pulofesa Igor Kozlovskyy, yo ndi pulezidenti wa wupu unyaki (Center of Religious Science Research and International Spiritual Relations) ku Ukraine wangukamba kuti: “Kuti tiziŵi cho tili, tikhumbika kukumbuka ko tatuwa. . . . Pe vinandi vo tikhumbika kukambiskana vakukwaskana ndi kutumizika kwa Akaboni aku Yehova ku ukapolu ku Siberia. Ndipu venivi vikhumbika kuŵa mu mbiri ya ŵanthu ku Ukraine.” Iyu wangukamba so kuti: “Mbudindu wa akaswiri pa nkhani zavisopa kuleka kukamba nkhani zaboza pamwenga mazu ngengosi ngakutinkha Akaboni aku Yehova kweniso chisopa chechosi.”

Unganu uwu unguwoneseka pa intaneti mu Chingelezi ndipuso muchineneru cha ku Ukraine.