Mubali Kegawale Biyama, wa mu Komiti ya Nthambi ku Papua New Guinea ndiyu wangutuzga Bayibolu la Charu Chifya la Malemba Ngakupaturika mu Chihiri Motu. Pulogilamu yeniyi yingujambulika ku ofesi ya nthambi ya Akaboni aku Yehova ku Port Moresby ndipu yinguwoneseka pa 28 November 2020. Ŵanthu akujumpha 7,000 anguwonere pulogilamu yeniyi.

Charu cha Papua New Guinea che ndi vineneru vinandi kuluska vyaru vinyaki vosi pacharu chapasi. Ndipu kwenuku kwe vineneru pafufupi 840. Chihiri Motu ntchimoza mwa vineneru vitatu vo ŵanthu anandi agwiriskiyanga ntchitu mu charu chenichi. Ndipu ŵanthu pafufupi 140,000 alongoro chineneru chenichi.

Mubali Kukuna Jack, wa mu Komiti ya nthambi wangukamba kuti: “Ŵanthu wo alongoro Chihiri Motu aja achilindiza Bayibolu lenili kwa nyengu yitali. Tiziŵa kuti aliyanjengi ukongwa Bayibolu la Charu Chifya chifukwa le ndi mazu ngapusu ndipuso ndambula kusuzga kuvwisa.”

Akufwatuliya 6 angugwira ntchitu yakufwatuliya Bayibolu lenili kwa vyaka 10. Wakufwatuliya munyaki wangukamba kuti: “Mwambula kukayika akuŵerenga akondwengi kuwona zina laku Chiuta mu Bayibolu kwambiya Genezesi mpaka Chivumbuzi. Titimuwonga ukongwa Yehova chifukwa cha mphasu yeniyi!”

Asani tiŵanaŵaniya ntchitu yo yengapu pakufwatuliya Bayibolu lenili, tituvwa nge mo mchimi Yesaya wanguvwiya. Iyu wangukamba kuti: “Yimwi Yehova, mwazakutipaska chimangu, pakuti vosi vo tachita, yimwi ndimwi mwatiwovya kuti tivifiski.”—Yesaya 26:12.