Gulu la ŵanthu wo angupona po ŵenga mujeri ya ku Dachau ku Germany, akwambisa wupu wo udanika kuti Lagergemeinschaft Dachau. Wupu uwu ukhumba kuti ŵaraŵara a boma ku Russia aleki kutombozga Akaboni aku Yehova. Ndipu mu kalata yaki yo ungulembe Pulezidenti Vladimir Putin pa 16 May 2021, wupu uwu ususka pakweru vo boma lichita pakutombozga Akaboni aku Yehova.

Kalata iyi yingukamba kuti: “Palivi zuŵa lo lijumphapu waka kwambula kuvwa malipoti ngakuti boma litombozga Akaboni aku Yehova. Apolisi kweniso gulu lachisisi la FSB ku Russia, asere munyumba za ŵanthu a muchisopa chenichi kuchifufuza kweniso kunanga vinthu. Akaboni apumika kweniso atiŵachitiya vinthu vankhaza. Anthulumi ndi anthukazi ayeruzgika kuti akaje mujeri kwa vyaka vinandi. Ndipu nyengu zosi atiŵakaniya asani apempha kuti aŵazomerezengi kuchitangaku vinthu vinyaki ŵe mujeri pamwenga kuti atuzgiki mwaliŵi.”

Kalata iyi yingumaliza ndi mazu ngakuti: “Titikupemphani kuti munthu weyosi yo we pasi pa Boma la Russia, mumupaski wanangwa wa kusopa. Chondi mutenere kumalisa vinthu vambula urunji vo vichitika!”

Kufika mu May 2021, pe Akaboni akukwana 61 wo akumangika ku Russia chifukwa cha vo agomezga. Ŵanthu ŵenaŵa asazgapu akukota nge Mzichi Valentina Baranovskaya, wa vyaka 70, yo wagwira ukayidi wa panyumba ndipu akumulangiya vyaka viŵi. Mu July 2020, wanguchita sitiroku. Pa 24 May 2021, Khoti likukana apilu yaki ndi ya mwana waki munthulumi zina laki Roman Baranovskiy, yo wagwira ukayidi kwa vyaka 6.

Titiŵawonga ukongwa ŵanthu a mtima wamampha chifukwa cha mazu ngo akamba, pakuwona vinthu vambula urunji vo vichitikiya abali ndi azichi ŵidu ku Russia ndipuso kupempha kuti boma lileki kuŵatombozga. Pa nyengu yakwenere, tiziŵa kuti Yehova wazamutaska ŵanthu ŵaki.—Daniyeli 12:1.