Pa Sabata, pa 26 July 1931, Mubali Joseph F. Rutherford, yo wenga wakulongozga mu wupu wa Watch Tower Bible and Tract Society, ndiyu wangukamba nkhani pa unganu wo penga ŵanthu akujumpha 15,000 ku Columbus, Ohio, U.S.A. Chigaŵa cha pulogilamu yeniyi, chingupharazgika pa mawayilesi ngakujumpha 450 pacharu chosi. Yaka kenga kakwamba kuti pulogilamu ya unganu yipharazgiki pa mawayilesi nganandi viyo pacharu chosi. Mubali Rutherford wangukamba so nkhani yakukhumbika ukongwa ya mutu wakuti: “Zina Lifya.” (A New Name) Mu nkani iyi, wangukamba kuti: “Kutuwa sonu, tikhumba kuziŵika kweniso kudanika ndi zina lakuti Akaboni aku Yehova. (Wonani bokosi lakuti “ Kuzomereza.”) Ŵanthu wosi anguzomerezga mwakudaniriza kuti “Hinya!” uku atumba manja.

Mubali Arthur Worsley, yo mbiri ya umoyu waki yingulembeka mu 1986, wangukamba kuti: “Ndazamuluwa cha mo ŵanthu anguchitiya. Yiwu anguzomereza ndipu angumba manja kwa nyengu yitali chifukwa chakukondwa”

Mu vyaru vinyaki ŵanthu anguvwisiya nkhani kuziya pa wayilesi. Mubali ndi Mzichi Barber a ku Australia angukamba kuti: “Gulu la ŵanthu lati layamba kumba manja ku America, abali a ku Melbourne angusoka ndikwamba kumba manja.” Ku Japan, kagulu kanyaki kusazgapu Mzichi Matsue Ishii, angufiska kuvwisiya nkhani yeniyi. Pavuli paki, mzichi uyu wangulemba kuti: “Tingudaniriza mwalikondwa limoza ndi abali ŵidu a ku America.”

Ŵanthu angukamba kuti malu ngamalonda ngo ngenga mutawuni ya Columbus, Ohio, ngo anguŵika vikwangwani vakulondere Akusambira Bayibolu, angusintha chikwangwani ndipu anguŵikapu cho chingulembeka kuti “Takulondiyani Akaboni aku Yehova.” Pa 28 July 1931, nyuzipepala ya mutu wakuti Mthenga (The Messenger), yo yasindikizikanga ndi Watch Tower Bible and Tract Society, yingukonkhoska fundu zinyaki zakukwaskana ndi unganu wenuwu kweniso mungulembeka zina lakuti Akaboni aku Yehova kakwamba.

Unganu uwu wati wamala, abali ndi azichi angwamba kugwira ntchitu yakupharazga muvineneru vinandi ndipu agaŵiyanga kabuku kakuti The Kingdom, the Hope of the World, ko angulembamu zina lifya. Pa myezi yiŵi ndi hafu, angugaŵiya timabuku takujumpha 5 miliyoni ndipu alongozgi anandi avisopa, aboma kweniso amalonda angulonde kabuku kenaka.

Mubali Martin Poetzinger wangukamba kuti: “Pa khomu lelosi ŵanthu azizwanga asani tayamba kukambiskana nawu mwakukamba kuti: ‘Nde yumoza wa Akaboni aku Yehova ndipu ndaza kuti ndizikambiskani namwi.’ Ŵanthu apukusanga mutu pamwenga kufumba kuti: ‘Kweni mweche kudanika kuti akusambira Bayibolu, asi viyo?’” (Wonani bokosi lakuti “ Timakadi Takuziŵisa Zina Laku Yehova.”) Pati pajumpha vyaka, Mubali Poetzinger wangulemba kuti: “Vinthu vingusintha ukongwa! Ndechendayambi kukambiskana ndi ŵanthu, yiwu ndiwu akambanga kuti: ‘Ndimwi Akaboni aku Yehova, anthu?’”

Mubali A. H. Macmillan, yo nayu wengapu pa unganu wo unguchitika mu 1931, wangukamba chifukwa cho zina ili ndakwenere. Iyu wangukamba kuti: “Ndinguwona kuti yenga fundu yamampha ukongwa chifukwa zina ili laziŵisanga ŵanthu vo tachitanga ndipuso chilatu chaki. Techendayambi kudanika kuti Akaboni aku Yehova, tadanikanga kuti Akusambira Bayibolu. Chifukwa wuli? Chifukwa ndivu tachitanga. Ndipu tati tayamba kusambira Bayibolu ndi ŵanthu pacharu chosi, tadanikanga kuti Akusambira Bayibolu a Pacharu Chosi. Kweni sonu te akaboni aku Yehova Chiuta ndipu zina lenili liziŵikisa ŵanthu cho isi tili ndipuso vo tichita.”

Mazuŵa nganu, ŵanthu mamiliyoni nganandi pacharu chosi akondwa kuziŵika ndi zina lakuti Akaboni aku Yehova.—Yesaya 43:10-12.