Mu chaka cha uteweti cha 2020 Akaboni aku Yehova pacharu chosi angukumana ndi masuzgu pakuteŵete Chiuta. Chinanga kuti venga viyo kweni abali ndi azichi ŵidu angusimikizga mtima kuti ajengi akugomezgeka kwaku Chiuta kweniso ajengi akukoliyana.

Mulili wa COVID-19 wachitiska kuti pacharu chosi ŵanthu akumani ndi masuzgu ngakulu ukongwa ngakuti ngechendachitikepu.

Mulili wati wayamba waka Akaboni aku Yehova angusintha vinthu vinyaki mwaliŵi. Yiwu angusaniya nthowa zasonu kuti asopengi pamoza, kuchiskana ndipuso kupharazga uthenga wamampha.

Yanga ndi ‘malipoti nga vinthu vamampha’ vo vachitika mu chaka chenichi.—Nthanthi 15:30.

Mu chaka chenichi, gulu lidu lingutuzga Bayibolu la Charu Chifya la Malemba Ngakupaturika lamphumphu pamwenga chigaŵa chaki muvineneru 36. Chifukwa cha COVID-19, Mabayibolu nganandi ngangutuzgika pa nyengu ya maunganu kuziya pa vipangizu vasonu. Bayibolu la Charu Chifya lamphumphu pamwenga chigaŵa chaki lisanirika muvineneru 193.

Kwambiya pa 18 March, 2020, abali a mu Wupu Wakulongozga aja achituzga mapulogilamu ngapade mwezi wewosi ngakukwaskana ndi mulili pa jw.org ndipuso pa JW Library app.

Mu lipoti lakwamba, Mubali Stephen Lett wangukamba kuti, chinanga kuti mulili uwu ngwakofya kweni ulongo kuti “tija chigaŵa chakumaliya cha mazuŵa ngakumaliya.” Tikayika cha, kuti tija kukumaliya chayiku kwa chigaŵa chakumaliya cha mazuŵa ngakumaliya!”

Chinanga kuti tija mumazuŵa ngakusuzga ukongwa, Mubali Lett wangukamba kuti: “Isi nge ŵanthu aku Yehova tikhumbika cha kuja ndi mantha ngakujumphisa.”

Vidiyo yeyosi ye ndi malipoti ngakuchiska ngakutuliya pa charu chosi. Malipoti ngenanga ngalongo kukhumbika kwa kuvwiya ulongozgi wo Wupu Wakulongozga upereka. Mu vakuchitika vinandi, arara a boma awonga vo abali ŵidu achita pakulondo ulongozgi mwaliŵi munyengu ya mulili.

Kwa vyaka vinandi, Akaboni aku Yehova awungana pamoza kuti achiti mwambu wapachaka wa Chakurya Chamazulu cha Ambuya. Chaka chinu mumalu nganandi kuwungana pamoza kwenga kwakusuzga pamwenga kungukanizika. Venivi vinguchitiska kuti banja lelosi lisaniyi chiŵandi ndi vinyu ndipu anguwonere Chikumbusu chenichi kuziya pa videoconference.

Muvigaŵa vinyaki, kupanga mwambu wenuwu pa videoconference kwenga kwakusuzga. Venivi ndivu vinguchitika mu nthambi 11 ku Africa. Nthambi zenizi zingunozga kuti mwambu wa Chikumbusu wenuwu upharazgiki pa TV ndi pa wayilesi. Ndondomeku yeniyi yinguchitiska kuti apharazgi akujumpha 407,000 avwisiyi pulogilamu yeniyi kusazgiyapu chiŵerengeru cha ŵanthu anyaki anandi.

Wupu Wakulongozga unguzomereza kuti maofesi nga nthambi nganyaki ngawonesengi maunganu nga mpingu kuziya pa TV ndi pa wayilesi nge mo Chikumbusu chinguchitikiya. Nthowa yeniyi, yinguwovya apharazgi wo ŵengavi vipangizu vinyaki kuti avwisiyengi maunganu nga mpingu kuziya pa wayilesi ndipuso pa TV. Pa nyengu iyi, maofesi nga nthambi ngakukwana 23 ngangunozga ndondomeku yeniyi kusazgapu maofesi nga nthambi nga ku Africa, Europe, North America ndi South America.

Chifukwa cha mulili wa COVID-19, abali ndi azichi ŵidu anandi asuzgika kuti asaniyi vinthu vakukhumbika pa umoyu. Makomiti Ngakovya pa Masoka ngakujumpha 400 pacharu chosi ngakusankhika kuti ngawovyi apharazgi wo atondeka kusaniya vinthu vakukhumbika pa umoyu. Mu Chaka cha Uteŵeti cha 2020, Ŵupu Wakulongozga ukugwiriskiya ntchitu ndalama zakujumpha madola 18 miliyoni ngaku America kuti ziwovyi apharazgi akujumpha 330,000 munyengu ya COVID-19.

Nkhakwamba kuti abali ndi azichi awonere unganu wachigaŵa wakuchita kujambulika ku nyumba zawu. Abali a mu Wupu Wakulongozga kweniso wo atovyana nawu ndiwu angukamba nkhani pa unganu wachigaŵa wakuchita kujambulika. Mavidiyo ngenanga ngangufwatulika muvineneru vakujumpha 500. Unganu wenuwu unguŵikika pa jw.org ndipuso pa JW Library app kuti apharazgi kweniso ŵanthu anyaki wo akhumbisiskanga kuvwiskiya awonere pulogilamu yeniyi kunyumba zawu.

Kusazgiyapu pa kulimbana ndi mulili, abali ndi azichi muvigaŵa vakupambanapambana akhumbika kukunthiyapu chifukwa cha kutombozgeka.

Chaka chamala ku Russia, arara a boma angufufuza nyumba mahandiredi za Akaboni ndipu angumanga Akaboni anandi. Pasonu panu, abali ndi azichi 42 ŵe mujeri ku Russia, kusazgiyapu abali ŵaŵi a ku Crimea. Kutuliya po Khoti likulu ku Russia linguyeruzgiya mu 2017, nyumba za abali ŵidu zakujumpha 1,000 zikufufuzika.

Pasonu panu, chiŵerengeru chikulu cha Akaboni wo akumangika ku Eritrea, chafika pa 52. Anyaki mwaku wo akumangika ndi Paulos Eyasu, Isaac Mogos, ndi Negede Teklemariam. Yiwu akumangika pa 17 September, 1994 chifukwa chakuti njuŵi yawu yitiŵazomereza cha kusere usilikali. Kusazgiyapu yapa, abali ndi azichi 26 akumangika kuti aje mujeri kwa vyaka vakujumpha 10.

Tilutirizga kuŵapemphere abali ndi azichi ŵidu wo akumangika kuti alutirizgi kuja ndi chiganga. Tiziŵa kuti alongo kuti mbakugomezgeka po akunthiyapu mayeseru.—Chivumbuzi 2:10.

Mu chaka chajumpha cha uteŵeti, Akaboni pacharu chosi alongo kuti mbakugomezgeka kwaku Yehova mwakulutirizga kupharazga munthowa zakupambanapambana, kusaniya nthowa zasonu zakuchiskiyana kweniso kuvwiya mwakuphwere ulongozgi wakutuliya ku Wupu Wakulongozga ndipuso arara aboma.

Mu vinthu vosi vo achita pakujipereka kwaku Chiuta, abali ndi azichi ŵidu alongo kuti atanja Mlengi. Kugomezgeka kwawu kwazakuŵawovya kuti azikunthiyepu mayeseru ngakulu ngo azamukumana nangu kunthazi.—Yakobe 1:2, 3.