Zuŵa lelosi, Wupu Wakulongozga wa Akaboni aku Yehova ufufuza kuti uziŵi po mulili wa coronavirus (wo uziŵika so kuti COVID-19) wafika. Uchimi wa mu Bayibolu ulongo kuti milili ntchisimikizu cha mazuŵa ngakumaliya. (Luka 21:11) Mwaviyo, asani kwabuka matenda mbumampha kuvwiya ulongozgi wo tingapaskika kuti tijivikiliyi kweniso kuti tivikiliyi anyidu.—Nthanthi 22:3.

Panyaki anyaki angajifumba kuti, sonu abali wo aja mu vyaru vo mwafika nthenda iyi achita wuli? Mulili wa COVID-19 wachitiska kuti abali asinthi vinthu vinyaki mu maofesi nga nthambi kweniso mipingu ku Italy, Japan, South Korea ndi vyaru vinyaki. Mwakuyeruzgiyapu, mu vyaru vinyaki ofesi ya nthambi yalekeska dankha ŵanthu kuza kuziwona malu. Ndipuso mu vyaru vinyaki boma lakanizga kuti ŵanthu angawungananga cha malu ngamoza ndipu venivi vachitiska kuti ofesi ya nthambi yimiki dankha mawunganu nga dera. Mipingu yinyaki nayu yasintha kachitiru ka maunganu nga mpingu kweniso kupharazga. Chinanga kuti abali ndi azichi akumana ndi masuzgu ngenanga kweni alutirizga mbwenu kusambira Bayibolu ndi kuchiskana.—Yuda 20, 21.

Abali awona kuti fundu zo ze mumphata umu zakovya ukongwa pa nyengu iyi. Fundu izi zingakuwovyani so yimwi ndi banja linu asani muchigaŵa cho muja mwawa mulili wenuwu.

• Mungachitanga Mantha Cha. Mbuneneska kuti asani kwawa mulili titenere kuchita vinthu mwakuphwere, kweni tikhumbika cha kutimbanyizgika maŵanaŵanu chifukwa cha mantha.—Nthanthi 14:15; Yesaya 30:15.

• Muvwiyengi Ulongozgi wa Arara a Boma. Arara a boma ndiwu kanandi apereka ulongozgi wo utovya ŵanthu kuti avikiliriki. Mwaviyo tingachita umampha ukongwa kuvwiya ulongozgi wo tingapaskika.—Aroma 13:1.

• Mujengi Achanda. Musambengi mumanja ndi sopu pafupipafupi pamwenga mugwiriskiyengi munkhwala wo udanika kuti hand sanitizer. Kweniso malu ngo titanja kungako pafupipafupi ku nyumba zidu kweniso ku Nyumba ya Ufumu ngajengi ngakutowa nyengu zosi. Kusazgiyapu yapa, akuwona va umoyu akamba kuti pa nyengu iyi mbumampha cha kukolana mumanja pakutauzgana, chifukwa kungachitiska kuti matenda ngawandi ukongwa. Wupu Wakuwona va Umoyu Pacharu Chosi wapereka so ulongozgi unyaki wo ungavikiliya ŵanthu ku mulili wa coronavirus..

• Mulongongi kuti Mutanja Anyinu. Chinanga kuti tosi tiziŵa kuti kuwungana kweniso kupharazga nkhwakukhumbika ukongwa, kweni asani tatama, tingachita umampha kuja waka panyumba kuti tileki kupaskiyaku anyidu. Venivi vingalongo kuti titanja abali ndi azichi ŵidu kweniso ŵanthu wo mbakaboni cha.—Mateyu 22:39.

• Muvwiyengi Ulongozgi Asani Vinthu Vinyaki Vasintha pa Mpingu. Mu charu cho mwawa mulili, ofesi ya nthambi yingachita umampha kumika dankha maunganu nga mpingu, ngadera kweniso vakuchitika vinyaki vauzimu. Venivi ndivu vachitika mu vyaru vo mulili wa COVID-19 wawanda ukongwa nge ku Italy, Japan ndi South Korea. Mwakukoliyana ndi mo vinthu viliri, ŵara angatumiziya abali maunganu ngakujambulika kuti akawonere kunyumba kwawu. Ndipu abali ndi azichi angapharazga mwa kumba foni, kulemba meseji pamwenga makalata.

Mumphata umu mwe malifalensi ngo nge ndi ulongozgi wo ungatiwovya kuti tijivikiliyi ku matenda.

• “Jivikiriyeni ku Matenda” Jani Masu! ya Na. 6 2016, peji 4-6

• “Zimene Mungachite Kuti Mukhale Ndi Moyo Wathanzi” Galamukani! ya June 2015, peji 2-7

• “Pali Zimene Mungachite Kuti Mukhale ndi Thanzi Labwino: Mfundo 4—Muziteteza Thanzi Lanu” Galamukani! ya March 2011, peji 7